2 Samueli 9 - Baibuli Ekibono kya Katonda 2014

Daudi ni Mefiboshethi

¹ Lwali lulala Daudi yaabuuza ati: “Ghakaalighooku omuntu ow'omu ndhu ya Saulo akaasigairegho, mmukolere eby'ekisa ku lwa Yonathani?”

² Agho ghaabaagho omuntu eyagheerezanga mu ndhu ya Saulo, nga bamweta Ziba. Baamweta aje ye Daudi. Kyabazinga Daudi oyo yaamubuuza ati: “Niiwe Ziba?” Ziba yairamu ati: “Isebo, ninze omugheereza wo.”

³ Kyabazinga oyo yaamubuuza ati: “Ezirayooku akaasigairegho ku b'omu ndhu ya Saulo, mmwoleke ekivunika kya Katonda?” Ziba yaamwiramu ati: “Ghakaaligho omwana wa Yonathani, eyalemala amagulu.”

⁴ Kyabazinga yaamubuuza ati: “Aba gha?” Ziba yaamwiramu ati: “Aba mu ndhu ya Makiri mutabane wa Ammieli e Lodebari.”

⁵ Agho kyabazinga Daudi yaatumayo, baamuleeta okuva mu ndhu ya Makiri mutabane wa Ammieli e Lodebari.

⁶ Agho Mefiboshethi mutabane wa Yonathani era mwidhukulu wa Saulo, yaidha ye Daudi, yaakutama n'ekyeni kyatuuka ku itaka. Daudi yaamweta ati: “Mefiboshethi.” Mefiboshethi yaavugira ati: “Isebo, ndi ghano nze omugheereza wo.”

⁷ Daudi yaamukoba ati: “Otatya. Ndidha ku kwoleka ekivunika ku lwa lata wo Yonathani, nkwirize eitaka lyonalyona eryali erya dhaadha wo Saulo. Era oidha kuliiranga ghalala ninze ku kiiwulo.”

⁸ Mefiboshethi yaakutama n'ekyeni kyatuuka ku itaka yaakoba ati: “Katyo nze omugheereza wo, ninze ani iwe y'olowoozaaku, nze ali ng'oti n'embwa obubwa enfu!”

⁹ Agho kyabazinga yaayeta Ziba eyali omugheereza wa Saulo, yaamukoba ati: “Ebintu byonabyona ebyali ebya Saulo n'ebyali eby'ab'omu ndhu ye, mbighaire mwidhukulu wa musengwa wo oyo Saulo.

¹⁰ Ate iwe, ni batane bo, n'abagheereza bo, mwidha kulimiranga ab'endhu ya musengwa wo oyo eitaka eryo, mubaleeterenga bye mukungwire. Olwo baghange okubanga n'emere ey'okulya. Aye Mefiboshethi mwene aidha kuliiranga ghalala ninze ku kiiwulo.” Ziba oyo yali ni batabane be ikumi na bataanu, n'abagheereza amakumi abiri.

¹¹ Ziba yaakoba kyabazinga ati: “Isebantu kyabazinga, nze omugheereza wo ndidha kukola ebyo byonabyona by'ondagiire.” Agho Mefiboshethi yaaliiranga ghalala ni Daudi ku kiiwulo, ng'oti ni batabane ba Daudi oyo.

¹² Mefiboshethi oyo yali ni mutabane we nga muto, nga bamweta Mika. Abantu abaali mu ndhu ya Ziba, baafuuka bagheereza ba Mefiboshethi.

¹³ Kale Mefiboshethi, eyali omulema ow'amagulu gombi, yaabanga mu Yerusalemu, era ng'aliira ghalala ni kyabazinga ku kiiwulo.