2 Samueli 8 - Baibuli Ekibono kya Katonda 2014

Entalo Daudi dhe yaghangula

¹ Ebyo bwe byawa, Daudi kabiri yaalwana n'Abafilisiti yaabaghangula, era yaabanhagaku ekibuga Methegamma.

² Bwe yamala yaaghangula Abamoabu. Yaabalambaaza ghansi mu nhiriri isatu. Olwo yaitaku enhiriri eibiri, yaalekagho lulala. Agho Abamoabu baafuuka bagheereza ba Daudi, era nga bamughanga omusolo.

³ Bwe yamala yaaghangula kyabazinga w'e Zoba ng'ayetebwa Hadadezeri mutabane wa Rehobu. Hadadezeri oyo yali ali kuja okweiriza ebiketezo bye ebyali bimudheemyeku ku mwiga Eufurate.

⁴ Daudi yaamunhagaku abalwani ab'oku mbalaasi lukumi na lusanvu (1,700), n'ab'oku bigere emitwalo ebiri (20,000). Yaasala eminho egy'embalaasi dhoonadhoona, aye yaalekagho edhimala okughaluza ebigaali eby'omu lutalo ekikumi dhonka.

⁵ Abasiria ab'e Damasiko bwe baidha okubeera Hadadezeri okulwana, Daudi yaabaitamu abasaadha emitwalo ebiri n'enkumi ibiri (22,000).

⁶ Agho Daudi yaata enkambi edh'abalwani mu Aramu eky'e Damasiko, Abasiria baafuuka bagheereza be nga bamugha omusolo. Musengwa Katonda yaaghanga Daudi obughanguzi buli ye yajanga.

⁷ Daudi oyo yaanhaga engabo edha zaabu abalwani ba Hadadezeri dhe baali nadho, yaadhitwala e Yerusalemu.

⁸ Era yaatoola n'ebintu kamaala eby'ekyuma eky'ekikomo okuva mu bibuga Beta ni Berothai ebyafugibwanga Hadadezeri.

⁹ Kyabazinga Toi ow'e Hamathi bwe yawulira nga Daudi aghangwire eigye lyonalyona erya Hadadezeri.

¹⁰ Kale yaatuma mutabane we Yoramu ye Daudi oyo n'obukwenda obw'okumulamusa n'okumukangaalusa olw'okulwanisa Hadadezeri n'amughangula; kuba Hadadezeri oyo yalwanisanga Toi emikuzi kamaala. Yoramu oyo yaatwalira Daudi ebintu ebya feeza, n'ebya zaabu, n'eby'ekyuma eky'ekikomo.

¹¹ Ebintu ebyo kyabazinga Daudi yaabighaayo byaba bya Musengwa Katonda, ghalala ni feeza ni zaabu Daudi oyo ye yanhaga ku maghanga goonagoona ge yaghangula, gano:

¹² Edomu, Moabu, Ammoni, Filisitia, ni Amaleki. N'omunhago gwe yatoola ku kyabazinga Hadadezeri ow'e Zoba mutabane wa Rehobu, gwona yaagughaayo gwaba gwa Musengwa Katonda.

¹³ Daudi yeeyongera okwekolera eriina, bwe yaira ng'aise Abaedomu omutwalo mulala na kanaana (18,000) mu Kiiko ekyetebwa eky'Omuunhu.

¹⁴ Agho yaata enkambi edh'abalwani mu Edomu mwonamwona, Abaedomu boonaboona baafuuka bagheereza be. Musengwa Katonda yaaghanga Daudi obughanguzi yoonayoona ye yajanga.

¹⁵ Kale atyo Daudi yaafuga Isiraeli yoonayoona, yaakoleranga abantu be ebintu mu butuufu ni mu mazima.

¹⁶ Yoabu mutabane w'omukazi eyayetebwanga Zeruia, nga n'aduumira amagye. Yehoshafati mutabane wa Ahiludi yaakuuma ebighandiiko.

¹⁷ Zadoki mutabane wa Ahitubu ni Ahimeleki mutabane wa Abiathari, baaba bakabona. Seraia yaaba mughandiisi.

¹⁸ Benaia mutabane wa Yehoiada yaakulira Abakerethi n'Abapelethi. Ate batabane ba Daudi baaba bakabona.