2 Samueli 7 - Baibuli Ekibono kya Katonda 2014

Obukwenda Nathani bwe yaleetera Daudi

¹ Agho Musengwa Katonda yaaleetera Daudi okutyama mu miraala mu kisaagaati kye eky'obwakyabazinga, era yaaleetera abazigu be abaali bamwezungulwire okulekera okumulumbanga.

² Lwali lulala, Daudi oyo yaakoba Nathani omulanzi ati: “Bona eno, nze nsula mu ndhu eyazimbwa n'emiti emivule, aye Esanduuku ya Katonda yaaba bwa mu weema!”

³ Nathani yaamwiramu ati: “Ja okole byonabyona ebikuli ku mwoyo, kuba Musengwa Katonda ali niiwe.”

⁴ Aye obwire bwene obwo Musengwa Katonda yaakoba Nathani ati:

⁵ “Ja okobe omugheereza wange Daudi oti Musengwa Katonda akoba ati, ‘Odhuuba oti niiwe oja okunzimbira endhu ey'okubangamu?

⁶ Tibangaku mu ndhu okuviira irala ku lunaku lwe natoola Abaisiraeli e Misiri okutuusa ni ye buli eno. Buli ghe mbairenga nja, nga mba mu weema.

⁷ Mu bifo byonabyona bye mbairenga njaamu nga ndi n'Abaisiraeli boonaboona, waali owuliireku nga mbuuza waire omulala ati ku bakulembeze be nataagho okulabiriranga abantu bange Abaisiraeli, nti lwaki timunzimbira ndhu ya miti mivule?’

⁸ “Kale ni oidha kukoba omugheereza wange Daudi oti nze Musengwa Katonda Afuga Amagye nkoba nti, ‘Nakutoola ku gw'okwayanga entaama mu byayiro, naakufuula omukulembeze ow'abantu bange Abaisiraeli.

⁹ Naabanga ghalala niiwe buli ye wajanga, naasaaniangagho abazigu bo ng'oli kumpi okutuukayo. Era ndidha kukufuula mukologho obe ng'oti n'abantu abakologho ab'oku nsi.

¹⁰ Ntegekeire abantu bange Abaisiraeli ekifo, mbate omwo babenga mu kifo ekyo nga kyaibwe ku bwaibwe, ghalobe kubaagho ekibatabula kabiri. Abantu ababi tibaja kwirayo kubadaazadaaza,

¹¹ nga bwe baakolanga eira mu biseera bye nateeragho abalamuzi abaakulemberanga abantu bange Abaisiraeli. Ndidha kukuwonianga okulumbibwa abazigu bo boonaboona. N'ekindi, nze Musengwa Katonda nkukoba nti ndikwaliza abaana n'abaidhukulu.

¹² Enaku dho bwe dhiriwaaku n'ofa, n'oja okweyimba ku badhaadha bo abaafa, ndikusikiza omulala ku baana bo beene be weezaalira, naamutaagho okuba kyabazinga era naaleetera obwakyabazinga bwe okukakata.

¹³ Oyo n'alinzimbira endhu, era ndireetera obwakyabazinga bwe okukakata ebyanda n'ebyanda.

¹⁴ Nze ndiba lata we ate mwene yaaba mwana wange. Bw'anaakolanga ekibi ndidha kumukangaivulanga ng'omuzaire bw'akangaivula omwana we.

¹⁵ Aye tija kukomya kumugonzanga, nga bwe nakomya okugonza Saulo, ye natoolagho memale iwe oiregho.

¹⁶ Ndidha kuleeteranga eizaire lyo okwala, ndeeterenga n'obwakyabazinga bwo okukakata mu maiso gange ebyanda n'ebyanda. Ekityamo kyo eky'obwakyabazinga kiidha kubanga kya maani ebyanda n'ebyanda.’ ”

¹⁷ Kale Nathani yaakobera Daudi byonabyona nga Musengwa Katonda bwe yabimukoba, era nga bwe yabimwoleka.

Esaala ya Daudi ey'okwebaza

¹⁸ Agho kyabazinga Daudi yangira mu Weema, yaatyama mu maiso ga Musengwa Katonda, yaakoba ati: “Wo Musengwa Katonda wange, katyo nze ninze ani era n'ab'endhu yange ni baani, iwe okutukolera ebyo byonabyona by'otukoleire?

¹⁹ Ate nga ekyo kyali kintu kitono inho ku iwe Musengwa Katonda, kuba era osuubiiza bingi ku izaire lyange mu biseera eby'omu maiso. Era ebyo, iwe Musengwa Katonda wange obyoleike nze omuntu obuntu naabimanha.

²⁰ Ate kiki ekindi nze Daudi kye nnaayongera okukukoba? Iwe Musengwa Katonda wange ondidhi bukalamu nze omugheereza wo.

²¹ Olw'okwenda kwo waleetera ebintu bino byonabyona ebikologho okubaagho nga bwe wasuubiza, ng'oyenda nze omugheereza wo mbimanhe.

²² Wo Musengwa Katonda wange, bwenebwene oli mukologho. Tituwulirangaku wundi ali ng'oti niiwe. Niiwe Katonda wenka, ezira wundi.

²³ Kale ighanga ki erindi ku nsi, eriri ng'oti n'ery'abantu bo Abaisiraeli iwe Katonda be waja n'onunula babe abantu bo? Waabakolera ebintu ebikologho era ebitiisa, ebyaleetera eriina lyo okumanhika mu nsi yoonayoona, ng'obingayo abamaghanga agandi n'emisambwa gyaibwe mu biketezo bye baalimu, ng'abantu bo bali kumpi okutuukayo.

²⁴ Wataagho Abaisiraeli babenga bantu bo ebyanda n'ebyanda ate iwe Musengwa Katonda waafuuka Katonda waibwe.

²⁵ “Wo Musengwa Katonda wange, mperaano ni kuumanga ekyo ky'osuubiiza nze omugheereza wo n'ab'endhu yange era okituukirizenga.

²⁶ Oidha kubanga mukologho ebyanda n'ebyanda, abantu bakwogerengaku bati, ‘Musengwa Katonda Afuga Amagye oyo, ni Katonda wa Isiraeli.’ Era nkweghemba okuumenga ab'endhu yange nze omugheereza wo Daudi.

²⁷ Wo Musengwa Katonda iwe Afuga Amagye, Katonda wa Isiraeli, nze omugheereza wo ngumye naakusaba ebintu ebyo, olw'ebyo by'ondholeike ng'okoba oti, olisikiza abaana n'abaidhukulu abange ku bwakyabazinga.

²⁸ “Wo Musengwa Katonda wange, niiwe Katonda, otuukiriza buli ky'okoba, era niiwe osuubiiza nze omugheereza wo ebintu ebyo ebirungi.

²⁹ Nkweghemba iwe Musengwa Katonda wange, oghe enkabi ab'endhu yange nze omugheereza wo, babenga bagonzi y'oli ebyanda n'ebyanda, nga bw'onsuubiiza. Era olw'enkabi dho, ab'endhu yange nze omugheereza wo baidha kubanga ba nkabi ebyanda n'ebyanda.”