2 Samueli 6 - Baibuli Ekibono kya Katonda 2014

Esanduuku ey'Endagaano bagireeta e Yerusalemu

¹ Agho Daudi kabiri yaasoloza abaisirukale abasinga okulwana mu Isiraeli, nga baghera emitwalo esatu (30,000).

² Yaakulembera abantu boonaboona be yali nabo, baaja e Baale eky'omu kiketezo kya Yuda, okutoolayo Esanduuku ey'Endagaano ya Katonda eyetebwa eriina lya Musengwa Katonda Afuga Amagye, oyo atyama ku kityamo kye eky'obwakyabazinga ekiri ku bitonde ebiri n'amaghagha ebyetebwa kerubi.

³ Agho baata Esanduuku eyo ku kigaali ekiyaaka, Uzza ni Ahio batabane ba Abinadabu baakivuga nga bakitoola mu ndhu ya Abinadabu oyo eyali ku lusozi

⁴ Ahio nga n'akulembeiremu Esanduuku eyo eri ku kigaali.

⁵ Daudi n'Abaisiraeli boonaboona baajanga nga bakina n'amaani gaibwe goonagoona mu maiso ga Musengwa Katonda. Baayemba nga bwe bakuba endingidi, n'entongooli, n'obugoma, n'ensaasi, n'ebide.

⁶ Bwe baatuuka mu kifo aghakubirwa engaano ekya Nakoni, ente dhaaba oti dhenda kugwa. Kale, Uzza yaagema n'engalo dhe ku Sanduuku ey'endagaano.

⁷ Agho Musengwa Katonda yaamutumbukizaaku obusungu bwe ng'oti muliro, yaamwitiragho olw'okwetulinkiriza n'agema ku Sanduuku eyo. Uzza oyo yaafiira agho gha mbali gh'Esanduuku ya Katonda.

⁸ Daudi yaasungughala olwa Musengwa Katonda okubonereza Uzza atyo. Ekifo ekyo baakituuma eriina Perezi Uzza okutuusa ni ye buli eno.

⁹ Daudi yaatya inho Musengwa Katonda ku lunaku olwo, yaakoba ati: “Nnaasobola ntya okutwala Sanduuku ya Musengwa Katonda eno ey'Endagaano?”

¹⁰ Kale Daudi yaaloba kuganha kutwala Sanduuku ya Musengwa Katonda mu kibuga kye ekyetebwa ekya Daudi. Aye baagonhoka, baagitwala mu ndhu ya Obedi Edomu ow'e Gathi.

¹¹ Esanduuku ya Musengwa Katonda eyo yaamala emyezi esatu mu ndhu ya Obedi Edomu, era Musengwa Katonda yaagha Obedi Edomu oyo n'ab'omu ndhu ye boonaboona enkabi.

¹² Agho baakobera kyabazinga Daudi bati: “Musengwa Katonda yagha ab'endhu ya Obedi Edomu ni by'ali nabyo byonabyona enkabi, olw'Esanduuku ya Katonda.” Kale Daudi yaaja yaatoolayo Esanduuku ya Katonda mu ndhu ya Obedi Edomu, yaagitwala mu kibuga kye ekyetebwa ekya Daudi, n'okusagamba okw'amaani.

¹³ Abaabbeeda Esanduuku ya Musengwa Katonda bwe baali baakatambulaku ebigere omukaaga, Daudi yaatoola ente endaagho n'ente entototo empiite, yaabighaayo ng'omusengo eri Musengwa Katonda.

¹⁴ Daudi yaakinira Musengwa Katonda n'amaani ge goonagoona, nga yeesibye bwa mu nkende ekivaalo eky'obwakabona ekyakolebwa mu ngoye empegheevu.

¹⁵ Kale atyo Daudi n'Abaisiraeli boonaboona baaleeta Esanduuku ya Musengwa Katonda nga bali kukuba emizira, eno nga bwe bafuuwa n'endeka.

¹⁶ Esanduuku ya Musengwa Katonda bwe baali bali kugireeta mu kibuga kya Daudi, Mikali mughala wa Saulo yaalengeza mu dinisa yaalinga kuliya, yaabona kyabazinga Daudi ng'ali kutuuma bw'akinira Musengwa Katonda. Yaamunhooma mule.

¹⁷ Baaleeta Esanduuku ya Musengwa Katonda baagita mu kifo kyayo, mu Weema Daudi ye yagisimbiragho. Daudi yaaghaayo eri Musengwa Katonda ebigheebwayo ebyokebwa, n'ebigheebwayo olw'okutabagana.

¹⁸ Bwe yamala okughaayo ebigheebwayo ebyo, yaasabira abantu enkabi mu liina lya Musengwa Katonda Afuga Amagye.

¹⁹ Yaagabula abantu olukunkumuli mu Isiraeli: buli muntu, k'abe musaadha oba mukazi, yaamugha omugaati, n'ekinofu ky'emamba, n'ekitole eky'ebibala eby'emizabbibu ebikaze. Agho abantu baagolola, buli muntu ewuwe.

²⁰ Agho Daudi yairayo eka okusabira abantu ab'omu ndhu ye enkabi. Aye Mikali mughala wa Saulo bwe yafuluma okumweisuusaayo, yaakoba ati: “Nga kyabazinga wa Isiraeli yeetairemu ekinhagansi olwaleero luno! Yaaja yeeghembulaghembula mu maiso ag'abairu abakazi abagheereza abakungu be! Yaaba ng'oti n'abasaadha abasirusiru abazira kye bagasa bwe bakola nga baziramu na nsoni!”

²¹ Daudi yairamu Mikali ati: “Mbaire ndi kukinira Musengwa Katonda eyalonda nze n'anfuula omukulembeze ow'abantu be Abaisiraeli, mu kifo ky'okulonda lata wo oba omuntu owundi yeenayeena mu ndhu ya lata wo. Era ndidha kuja mu maiso n'okukinira Musengwa Katonda.

²² Ndidha kwongera okwemalamu ekinhagansi n'okusinga agho, nfuuke anhoomebwa y'oli. Aye abairu abakazi b'oli kukoba, baidha kuntaamu ekinhagansi.”

²³ Mikali oyo mughala wa Saulo, tiyazaalaku mwana okutuusa okufa.