2 Samueli 5 - Baibuli Ekibono kya Katonda 2014

Daudi bamufuula kyabazinga wa Isiraeli ni Buyudaaya

¹ Agho abantu ab'ebika bya Isiraeli byonabyona baidha ye Daudi e Heburoni, baamukoba bati: “Bona eno, ife tuli baluganda era ba musaayi mulala n'iwe.

² Mu biseera ebyabita nga Saulo ni kyabazinga waife, niiwe owakulemberangamu eigye lya Isiraeli okuja mu ntalo. Agho Musengwa Katonda yaakukoba ati, ‘Oidha kukulemberanga abantu bange Abaisiraeli, obenga mufuzi waibwe.’ ”

³ Kale abakulembeze mu Isiraeli baidha ye kyabazinga Daudi e Heburoni. Daudi oyo yaakola nabo endagaano mu maiso ga Musengwa Katonda, baamusiiga omuzigo okumufuula kyabazinga wa Isiraeli.

⁴ Daudi yali agheza emyaka amakumi asatu egy'obukulu, ghe yaafuukira kyabazinga wa Isiraeli. Era yaafuga okumala entangama ya myaka amakumi ana.

⁵ Yaafugira Buyudaaya e Heburoni okumala entangama ya myaka musanvu n'emyezi mukaaga, ate yaafugira Isiraeli yoonayoona ghalala ni Buyudaaya e Yerusalemu okumala entangama ya myaka asatu n'esatu.

⁶ Agho kyabazinga Daudi n'abasaadha be baaja e Yerusalemu okulwanisa Abayebusi abaali abatyamye ab'omu kiketezo ekyo. Abayebusi abo baakoba Daudi bati: “Toidha kwingira ghano, kuba abatulu obutulu n'abalema obulema baidha kukulwanisa bakulemeese.” Baali badhuuba mule bati: “Daudi tasobola kughangula kibuga kino.”

⁷ Aye ate Daudi oyo yaagema ekifo kyaibwe eky'okwewogomamu eky'e Sioni, ekyo kyafuuka “Ekibuga kya Daudi.”

⁸ Ku lunaku olwo Daudi yakoba abasaadha be ati: “Omuntu yeenayeena akyaye Abayebusi ng'oti ninze Daudi, abitire mu mweta ogw'amaadhi, aje alumbe abalema n'abatulu abo.” Okwo n'okwava endhogera ekoba eti: “Abatulu n'abalema tibaidha kungira mu ndhu.”

⁹ Agho Daudi yaaba mu kifo ekyo eky'okwewogomamu, yaakituuma eriina “Ekibuga kya Daudi.” Yaazimba ku kifo ekyo ekibuga okukyezunguluza, ng'aviira mu kifo kye baidhuzaamu eitaka olw'okwekuuma abazigu, ekyayetebwanga Millo, yaaja ng'aira munda.

¹⁰ Daudi oyo yaajanga nga yeeyongera okuba omukologho, kuba Musengwa Katonda Afuga Amagye yali ali naye.

¹¹ Agho kyabazinga Hiramu ow'e Tiro yaagheereza Daudi abakwenda, n'emiti emivule, n'ababaadhi, n'abazimbisa amabaale, baghange okuzimbira Daudi ekisaagaati eky'obwakyabazinga.

¹² Agho Daudi yaategeera nga bwenebwene Musengwa Katonda amuleeteire okukakata nga kyabazinga wa Isiraeli, era ng'aleeteire obwakyabazinga bwa Daudi oyo okugheebwa ekitiisa ku lw'abantu be Abaisiraeli.

¹³ Daudi ng'amaze okuva e Heburoni n'abeera irala mu Yerusalemu, yeeyongera okubayiza abakazi, yaafuniramu n'ab'embali. Yaazaala abaana abandi abalenzi n'abaghala.

¹⁴ Gano n'amaina ag'abaana be yazaala ng'ali mu Yerusalemu: Shammua, Shobabu, Nathani, Solomoni,

¹⁵ Ibuhari, Elishua, Nefegi, Yafia,

¹⁶ Elishama, Eliada ni Elifeleti.

Daudi Aghangula Abafilisiti

¹⁷ Abafilisiti bwe baawulira nga Daudi asiigiibwa omuzigo okumufuula kyabazinga wa Isiraeli, boonaboona baaja okumuyiiga. Daudi bwe yakiwulira, yeegisa mu kifo eky'okwewogomamu.

¹⁸ Agho, Abafilisiti baatuuka mu kiiko ky'e Refa, baakibuna kyonakyona.

¹⁹ Daudi yeebuuza ku Musengwa Katonda ati: “Nje nwane n'Abafilisiti? Onandeetera okubaghangula?” Musengwa Katonda yairamu ati: “Ja. Bwenebwene ndidha kukuleetera okubaghangula.”

²⁰ Agho Daudi yaidha e Baali Perazimu, yaaghangulirayo Abafilisiti. Yaakoba ati: “Musengwa Katonda aneesooseeyo emberi yaaghaguza mu bazigu ng'oti n'omwidhuzo ogw'amaadhi bwe gughaguza ghe gubita.” Kale kyova ekifo ekyo bakyeta Baali Perazimu.

²¹ Abafilisiti baalumuka, baaleka n'agho ebifaananie byaibwe bye baasinzanga. Daudi n'abasaadha be baabitwala.

²² Kabiri Abafilisiti baidha mu kiiko ky'e Refa, baakibuna kyonakyona.

²³ Era Daudi bwe yeebuuza ku Musengwa Katonda. Musengwa Katonda yamwiramu ati: “Otabalumba ng'ova ghano, aye weetooloole obave e mugongo, obalumbire kumpi n'emiti emibalisamu.

²⁴ Bw'onaawulira empindo edh'abali kukumba, nga dhiviira ghaigulu ku miti emibalisamu egyo, ng'olwo obalumba. Olwo nze Musengwa Katonda nnaaba nkwesooseeyo emberi okughangula eigye ery'Abafilisiti eryo.”

²⁵ Daudi yaakola nga Musengwa Katonda bwe yamulagira, yaaja ng'aita Abafilisiti okuva e Geba okutuuka e Gezeri.