2 Samueli 3 - Baibuli Ekibono kya Katonda 2014

¹ Okuva olwo, okulwanagana ghagati gh'abantu ab'oku luuyi olwa Saulo n'abantu ab'oku luuyi olwa Daudi, kwaja nga kubaagho. Oluuyi olwa Daudi lwaja nga lweyongera amaani, ate oluuyi olwa Saulo lwaja nga lweyongera okunafugha.

Batabane ba Daudi

² Bano ni batabane ba Daudi be yazaalira e Heburoni: Omuberi yali Amunoni, inhina nga ni Ahinoamu ow'e Yezireeli.

³ Owokubiri yaaba Kileabu, inhina nga ni Abigaili namwandu wa Nabali ow'e Karumeli. Owokusatu yaaba Abusalomu, inhina nga ni Maaka, mughala wa Talumai eyali kyabazinga wa Geshuri.

⁴ Owokuna yaaba Adoniya, inhina nga ni Haggithi. Owokutaanu yaaba Shefatia, inhina nga ni Abitali.

⁵ Owomukaaga yaaba Ithireamu, inhina nga ni Egila.

Abuneri yeeyimba ku Daudi

⁶ Okulwanagana ghagati gh'abantu ab'oku luuyi olwa Saulo n'abantu ab'oku luuyi olwa Daudi, bwe kwali kukaaja mu maiso, Abuneri yaajanga nga yeeyongera okuba ow'amaani mu bantu ab'oku luuyi lwa Saulo.

⁷ Saulo yali ni mukazi we ow'embali ye baayetanga Rizipa, mughala wa Aya. Agho Ishiboshethi yaakoba Abuneri ati: “Lwaki waja n'oba ni muka lata wange ow'embali mu buliri?”

⁸ Abuneri yaasungughalira inho Ishiboshethi olw'ebibono ebyo. Yaamukoba ati: “Olowooza oti nze ndi mugheereza wa Yuda? Nga ate n'okutuusa olwaleero luno nkaali mwesigwa eri ab'endhu ya lata wo Saulo, n'eri baganda be, n'eri bakagwa be. Era nga tikughangayooku mu ngalo dha Daudi. Aye ate olwaleero wantaaku omusango ogugemagana n'omukazi!

⁹ Kale ni Katonda agwananga yambonereza inho, Nze Abuneri, bwentatuukirizanga ekyo Musengwa Katonda kye yalayirira Daudi,

¹⁰ ati alitoola obwakyabazinga ku b'endhu ya Saulo, yaataagho Daudi abe kyabazinga wa Isiraeli ni Buyudaaya, okuva ku Dani okutuuka e Beerisheba.”

¹¹ Ishiboshethi tiyaghanga kwiramu Abuneri kibono kindi kyonakyona, kuba yali ali kumutya.

¹² Abuneri yaagheereza abakwenda ye Daudi e Heburoni, bamukobe bati: “Naani mwene nsi eno? Bona eno, bw'onaakola ninze endagaano, ndidha kukozesa obuyinza bwange ndhize Isiraeli yoonayoona ku luuyi lwo.”

¹³ Daudi yaamukoba ati: “Kale, ndidha kukola n'iwe endagaano, aye ndi kukwendaku ekintu kirala kiti: oteekwa buteekwe okundeetera Mikali mughala wa Saulo, bw'oliba ng'oli kwidha okumbona.”

¹⁴ Daudi era yaagheereza abakwenda ye Ishiboshethi mutabane wa Saulo ng'amukoba ati: “Mpa mukazi wange Mikali ye nagheeraku omwandu ogw'obuwutu ekikumi bwe nakeketa ku basaadha Abafilisiti.”

¹⁵ Agho Ishiboshethi yaatuma abantu, baatoola Mikali ku iba eyali ayetebwa Palutieli, mutabane wa Laishi.

¹⁶ Aye Palutieli oyo yaaja ng'anonereza Mikali, nga bw'alira engira yoonayoona okutuuka e Bahurimu. Abuneri yaamukoba ati: “Ja, irayo.” Era yairayo.

¹⁷ Agho Abuneri yaayogera n'abakulembeze mu Isiraeli. Yaabakoba ati: “Mumaze ekiseera kinene nga mwenda Daudi abe kyabazinga waimwe.

¹⁸ Kale mpegaano ekyo mukituukirize, kuba Musengwa Katonda yasuubiza Daudi ati, ‘Ndidha kukozesa omugheereza wange Daudi okununula abantu bange Abaisiraeli mu ngalo edh'Abafilisiti, ni mu ngalo edh'abazigu baibwe abandi boonaboona.’ ”

¹⁹ Abuneri era yaayogera n'abantu ab'ekika kya Benjamini. Bwe yamala yaaja okukobera Daudi ab'ekika kya Benjamini n'Abaisiraeli boonaboona kye baasalagho okukola.

²⁰ Abuneri yaaja ye Daudi e Heburoni n'abantu amakumi abiri, Daudi yaabakolera embaga.

²¹ Abuneri yaakoba Daudi ati: “Isebantu kyabazinga, ka nkole nje nkusololeze Abaisiraeli boonaboona iwe musengwa wange, bakole n'iwe endagaano obafugenga boonaboona nga bwe wayenda.” Agho Daudi yaasiibula Abuneri ng'amaze okumukakasa ng'aidha kuja mu miraala.

Abuneri bamutemula

²² Nga ghabiseegho akaseera katono, Yoabu yaira n'abagheereza ba Daudi nga bava okunhaga, era nga baize n'omunhago mungi inho. Aye mu kiseera ekyo Abuneri yali amaze okuva ye Daudi e Heburoni, nga Daudi amaze okumusiibula n'okumukakasa nga bw'aidha okuja mu miraala.

²³ Yoabu bwe yatuuka n'eigye lyonalyona lye yali nalyo, baamukobera bati: “Abuneri mutabane wa Neri aidhie okubona kyabazinga, era kyabazinga amusiibwire yaaja miraala.”

²⁴ Agho Yoabu yaaja ye kyabazinga Daudi yaamukoba ati: “Okoze ki ekyo? Lwaki Abuneri aidhie y'oli n'omuleka obuleke n'aja?

²⁵ Oidhi bukalamu nga Abuneri mutabane wa Neri aidhie kukuguya, na kubona byonabyona by'okola n'eyo yoonayoona y'otambulira.”

²⁶ Yoabu bwe yava ewa Daudi, yaatuma abakwenda okulumuukirira Abuneri. Baamwagaana ku nsulo eyetebwa eya Sira, baamwiza. Aye Daudi tiyakimanhaku naire.

²⁷ Era Abuneri bwe yaira e Heburoni, Yoabu yaamwiza gha mbali gh'omulyango, yaaba ng'oti ali kwenda kwogera naye kyama. Bwe baali nga bali eyo, Yoabu yaamufumita mu mabunda yaafa. Okwo kwali kwesasuuza, kuba Abuneri yaita Asaheli muganda wa Yoabu oyo.

²⁸ Daudi bwe yakimanha nga ghabiseeghooku ekiseera, yaakoba ati: “Nze n'abantu ab'omu bwakyabazinga bwange, tuziraku musango gwonagwona mu maiso ga Musengwa Katonda, olw'okufa kwa Abuneri mutabane wa Neri.

²⁹ Yoabu n'ab'endhu ya ise boonaboona, n'ababe bavunaanibwenga omusango ogwo. Mu buli luse olw'ab'endhu eyo mugwananga mwabaamu ali n'endwaire ey'okutoonha okuva mu bitundu eby'ekyama, oba ali n'endwaire ey'ebigenge, oba omulema azira ky'aghanga, oba aitibwa mu lutalo, oba abulwa emere.”

³⁰ Kale Yoabu ni muganda we Abishai, batyo bwe baita Abuneri nga bamwesasuulizaaku olw'okwita muganda waibwe Asaheli, mu lutalo olwali e Gibeoni.

Abuneri Bamuziika

³¹ Agho Daudi yaalagira Yoabu n'abantu be yali nabo bakanulemu ebivaalo byaibwe olw'okunakughala, beesibe ebikaakaati, balire Abuneri. Era kyabazinga Daudi mwene, yaanonereza omulambo gw'Abuneri nga baja okuguziika.

³² Baaziika Abuneri e Heburoni, kyabazinga yaakuba empungu, yaalira amaziga, ku magombe ga Abuneri n'abantu abandi boona baalira.

³³ Kyabazinga yaalira Abuneri ng'akoba ati: “Bwenebwene lwaki Abuneri yafa ng'oti n'omusiru bw'afa?

³⁴ Emikono gyo tigyali misibe, n'ebigere byo tibyaliku ndhegere. Wafa ng'oti n'omuntu aitiibwa abantu ababi!” Agho abantu boonaboona kabiri bairamu okulira Abuneri.

³⁵ Agho abantu boonaboona baajanga beegayirira Daudi alye ku mmere omusana ogwo. Aye Daudi yeefuugha ng'akoba ati: “Katonda agwananga yambonereza inho, bwe nkombanga ku mmere oba ekintu ekindi kyonakyona ng'endhuba ekaali kugwa.”

³⁶ Ekikolwa ekyo, abantu boonaboona baakibona era baakisiima, ng'oti ni bwe baasiimanga ebintu byonabyona kyabazinga bye yakolanga.

³⁷ Agho abantu ba Daudi boonaboona n'Abaisiraeli boonaboona, baakitegeera ku lunaku olwo ng'okwita Abuneri mutabane wa Neri tiyali ntegeka ya kyabazinga.

³⁸ Kyabazinga yaakoba abagheereza be ati: “Timubona nga Isiraeli olwaleero luno efiiriirwa omukulembeze ow'amaani era omukologho?

³⁹ Olwaleero luno mpulira nga nziramu maani, waire nga ninze kyabazinga eyasiigibwa omuzigo. Batabane ba Zeruia bano, banfuukire ekizibu. Oyo eyakola ekibi ekyo, Musengwa Katonda agwananga yaamwesasuulizaaku mu nsambo emugwaniire olw'obubi bwe.”