2 Samueli 23 - Baibuli Ekibono kya Katonda 2014

Ebibono bya Daudi ebyasembayo

¹ Bino n'ebibono bya Daudi ebyasembayo: Kuno n'okwogera kwa Daudi mutabane wa Yesse, okwogera okw'omuntu Katonda ye yagulumiza, omuntu Katonda wa Yakobo oyo ye yasiiga omuzigo, omwembi wa zabbuli mu Isiraeli ataloodheka.

² Daudi oyo yakoba ati: “Omwoyo gwa Musengwa Katonda gwogerera mu nze, antaire ebibono bye mu kanwa.

³ Katonda wa Isiraeli yayogera, oyo olubaale lwa Isiraeli olw'okwewogomamu yankoba ati: Omuntu bw'afuga abantu ng'asala mu butuufu, n'afuga ng'atya Katonda,

⁴ ababonekera ng'oti n'akasana ak'oku nkyo, ak'endhuba evaayo ku lunaku oluziraku bire ku igulu aba ng'oti maadhi agaleetera eisubi okusibuka okuva mu itaka.

⁵ Bwenebwene atyo Katonda bw'ali eri ab'olulyo lwange, kuba yakola ninze endagaano ey'olubeerera, endagaano ensengeke obukalamu era etalivaagho. Nkakasa nti aidha kumbeeranga mu buli kintu, era ampenga byonabyona bye nhenda.

⁶ Aye abantu abatatya Katonda boonaboona bali ng'oti mawa ge basuula obw'ere, kuba toghanga kugagema na ngalo.

⁷ Aye ole ayenda okugagemaku, akozesa ekyuma ekigumu einho era n'olunhago olw'eifumo, yaagookya n'omuliro gwagamaliragho irala.”

Abalwani ba Daudi ab'amaani

⁸ Gano n'amaina ag'abalwani ab'amaani Daudi be yali nabo: Asooka nga ni Yoshebu Basshebethi ow'e Tahakemoni n'eyali ng'akulira abasatu ab'amaani. Ono ghaligho omukuzi gwe yalwanisa eifumo lye n'abalwani olunaana (800), yaabaita boonaboona.

⁹ Owokubiri ku basatu abo ab'amaani nga ni Eleazari mutabane wa Dodo, ate Dodo oyo yaaba mutabane wa Ahohi. Oyo n'eyali ni Daudi ni bakana okulwanisa Abafilisiti abaali beesoloiza okulwana, waire nga Abaisiraeli baaleka olutalo bairayo einhuma.

¹⁰ Mwene yaakana yaita Abafilisiti okutuusa omukono gwe bwe gwakoogha, engalo ni dhimwefunhira ku mpiima. Musengwa Katonda yaabagha obughanguzi obw'amaani olunaku olwo. Abaisiraeli baamala baira bwa kutoola ku baitibwa bintu.

¹¹ Owokusatu ku basatu abo ab'amaani nga ni Shamma mutabane wa Agee ow'e Harari. Oyo ghaaligho olunaku Abafilisiti lwe beesololeza e Lehi aghaali omusiri ogwidhwire ebidhandhaali, Abaisiraeli baalumuka Abafilisiti abo.

¹² Aye Shamma oyo yaasigala mu musiri ogwo yaagulwanirira, yaita Abafilisiti. Musengwa Katonda yaagha Isiraeli obughanguzi obw'amaani.

¹³ Agho nga mu biseera eby'amakungula, abasatu ku balwani amakumi asatu abaakuliranga banaibwe mu igye, baaja Daudi ye yali mu mpuku ey'e Adullamu. Ekikunsu eky'Abafilisiti kyali kisimbye weema dhaakyo mu kiiko eky'e Refa.

¹⁴ Mu kiseera ekyo Daudi yali mu kifo eky'okwewogomamu, ate ekikunsu eky'Abafilisiti nga kisimbye enkambi yaakyo e Bethelehemu.

¹⁵ Omwoyo gwadhuuba Daudi oyo, yaakoba ati: “Kale nguli ghaligho omuntu andeeteraku amaadhi ag'okunhwa agava mu nsulo eri ku mulyango ogw'ekibuga e Bethelehemu!”

¹⁶ Agho abalwani bale abasatu ab'amaani baaja baaghaguza mu kifo Abafilisiti ghe baasimba weema dhaibwe, baasena amaadhi mu nsulo eyo, baagaleetera Daudi. Aye yaaloba kuganhwaku naire, yaagafukira Musengwa Katonda

¹⁷ ng'akoba ati: “Wo Musengwa Katonda, tikiribaagho nze okukola ekintu ng'oti n'ekyo. Olwo mba ng'ali kunhwa omusaayi ogw'abasaadha bano abaghaireyo obulamu bwaibwe ni baja okuganona!” Kale yaaloba kuganhwa. Ebyo n'ebikolwa abalwani abo abasatu ab'amaani bye baakola nga baziramu ntete naire.

¹⁸ Abishai muganda wa Yoabu era nga inhina ni Zeruia, n'eyali akulira abalwani amakumi asatu ab'amaani. Abishai oyo yaalwanisa abantu ebikumi bisatu n'eifumo lye yaabaita, yeekolera eriina mu balwani amakumi asatu abo.

¹⁹ Oyo n'eyasinga okumanhikana einho mu abo amakumi asatu, era yaafuuka muduumizi waibwe. Aye ti yatuuka ku idaala lya bale abasatu.

²⁰ Benaia ow'e Kabuzeeli era mutabane wa Yehoiada, yali mulwani wa ntalo aziramu ntete. Yakola eby'amaani kamaala, nga n'omuli n'okwita abalwani ab'amaani ababiri Abamoabu. Olundi yaita empologoma ng'eri mu kiina, mu biseera eby'omugozi nga gugwire.

²¹ Era yaita Omumisiri nga wa kighaga, ate ng'agemye eifumo mu ngalo. Benaia oyo yaamulumba nga mwene ali na mwigo bwigo, yaamuswankulaku eifumo mu ngalo yaamwitisa lyene eryo.

²² Ebyo n'eby'amaani Benaia mutabane wa Yehoiada bye yakola, ni yeekolera eriina mu abo amakumi asatu ab'amaani.

²³ Benaia oyo yamanhikana inho mu abo amakumi asatu, aye tiyatuuka ku idaala lya bale abasatu. Daudi yaamutaagho okukuliranga abaisirukale be abaamukuumanga.

²⁴ Abandi ku abo amakumi asatu ni bano: Asaheli muganda wa Yoabu, Elihanani mutabane wa Dodo ow'e Bethelehemu, Shamma ow'e Harodi,

²⁵ Elika ow'e Harodi,

²⁶ Helezi Omupaleti, Ira mutabane wa Ikkeshi ow'e Tekoa,

²⁷ Abiezeri ow'e Anathothi, Mebunnai Omuhushathi,

²⁸ Zalumoni Omuahohi, Maharai ow'e Netofa,

²⁹ Helebu mutabane wa Baana ow'e Netofa, Ittai mutabane wa Ribai ow'e Gibea eky'Ababenjamini,

³⁰ Benaia ow'e Pirathoni, Hiddai ow'oku bwiga obw'e Gaashi,

³¹ Abialiboni Omuarubathi,

³² Azimavethi ow'e Bahurimu, Eliahaba ow'e Shaaluboni, Batabane ba Yasheni, Yonathani,

³³ Shamma Omuharari, Ahiamu mutabane wa Sharari Omuharari,

³⁴ Elifeleti mutabane wa Ahasibai ow'e Maaka, Eliamu mutabane wa Ahithofeli ow'e Gilo,

³⁵ Heziro ow'e Karumeli, Paarai Omuarubi,

³⁶ Igali mutabane wa Nathani ow'e Zoba, Bani Omugadi,

³⁷ Zeleka Omuammoni, Naharai ow'e Beerothi eyagemeranga Yoabu mutabane wa Zeruia eby'okulwanisa bye,

³⁸ Ira Omuithiri, Garebu Omuithiri,

³⁹ ni Uria Omuhitti. Agho boonaboona aghalala baaba abantu amakumi asatu na musanvu.