2 Samueli 22 - Baibuli Ekibono kya Katonda 2014

Olwembo lwa Daudi olw'obughanguzi

¹ Agho Daudi yaayembera Musengwa Katonda olwembo luno, ku lunaku Musengwa Katonda oyo lwe yamuwonia omuzigu we Saulo n'abazigu be abandi boonaboona:

² Musengwa Katonda n'olubaale mwe neegisa, era n'ekifo kyange eky'okwewogomamu, antoola mu bizibu.

³ Musengwa Katonda ni Katonda wange, n'olubaale lwe numukiramu okwewonia, era n'engabo mwe neewoma; n'omulwanirizi wange amponia byonabyona. Musengwa Katonda n'obulumukiro bwange, era n'ekifo kyange eky'okwewogomamu, oyo n'amponia abakambwe.

⁴ Ndirira Musengwa Katonda okumbeera, yamponia abazigu bange, era agwaniire okusaakibwanga.

⁵ Olumbe lwanzingiza, omuzigu ng'ayenda kunsaaniagho ng'oti mataba.

⁶ Emigugha egy'emagombe gyaneezungulula, era okufa kwantega olutuula.

⁷ Bwenali ndi mu buzibu, nasaba Musengwa Katonda, naalirira Katonda wange ambeere; yaawulira amamiro gange ng'ali mu isinzizo lye, era okulira kwange kwamutuuka mu kutu.

⁸ Olwo ensi yaayuuga, yeesunda, emisingi egy'eigulu gyatengeeta era gyadhugumira; kuba agho Musengwa Katonda yali asungughaire.

⁹ Omwosi gwamuva mu nhindo, ate enimi edh'omuliro n'amanda agaaka, byamuva mu kanwa.

¹⁰ Yaigulagho eigulu yaika ku nsi nga ghansi gh'ebigere bye ghaligho ekire ekiirugavu bezigizigi.

¹¹ Yaika ng'ali ku kitonde ekiri n'amaghagha ekyetebwa kerubi, era nga kiri kuguluka naye, baamubona ng'ali kuziinhuukira mu mpewo.

¹² Yeeghemberera enzikiiza, era yeegisa mu bire eby'amaadhi agazigwire.

¹³ Mu bimyanso ebyali agho, mwavaamu amanda agaliku enimi edh'omuliro.

¹⁴ Musengwa Katonda yaatyabuka oti lukuba mu igulu, oyo Ali Ghaigulu Yeene yaayogera n'amamiro ge.

¹⁵ Yaalasa obulaso bwe yaasansaania abazigu be, yaamyansa olukuba yaababingagho.

¹⁶ Musengwa Katonda bwe yabakaabukira, n'empiriito ey'omuuka ogw'omu nhindo dhe n'ewulirwa, emisingi egy'ensi gyayerulwa, n'entobo y'enhandha yaaboneka.

¹⁷ Okuva ghaigulu eyo, yagolola omukono gwe yantoola, yaanhinhulula mu maadhi agenda okuumira.

¹⁸ Yamponia abazigu bange ab'amaani n'abo abankyagha; kuba baali ba maani inho okunsinga.

¹⁹ Baanumba ku lunaku lwe nali mu buzibu obutaloodheka, aye Musengwa Katonda yambeera.

²⁰ Yantuusa mu kifo ekigazi yaabamponia, kuba nali nga nkola by'ayenda.

²¹ Musengwa Katonda yansasula ng'ajiira ku butuufu bwange yampa enkabi dhe, kuba nziraku musango.

²² Nze njiira ku biragiro bya Musengwa Katonda, era tigwangaku mu kibi kya kudaaliima kuva ku Katonda wange.

²³ Ebiragiro bye byonabyona mbigema butiribiri, era mu mateeka ge ghazira lye ngayaalirira.

²⁴ Mu maiso ge nzira musango, era neekuuma ndobe kugwa mu kibi.

²⁵ Musengwa Katonda kyava n'ansasula ng'ajiira ku butuufu bwange, era ng'ajiira ku ky'okuba nti nzira musango mu maiso ge.

²⁶ Oli mwesigwa eri abeesigwa, era waaba wa mazima eri ab'amazima.

²⁷ Oli mutukuvu eri abo ab'emyoyo emitukuvu, olabukira mangu abo abakozi b'ebibi.

²⁸ Olokola abo abagonvu aye olingirira abo abeetwala nga ba ghaigulu, waabaisa ghansi.

²⁹ Wo Musengwa Katonda, bwenebwene oli itaala lyange, era niiwe Katonda wange amuliikirira mu nzikiiza.

³⁰ Ku lulwo nsobola okughangula eigye eiramba; iwe Katonda wange ombeera naaghalampa ebisenge mwe beegisa.

³¹ Katonda ono, kiisi ky'akola kiba kituufu, kiisi ky'asuubiza akituukiriza, era yaaba ng'oti ngabo eri abo abamweyuna okubawonia.

³² Ghazira Katonda wundi okutoolaku Musengwa Katonda; ghazira lubaale lundi lwa kwewogomamu okutoolaku Katonda waife oyo.

³³ Katonda oyo n'ekifo ekigumu eky'okwewogomamu, era yantoolera mu ngira ebizibu.

³⁴ Yangumya ebigere ku itaka ng'oti bya mpongo era yangumiza irala eyo ghaigulu mu nsozi.

³⁵ Andhegeresa okulwana olutalo, naasobola okukozesa akalaso kale keene ak'ekyuma eky'ekikomo.

³⁶ Iwe Musengwa Katonda, onkuuma era wandokola era olw'okumbeera kwo ndi mukologho.

³⁷ Ogha ebigere byange okwetaaya nga ghazira angemaku, byaloba kutyerera ni ngwa.

³⁸ Nabingirira abazigu bange naabatuukaku, naabazikiriza, era tyakyusa kwira okutuusa nga mmaze okubamulungula.

³⁹ Nabamulungula naabafumitafumita baaba nga tibaghanga kusituka, baagwa ku itaka naabaniinaniinaku.

⁴⁰ Niiwe owampa amaani ag'okulwana olutalo olwo, abo abaanumba waabasuula ku itaka naabaniinaniinaku.

⁴¹ Waleetera abazigu bange okukyuka baalumuka naababona bwa nkoone, naazikiriza abo abankyagha.

⁴² Baakanula amaiso aye nga tibabona wa kubawonia, baalirira Musengwa Katonda aye yaaloba kubavugira.

⁴³ Nabasekula, naabasa baaba ng'oti nkungu; naabatyankirira ng'oti bityanka eby'omu nguudo, naabasansaania.

⁴⁴ Wamponia abantu abadheemu, wanfuula omufuzi ow'amaghanga kamaala abantu be nali tiidhi waabafuula bagheereza bange.

⁴⁵ Abamaghanga agandi baidha ye ndi nga baavula bwavule; olwampuliraku bati, baatoolera okugondera ebiragiro byange.

⁴⁶ Emyoyo gyabawaamu ira, era baavaayo mu bufo bwaibwe obugumu obw'okwegisaamu nga badhugumira.

⁴⁷ “Musengwa Katonda mulamu! Oyo olubaale mwe neewogoma asaakibwenga; Katonda oyo obulokozi bwange agulumizibwenga!

⁴⁸ Katonda oyo, anwaniragho abazigu bange, n'ampangulira amaghanga ni ngafuga,

⁴⁹ yamponia abazigu bange. Bwenebwene ombeedie, abaanumbagana baasigala ghansi; omponiiza abo abakola eby'obukambwe.

⁵⁰ Kale ni nnaakusaakanga mu maghanga goonagoona, era naayembanga nga nsaaka eriina lyo.

⁵¹ Katonda agha kyabazinga y'agonza obughanguzi, oyo ye yalonda amwoleka nga bw'amugonza einho, era oyo nga ni Daudi ni baidhukulu be ebyanda n'ebyanda.”