2 Samueli 21 - Baibuli Ekibono kya Katonda 2014

Baidhukulu ba Saulo baitibwa

¹ Agho mu kiseera Daudi kye yafugiramu Isiraeli endhala yaagwa, yaalumira emyaka esatu egiiraganwaku. Daudi yaaja yeebuuza ku Musengwa Katonda. Musengwa Katonda yaamukoba ati: “Saulo n'ab'endhu ye baliku omusango ogw'obutemo, kuba Saulo yaita Abagibeoni.”

² Kale kyabazinga Daudi yaayeta Abagibeoni. Abagibeoni abo tibaali Baisiraeli, aye baali Abamori abaawonagho. Saulo yayenda okwita Abagibeoni abo kuba yalumirwanga inho Abaisiraeli n'ab'omu kika kya Yuda, waire nga Abaisiraeli abo baali bamaze okulayirira Abagibeoni abo obutabaita.

³ Kale Daudi yaakoba Abagibeoni ati: “Mbakolere ki? Mutango ki gwe mbe mbaghe, memale musabire enkabi abantu ba Musengwa Katonda ababe ku bubwe?”

⁴ Abagibeoni baamwiramu bati: “Ensonga eri ghagati ghaife ni Saulo oba n'ab'endhu ye, tesobola kuwaagho na feeza oba na zaabu. Era titwenda omuntu waire omulala ati aitibwe mu Isiraeli ku lwaife.” Agho Daudi n'okubabuuza ati: “Buti mukoba mbakolere ki?”

⁵ Baamwiramu bati: “Saulo oyo yatutirimbula, yaayenda bwa kutuzikiriza twenatwena tuweegho mu Isiraeli.

⁶ Kale ni batughe abantu musanvu ku baidhukulu be, tubasibe emigugha mu nkoto tubalengeedhie mu maiso ga Musengwa Katonda e Gibea ku lusozi lwa Musengwa Katonda.” Kyabazinga yaabairamu ati: “Ndidha kubagha abantu abo omusanvu.”

⁷ Aye kyabazinga Daudi yaawonia Mefiboshethi mutabane wa Yonathani era mwidhukulu wa Saulo, yaaloba kumughaayo, olw'ekirayiro Daudi oyo ni Yonathani oyo mutabane wa Saulo kye baakola mu liina lya Musengwa Katonda.

⁸ Kale kyabazinga yaaghaayo abalenzi ababiri batabane ba Saulo be yazaala mu Rizupa mughala wa Aya, omulala nga ni Arumoni ate owundi yaaba nga ni Mefiboshethi. Era yaaghaayo n'abalenzi abataanu Merabu mughala wa Saulo be yazaala ni Adirieli mutabane wa Barazillai Omumeholathi.

⁹ Abo omusanvu yaabaghaayo eri Abagibeoni babaghanika baabalengeedhia mu maiso ga Musengwa Katonda ku lusozi, era baafiira ghalala boonaboona. Baabaita mu nnaku edhisooka edh'amakungula, ng'abantu baakainhama okukungula sayiri.

¹⁰ Agho Rizupa mughala wa Aya era eyali muka Saulo ow'embali, yaatoola ekutiya yaagyeyalira ku lubaale, okuva ku kiseera eky'amakungula ghe kyainhamira okutuusa ku ekiseera ekya amaadhi okugwa. Omusana yaaloba kuganhanga nhonhi kwidha ku mirambo egyo, ate obwire yaalobanga kuganha nsolo kugiidhaku.

¹¹ Bwe baakobera Daudi ebyo Rizupa mughala wa Aya era eyali muka Saulo bye yakola,

¹² Daudi yaaja yaatoola amagumba ga Saulo n'aga Yonathani mutabane wa Saulo oyo, ku bantu ab'e Yabeshi eky'omu Gileadi. Abantu ab'e Yabeshi abo baali nga baibye amagumba ago mu luya olw'ekibuga Bethi Shani, Abafilisiti ye baabaghanika ni babalengeedhia ku lunaku lwe baabaitiraku ku lusozi Giliboa.

¹³ Daudi yaatoolayo amagumba ga Saulo n'aga Yonathani mutabane we. Era baasoloza n'amagumba aga bale be baaghanika ni babalengeedhia.

¹⁴ Kale baaziika amagumba ga Saulo n'aga mutabane we Yonathani mu magombe ga Kishi lata wa Saulo oyo e Zela mu kiketezo kya Benjamini. Era baakola byonabyona kyabazinga Daudi bye yalagira. Ebyo bwe byawa, Katonda yaabagha bye baasabira ensi yaibwe.

Abaisiraeli balwana entalo n'Abafilisiti abawaigufu

¹⁵ Kabiri Abafilisiti bairamu okulwana n'Abaisiraeli. Kale Daudi yaaja n'abasaadha be okulwana n'Abafilisiti abo. Daudi oyo yaakoogha inho.

¹⁶ Ghaabaagho Ishibibenobu nga wa ku lulyo olw'abantu abawaigufu. Yali n'eifumo lya kyuma kya kikomo nga lizitogha kilo ng'oti isatu n'ekitundu, era nga yeesibye olusibiro mu nkende olwaliku empiima empyaka. Agho omusaadha oyo yaagezaaku okwita Daudi.

¹⁷ Aye Abishai mutabane wa Zeruia yaidha yaayamba Daudi, yaalumba Omufilisiti oyo yaamwita. Agho abasaadha ba Daudi baamulayirira bati: “Iwe oli ng'oti itaala lya Isiraeli, kale tokairayo kuja n'ife mu lutalo, tiikulwa ng'eitaala eryo lizima.”

¹⁸ Olwo nga luwoire, kabiri ghaabalukagho olutalo olundi n'Abafilisiti e Gobu. Sibbekai ow'e Husha yaita Safi, ow'oku lulyo olw'abantu abawaigufu.

¹⁹ Era ghaabalukagho kabiri olutalo olundi n'Abafilisiti e Gobu. Elihanani mutabane wa Yaareoregimu Omubethilehemu, Goliathi Omugitti eyali n'eifumo eryali n'olunhago olunene olwaga n'ekiti kye balukisa olugoye.

²⁰ Kabiri era ghaabaayo olutalo e Gathi omwali omusaadha omukologho ng'ali n'engalo mukaaga ku buli mukono, n'obugere mukaaga ku buli kigere byonabyona aghalala amakumi abiri na bina. Yeena yali wa ku lulyo olw'abantu abawaigufu.

²¹ Oyo bwe yasoononkereza Abaisiraeli, Yonathani mutabane wa Shimei muganda wa Daudi, yaamwita.

²² Abo abana baali ba ku lulyo olw'abantu abawaigufu abaali e Gathi, era Daudi n'abasaadha be n'abaabaita.