2 Samueli 2 - Baibuli Ekibono kya Katonda 2014

Daudi bamufuula kyabazinga wa Buyudaaya

¹ Ebyo bwe byawa, Daudi yeebuuza ku Musengwa Katonda ati: “Nje mbe mu kindi ku bibuga bya Yuda?” Musengwa Katonda yaamwiramu ati: “Ja.” Daudi yaabuuza ati: “Kibuga ki kye mbe njeemu?” Yaamwiramu ati: “Ja e Heburoni.”

² Kale Daudi yaaja e Heburoni ni bakazi be bombi: Ahinoamu ow'e Yezireeli, ni Abigaili namwandu wa Nabali ow'e Karumeli.

³ Daudi era yaaja n'abasaadha be ghalala n'ab'omu maka gaibwe, baaba mu bibuga ebyezungulwire Heburoni.

⁴ Agho abantu ab'omu kika kya Yuda baidha e Heburoni, baasiiga Daudi omuzigo okumufuula kyabazinga wa Buyudaaya. Daudi bwe baamukobera bati: “Abantu ab'e Yebeshi eky'omu Gileadi n'abaaziika Saulo,”

⁵ Daudi yaagheereza abakwenda y'abantu abo, okubakoba bati: “Musengwa Katonda abaghe enkabi, kuba mwayoleka obwesigwa bwaimwe eri musengwa waimwe Saulo, mwamuziika.

⁶ Nsaba Musengwa Katonda abagonzenga obutalekera era abenga mwesigwa ye muli. Zeena ndidha kubakoleranga ebirungi olw'ekyo kye mwakola.

⁷ Mpegaano ni, mugume mulobe kubaamu ntete naire, kuba waire nga musengwa waimwe Saulo yafa, aye ab'endhu ya Yuda bansiiga omuzigo, banfuula kyabazinga waibwe.”

Ishiboshethi bamufuula kyabazinga wa Isiraeli

⁸ Mu kiseera ekyo, Abuneri mutabane wa Neri era omuduumizi ow'eigye lya Saulo, yali alumwike ni Ishiboshethi mutabane wa Saulo, ng'ajiire naye e Mahanaimu.

⁹ Abuneri yaafuulira eyo Ishiboshethi oyo okuba kyabazinga wa Gileadi, n'ow'Abashuri, n'owa Yezireeli n'owa Efuraimu, n'owa Benjamini, era owa Isiraeli yoonayoona.

¹⁰ Ishiboshethi oyo mutabane wa Saulo, yali wa agheza emyaka amakumi ana egy'obukulu ghe baamufuulira kyabazinga wa Isiraeli. Era yaafuga okumala entangama ya myaka ebiri. Aye ng'ab'endhu ya Yuda bajiira ku bya Daudi.

¹¹ Era Daudi oyo yaafugira ab'endhu ya Yuda mu Heburoni okumala entangama ya myaka musanvu n'emyezi mukaaga.

Olutalo ghagati gha Isiraeli ni Yuda

¹² Agho Abuneri mutabane wa Neri n'abagheereza ba Ishiboshethi mutabane wa Saulo, baava e Mahanaimu, baaja e Gibeoni.

¹³ Yoabu mutabane w'omukazi eyayetebwanga Zeruia, ghalala n'abagheereza ba Daudi, boona baaja baayagaanana nabo ku kidiba eky'e Gibeoni. Baatyama ku luuyi olundi olw'ekidiba, ni bale baatyama ku luuyi olundi.

¹⁴ Abuneri yaakoba Yoabu ati: “Abaisuka okuva ku buli luuyi ka basituke batuzaanhiremuuku eby'okulwana.” Yoabu yairamu ati: “Kale basituke bazaanhe.”

¹⁵ Agho abaisuka ikumi na babiri baasituka aba Ishiboshethi mutabane wa Saulo nga ba kika kya Benjamini, n'abandi ikumi na babiri okuva ku bagheereza ba Daudi.

¹⁶ Buli muntu ku abo yaagema ow'okulwana naye omutwe, yaamufumita empiima mu mbavu, bombi baagwira kulala baafa. Kyova ekifo ekyo baakyeta “Ekibandha eky'Empiima”, era kiri e Gibeoni.

¹⁷ Agho olutalo olw'amaani lwatanukagho ku lunaku olwo. Abasaadha ba Daudi baaghangula Abuneri n'abasaadha be Abaisiraeli.

¹⁸ Batabane ba Zeruia abasatu boona baali mu lutalo olwo: Yoabu, Abishai, ni Asaheli eyalumukanga einho ng'oti mpuuli.

¹⁹ Asaheli oyo yaabingirira Abuneri, aghazira kulingalinga.

²⁰ Abuneri yaalingaku einhuma, yaamubuuza ati: “Asaheli, niiwe oli kuuminga?” Asaheli yairamu ati: “Ninze.”

²¹ Abuneri yaamukoba ati: “Lekera agho okuumingirira! Kyukira ku mukono gwo omusaadha oba ku mugooda, ogeme mulala ku baisuka omunhageku by'ali nabyo.” Aye Asaheli yaayongera bwongere okumubingirira.

²² Kabiri Abuneri yaakoba Asaheli ati: “Lekera agho okuumingirira! Lwaki oli kwenda okundeetera okukwita? Nnaalinganga ntya ku muganda wo Yoabu, nga mmaze okukwita?”

²³ Aye Asaheli yaayongera bwongere okumubingirira. Kale Abuneri yaamufumita mu mabunda ng'akozesa omusabi ogw'eifumo lye, eifumo lyamubitamu lyamufulumira mu mugongo, yaagwa era yaafiira gheene agho. Abantu boonaboona abaatuukanga Asaheli ghe yagwa n'afiira, nga beemerera beesimba agho ng'oti bafu.

²⁴ Aye Yoabu ni Abishai baabingirira Abuneri. Agho endhuba ng'eri kugwa, baatuuka ku lusozi Amma lw'obitaku memale n'otuuka e Gia, ku ngira eja mu irungu ery'e Gibeoni.

²⁵ Agho ab'ekika kya Benjamini beesololeza aghali Abuneri ku ngulu ku lusozi, beeyimba ghalala kitole, nga beetegeka okulwana.

²⁶ Agho Abuneri yaayeta Yoabu ng'alagiriza, yaamukoba ati: “Tunaalwanagana kutuuka byanda na byanda? Toidhi nga ku nkomerero muvaamu bulumi bwereere? Olirekeza li abantu bo okutubingirira ife baganda baibwe?”

²⁷ Agho Yoabu yaakoba ati: “Ndayira Katonda omulamu, nti ngoli toyogeire, abasaadha bange tibandirekeire kubabingirira n'okutuusa enkyo.”

²⁸ Agho Yoabu yaafuuwa eigwala, abantu be boonaboona baalekera agho okubingirira Abaisiraeli, era baalekera n'okulwana.

²⁹ Agho Abuneri n'abasaadha be baatambula obwire obwo bwonabwona nga babita mu kiiko ekirimu omwiga Yorudani, ekyetebwa Araba. Baasomoka omwiga Yorudani, era baatambula enkyo eryo lyonalyona, baatuuka e Mahanaimu.

³⁰ Yoabu ng'amaze okwira y'okubingirira Abuneri, yaayeta abasaadha be beesoloza, yaakizuula nga kubulaku abantu ikumi na mwenda nga tobaliireeku Asaheli.

³¹ Aye abasaadha ba Daudi baita ab'ekika kya Benjamini ebikumi bisatu na nkaaga, abaali abasaadha ba Abuneri.

³² Yoabu n'abasaadha be baatwala omulambo gwa Asaheli, baaguziika mu magombe ga ise agaali e Bethelehemu. Yoabu n'abasaadha be baatambula obwire obwo bwonabwona bwabakyeraku nga batuuse e Heburoni.