2 Samueli 19 - Baibuli Ekibono kya Katonda 2014

Yoabu anenia Daudi

¹ Baakobera Yoabu bati: “Bona eno, kyabazinga ali kulira amaziga era yaagegenga olw'Abusalomu.”

² Kale abantu boonaboona abandibaire nga basagamba olw'obughanguzi ku lunaku olwo, baira bwa mu kunakughala, kuba baawulira ku olwo bati kyabazinga enaku emugemye olwa mutabane we.

³ Ku lunaku olwo abantu baira mu kibuga nga bali kweiba bweibe, ng'oti n'abalwani bwe beiba nga baswaire olw'okulumuka mu lutalo.

⁴ Kyabazinga yeeghemba mu maiso, yaawowoola ati: “Woowe, omwana wange Abusalomu! Woowe, Abusalomu omwana wange! Omwana wange!”

⁵ Agho Yoabu yaidha, yangira mu kisaagaati kya kyabazinga yaamukoba ati: “Olwaleero oleeteire abagheereza bo boonaboona okuswala. Ate nga bawoniiza obulamu bwo, n'obwa batabane bo, n'obwa baghala bo, n'obwa bakazi bo ab'omu ndhu n'ab'embali.

⁶ Oyoleike nga bw'ogonza abakukyagha ate n'okyagha abakugonza. Era okikakaisa olwaleero oti abaduumizi bo n'abagheereza bo, ti kintu y'oli. Olwaleero nkitegeire nti nguli Abusalomu n'abaire omulamu, ife abandi twenatwena nga tufiire, wandisangaire inho.

⁷ Kale ni situkiramu oje oyogere bukalamu n'abagheereza bo, kuba ndayira Musengwa Katonda nti bw'otaaje, tighaidha kubaagho muntu asigala n'iwe obwire buno. Ekyo kiidha kukuviiramu akabi akatakobeka, akatakutuukangaku kasookanga obaagho.”

⁸ Agho kyabazinga yaasituka, yaaja yaatyama ku kityamo kye gha mulyango ogw'ekibuga. Abantu boonaboona bwe baabakobera bati kyabazinga atyaime gha mulyango ogw'ekibuga, boonaboona beesololeza gh'ali. Mu kiseera ekyo Abaisiraeli boonaboona baali balumukiire mu maka gaibwe, buli muntu ng'aizeeyo ewuwe.

Daudi airayo mu Yerusalemu

⁹ Ghaidhagho okukaayana mu bika byonabyona ebya Isiraeli, ng'abantu bakoba bati: “Kyabazinga Daudi yatuwonianga abazigu baife, yaatuwonia n'Abafilisiti. Aye buti yalumuka Abusalomu, yaava mu nsi ye.

¹⁰ Ate Abusalomu ye twasiiga omuzigo abe kyabazinga waife, wuuyo yafiira mu lutalo. Kale lwaki ghazira ayogeraku ku kya kwiza kyabazinga Daudi?”

¹¹ Agho kyabazinga Daudi yaagheereza obukwenda ye Zadoki ni Abiathari bakabona, ng'akoba ati: “Mukobe abakulembeze ab'ekika kya Yuda muti, ‘Lwaki niimwe omuli kusembayo mu ky'okwiza kyabazinga mu kisaagaati kye, ng'ate Abaisiraeli boonaboona bye bali kwogera bituuse ku kyabazinga?

¹² Muli baganda bange ab'omusaayi gwange gwene. Kale lwaki niimwe omuli kusembayo mu ky'okwiza kyabazinga?’ ”

¹³ Kyabazinga Daudi era yaakoba Zadoki ni Abiathari ati: “Era mukobe Amasa muti, ‘Iwe ow'omusaayi ogwange gwene, okuva ni mpegaano bw'otaafuuke muduumizi wa igye lyange mu kifo kya Yoabu, Katonda agwananga yambonereza inho.’ ”

¹⁴ Mu nsambo eyo Daudi yaikirizisa ab'ekika kya Yuda boonaboona, baafuuka muntu mulala. Kale baamugheereza obukwenda obukoba buti: “Ira, ghalala n'abagheereza bo boonaboona.”

¹⁵ Agho kyabazinga Daudi yaira, yaatuuka ku mwiga Yorudani. Ab'omu kika kya Yuda baidha e Giligali okumusangaaza n'okumusomosa omwiga Yorudani.

¹⁶ Mu kiseera n'ekirala ekyo, Shimei mutabane wa Gera Omubenjamini, yaayangughaku yaidhira mu b'ekika Yuda okusangaaza kyabazinga Daudi.

¹⁷ Yaidha n'abantu lukumi (1,000) Ababenjamini. Ni Ziba omugheereza w'endhu ya Saulo yeena yaidha, ni batabane be ikumi na bataanu, n'abagheereza be amakumi abiri, baayangughaku okuja ku mwiga Yorudani okusangaaza kyabazinga Daudi.

¹⁸ Baasomoka omwiga baghange okusomosa ab'endhu ya kyabazinga n'okukola kyonakyona kyabazinga kye yali ayenda kikolebwe. Kyabazinga Daudi bweyali ali kuja okusomoka omwiga Yorudani, Shimei mutabane wa Gera yeeyala ku itaka mu maiso ge,

Daudi ayoleka Shimei ekivunika

¹⁹ ng'amukoba ati: “Isebantu kyabazinga, nkusaba olobe kuneegemerera oba okwidhukira nze omugheereza wo bwe nakubisa obubi iwe musengwa wange kyabazinga, ku lunaku lwe wava mu Yerusalemu. Isebantu kyabazinga, ekyo otakisiba ku mwoyo,

²⁰ kuba nze omugheereza wo ndidhi nga nayonoona. Kyova obona nga ndidhie olwaleero luno, nga ninze asoose okuva mu ndhu yoonayoona eya Yosefu okwidha okukusangaaza iwe Isebantu kyabazinga.”

²¹ Agho Abishai mutabane wa Zeruia yairamu ati: “Shimei ono eyavuma oyo Musengwa Katonda ye yasiiga omuzigo, tagwaniire kwitibwa bwitibwe?”

²² Aye kyabazinga Daudi yaamukoba ati: “Ye mumbeereire ki imwe abaana ba Zeruia? Lwaki mwenda okundeetaku obuzibu olwaleero? Mudhuuba muti ghaligho anaitibwa mu Isiraeli olwaleero luno? Nkiidhi bukalamu nti mperaano ninze kyabazinga wa Isiraeli.”

²³ Agho kyabazinga yaalayirira Shimei ati: “Nkukakasa nti toidha kwitibwa.”

Daudi agemerwa Mefiboshethi ekivunika

²⁴ Agho Mefiboshethi mwidhukulu wa Saulo yaidha okusangaaza kyabazinga. Mefiboshethi oyo yaloba okunaaba ebigere, waire okumwa ebirevu, oba okwoza engoye dhe, okuva ku lunaku kyabazinga lwe yava mu Yerusalemu okutuusa lwe yaira nga ghaligho emiraala.

²⁵ Agho bwe yava e Yerusalemu okuja okusangaaza kyabazinga, kyabazinga yaamubuuza ati: “Mefiboshethi, lwaki tiwaja ninze?”

²⁶ Yaamwiramu ati: “Isebantu kyabazinga, nze omugheereza wo nga bwendi omulema, nakoba omugheereza wange nti, ‘Nteera ekintu ekityamibwaku ku ndogoyi, nvuge nje ni kyabazinga,’ aye omugheereza wange oyo yanguya.

²⁷ Era yaidha yandhogeraku nze omugheereza wo, yaakoba ebintu bitali bituufu eri iwe musengwa wange kyabazinga. Aye iwe Isebantu kyabazinga, oli ng'oti malaika wa Katonda. Kale kola kyonakyona ky'onaabona nga n'ekirungi,

²⁸ Ab'endhu ya lata wange twenatwena twali tugwaniire bwa kwitibwa iwe Isebantu kyabazinga, aye nze omugheereza wo wanta mu abo abalya ku kiiwulo kyo. Kabiri obukumu mbutoola gha okusaba Isebantu kyabazinga okunkolera ekisinga agho?”

²⁹ Agho kyabazinga yaamwiramu ati: “Ye lwaki odaaga okwongera ebingi bityo? Nze mmaze okusalagho nti iwe ni Ziba mwidha kugabana eitaka.”

³⁰ Mefiboshethi yaakoba kyabazinga ati: “Leka Zika atwale lyonalyona, kasita iwe Isebantu kyabazinga oize eka mu miraala.”

Daudi agemerwa Barazillai ekivunika

³¹ Agho Barazillai Omugileadi yaava e Rogelimu yaidha ku mwiga Yorudani, yaagherekeraku kyabazinga okusomoka.

³² Barazillai oyo yali musaadha mukaire inho, ng'agheza emyaka kinaana egy'obukulu. Yali mukombe inho, nga n'agha kyabazinga emere ekiseera kyonakyona kyabazinga oyo kye yamala e Mahanaimu.

³³ Kyabazinga yaamukoba ati: “Idha tuje n'iwe e Yerusalemu, ndidha kukulabiriranga.”

³⁴ Aye Barazillai yaakoba kyabazinga ati: “Nkaaliyo n'emyaka emeka egy'obulamu bwange eginsigula okuja n'iwe Isebantu kyabazinga e Yerusalemu?

³⁵ Buti ndi ku myaka kinaana (80) egy'obukulu. Nkaasobola okwawulagho ekisanhusa n'ekitasanhusa? Nze omugheereza wo nkaasobola okuwoomerwa bye ndi kulya oba bye ndi kunhwa? Nkaasobola okuwulirisa amamiro ag'abasaadha n'ag'abakazi abali kwemba? Kale lwaki nze omugheereza wo neeyongera ku mugugu gw'oli nagwo, iwe Isebantu kyabazinga?

³⁶ Nze omugheereza wo ndidha kukugherekeraku katono, nkusomose omwiga Yorudani. Kale onsasulira ki empeera eyaga agho?

³⁷ Nze omugheereza wo nkweghemba ondeke ndhireyo nfiire mu kibuga eky'ewaife, kumpi n'amagombe ga lata ni maama. Aye omugheereza wo Kimuhamu wuuyo, leka aje n'iwe Isebantu kyabazinga. Oidha kumukolera kyonakyona ky'onaabona nga kirungi.”

³⁸ Kyabazinga Daudi yairamu ati: “Ndidha kuja ni Kimuhamu era ndidha kumukolera kyonakyona ky'onaaba ng'oyenze mmukolere. N'iwe weena kyonakyona ky'onaayenda nkukolere, ndidha kukikukolera.”

³⁹ Agho abantu boonaboona baasomoka Yorudani, ni kyabazinga Daudi yeena yaasomoka. Kyabazinga yaanhwegera Barazillai, yaamusabira enkabi. Barazillai yairayo eka ewuwe.

Ab'omu kika kya Yuda n'Abaisiraeli bakaayanira kyabazinga

⁴⁰ Agho kyabazinga Daudi yaaja e Giligali ghalala ni Kimuhamu. Ab'omu kika kya Yuda boonaboona n'ekitundu ku Baisiraeli baamugherekera.

⁴¹ Abaisiraeli boonaboona baaja ye kyabazinga baamukoba bati: “Lwaki baganda baife ab'omu kika kya Yuda baakutwibaku ni bakusomosa omwiga Yorudani iwe Isebantu kyabazinga, n'ab'endhu yo, n'abantu boonaboona be wali nabo?”

⁴² Ab'omu kika kya Yuda bairamu Abaisiraeli bati: “Lwa kuba kyabazinga n'ife, tuli ba nda ndala. Kale lwaki ekyo kibasungughaza? Ghalighooku ekintu waire ekirala kiti ekya kyabazinga kye tuliire? Oba ghalighooku ekirabo kyonakyona ky'atughaire?”

⁴³ Abaisiraeli bairamu bati: “Ife tuli n'obukumu bwa mikuzi kikumi ku bwakyabazinga, okusinga imwe bwe muli nabwo. Era ni Daudi oyo waife inho okusinga bw'ali owaimwe. Kale lwaki mutunhoomerera? Ti niife abaasooka okuleeta ekidhuubo eky'okwiza kyabazinga waife?” Aye ab'omu kika kya Yuda bye baayogera byaba bikambwe okusinga eby'Abaisiraeli.