2 Samueli 18 - Baibuli Ekibono kya Katonda 2014

Abusalomu bamughangula era baamwita

¹ Agho Daudi yaabala abantu be yali nabo, yaabataaku abaduumizi ab'abaisirukale olukumi olukumi n'abaduumizi ab'abaisirukale ekikumi ekikumi.

² Yagabaniamu eigye mu bikunsu bisatu nga byagayaga: ekikunsu ekirala ku ebyo nga kiduumirwa Yoabu, ekindi kyaduumirwa Abishai mutabane wa Zeruia era muganda wa Yoabu, ate ekindi kyaduumirwa Ittai Omugitti. Era kyabazinga Daudi yaakoba abantu ati: “Ninze mwene zeena ndidha kuja n'imwe.”

³ Aye abantu baamukoba bati: “Busa, iwe otaja n'ife, kuba ife bwetunaalumuka abazigu tibaidha kutufaaku. Ni bwetunaafa abangi, nga ku buli bantu ababiri ababiri kufaaku omuntu mulala mulala, era abazigu tibaidha kufaayo. Aye iwe ovaamu ife omutwalo mulamba (10,000). Kale, ekisingaku bukalamu, niiwe okusigala mu kibuga n'otugheerezanga obuyambi.”

⁴ Kyabazinga Daudi yaabakoba ati: “Ndidha kukola kyonakyona kye mubona nga n'ekisinga byonabyona obukalamu.” Kale yaayemerera ku mbali kw'omulyango ogw'ekibuga, eigye lyonalyona lyafuluma nga liri mu bikunsu eby'abantu ekikumi ekikumi n'eby'abantu olukumi olukumi.

⁵ Kyabazinga Daudi yaalagira Yoabu, ni Abishai, ni Ittai, ati: “Ku lwange, omwisuka oyo Abusalomu mutamukolaku kabi koonakoona.” Abantu boonaboona baawulira nga kyabazinga Daudi agha abaduumizi ekiragiro ekyo, ekigema ku Abusalomu.

⁶ Kale eigye lya Daudi lyaja okulwana olutalo n'Abaisiraeli, era baalwanira mu kibira kya Efuraimu.

⁷ Abasaadha ba Daudi baaghangula Abaisiraeli ku lunaku olwo, baabaitamu abantu kamaala abaghera emitwalo ebiri (20,000).

⁸ Olutalo lwabunia ekiketezo ekyo kyonakyona, era ku lunaku olwo abantu abaafiira mu kibira baaba kamaala n'okusinga abaitibwa mu lutalo.

⁹ Agho Abusalomu yaayagaanana n'abasaadha ba Daudi nga takyetegekeire. Yali ali kuvuga enhumbu ye. Enhumbu eyo yaabita ghansi agh'ensaga enzibirivu edh'omuti omukologho einho, omutwe gwe gwalaalira mu nsaga edho. Yaasigala agho ng'ali kulengeedhera mu ibbanga, aye ng'enhumbu ye yali ali kuvuga ekaaja bwa buje.

¹⁰ Ghaabaagho omuntu eyabona, yaaja yaakobera Yoabu ati: “Bona eno, mboine Abusalomu ng'ali kulengeedhera mu muti omukologho!”

¹¹ Yoabu yaakoba omusaadha oyo ati: “Eki? Omuboine? Memale lwaki tomwitiireegho n'agwa ghansi? Nandisangaire inho, naakugha ebitundu bya feeza ikumi, n'olusibiro.”

¹² Aye omusaadha yairamu Yoabu ati: “Ni bwe nandibaire nga ngemye ku bitundu olukumi (1,000) ebya feeza, tyandighanze kugalula mukono okukola akabi mutabane wa kyabazinga. Twenatwena twawulira nga kyabazinga akulagira iwe ni Abishai, ni Ittai, ati, ‘Ku lwange, omwisuka oyo Abusalomu mutamukolaku kabi koonakoona.’

¹³ Kale nze bwe nandighemukiire kyabazinga ni nkola akabi ku mutabane we, ate nga ghazira kintu kyonakyona kighanga kugisibwa ku kyabazinga, olwo n'iwe mwene wandineefiireku.”

¹⁴ Yoabu yaakoba omusaadha ati: “Tiidha kumalira biseera byange ku iwe.” Kale yaatoola obusaale busatu, yaabulasa bwafumita Abusalomu mu kifuba ng'akaali mulamu mu muti omukologho.

¹⁵ Olwo abaisuka ba Yoabu ikumi abaamugemeranga eby'okulwanisa bye, beezungulula Abusalomu, baamukuba baamwita.

¹⁶ Agho Yoabu yaafuuwa eigwala, yaalekeza eigye okubingirira Abaisiraeli, lyavaayo lyaira.

¹⁷ Baatoola Abusalomu baamusuula mu gwina oguleeyi ogwali mu kibira omwo, baamubungaku emungo ey'amabaale enkologho. Abaisiraeli baalumuka buli muntu yaaja ewuwe.

¹⁸ Abusalomu ng'akaali mulamu yeezimbira empango mu Kiiko kya Kyabazinga, ng'akoba ati: “Nziraku mwana mulenzi ye banaidhukirirangaku eriina lyange.” Kale empango eyo yaagituuma eriina lye, era ni ye buli eno eyetebwa Ekiidhukizo kya Abusalomu.

Daudi bamubikira okufa kwa Abusalomu

¹⁹ Agho Ahimaazi mutabane wa Zadoki yaakoba ati: “Ka numukeku nje nkobere kyabazinga amawulire gano, nti Musengwa Katonda amuwoniiza abazigu be.”

²⁰ Aye Yoabu yaamukoba ati: “Busa, toidha kutwala mawulire ago lwaleero luno. Oghanga okugatwala olunaku olundi, aye olwaleero luno toidha kugatwala, kuba mutabane wa kyabazinga afiire.”

²¹ Agho Yoabu yaakoba Omukushi ati: “Ja okobere kyabazinga by'oboine.” Omukushi yaakuba amakiryaivu mu maiso ga Yoabu, olwamala yaaja ng'alumuka.

²² Ahimaazi mutabane wa Zadoki kabiri yaakoba Yoabu ati: “Ka kibe ki oba ki, zeena ka numuukirire Omukushi.” Yoabu yaamukoba ati: “Mwana wange, lwaki oli kwenda inho okulumuka ng'ate ghazira na mpeera y'oja kufuna lwa kutwala mawulire ago?”

²³ Ahimaazi yaakoba ati: “Ka kibe ki oba ki, ndidha kulumuka.” Yoabu yaamukoba ati: “Kale lumuka.” Ahimaazi yaalumuka ng'abitira mu kiketezo eky'oku museetwe, yaabisa Omukushi.

²⁴ Mu kiseera ekyo Daudi yali atyaime ghansi ghagati gh'emiryango egy'emikuzi ebiri egy'ekibuga, ogw'omunda n'ogw'oku luya. Agho omukuumi yaaniina ghaigulu ku mulyango okumpi n'ekimante. Yaja okulinga ati ng'abona omuntu ali kulumuka yenka.

²⁵ Omukuumi yaaba eyo yaalagiriza, yaakobera kyabazinga. Kyabazinga yaamukoba ati: “Bw'aba ng'ali yenka, ali n'amawulire amalungi g'aleese.” Agho omuntu yeeyongera okulumuka ng'ali kwidha bw'aseeta.

²⁶ Omukuumi yaabona omuntu owundi ng'ali kwidha ng'alumuka. Omukuumi oyo yaalagiriza yaakobera omwigazi w'omulyango ati: “Bona, eriyo omuntu owundi ali kulumuka yenka!” Kyabazinga yaakoba ati: “Oyo yeena ali kuleeta mawulire malungi.”

²⁷ Omukuumi yaakoba ati: “Ndi kubona ng'omuntu akulembeiremu alumuka ng'oti ni Ahimaazi, mutabane wa Zadoki.” Kyabazinga yaakoba ati: “Oyo muntu mukalamu era ali kuleeta mawulire malungi.”

²⁸ Ahimaazi olwatuuka ati, yaakoba kyabazinga mu mamiro ag'amaani ati: “Byonabyona biri miraala.” Bwe yamala yaakubira kyabazinga amakiryaivu era yaakutama n'ekyeni kyatuuka ku itaka. Yaakoba ati: “Musengwa Katonda wo asaakibwe, akughaire okughangula abantu abaakudheemera iwe Isebantu kyabazinga.”

²⁹ Kyabazinga yaamubuuza ati: “Omwisuka Abusalomu ali bukalamu?” Ahimaazi yairamu ati: “Yoabu bw'antumye nze omugheereza wo, mboine nga ghaligho akasasamalo ak'amaani aye nga tiidhi kye kaviireku.”

³⁰ Kyabazinga yaamukoba ati: “Ira eruuyi eno oyemerere eno.” Ahimaazi yaira eyo yaayemerera.

³¹ Agho Omukushi yaatuuka yaakoba ati: “Isebantu kyabazinga, nkuleeteire amawulire amalungi. Olwaleero luno Musengwa Katonda akughaire okughangula abantu abaakudheemera.”

³² Kyabazinga yaamubuuza Omukushi ati: “Omwisuka Abusalomu ali bukalamu?” Omukushi yaamwiramu ati: “Wo musengwa wange kyabazinga, ekyo ekituuse ku mwisuka oyo kigwananga kyatuuka ku bazigu bo, ni ku abo boonaboona abakudheemera ni bakukola akabi.”

³³ Agho kyabazinga enaku yaamugema ey'amaani. Yaaja ghaigulu mu kimante ekyali ku mulyango ogw'ekibuga, yaalira amaziga. Yaaja nga bw'alira ati: “Woowe omwana wange Abusalomu, omwana wange, omwana wange Abusalomu. Nze nandifiire mu kifo kyo. Woowe Abusalomu omwana wange, omwana wange!”