2 Samueli 17 - Baibuli Ekibono kya Katonda 2014

Hushai awubisawubisa Abusalomu

¹ Ebyo nga bikaali agho, Ahithofeli yaakoba Abusalomu ati: “Ka nondeyo abantu omutwalo mulala n'enkumi ibiri (12,000), nje nabo tubingirire Daudi obwire buno.

² Ndidha kumwagaana ng'akaali mukoowu inho era ng'awoiremu amaani. Olwo mmuleetere okutya einho, n'abantu boonaboona baali nabo balumukegho memale ndhite kyabazinga mwene yenka.

³ Nga mmaze ekyo, ndidha kwiza y'oli abantu boonaboona b'ali nabo, ng'oti n'omugole omukazi bw'aira ewa iba. Iwe y'oyenda okwita ali mulala yenka, olwo abantu abandi boonaboona basigale nga bali miraala.”

⁴ Abusalomu n'abakulembeze mu Isiraeli boonaboona, baasiima amagezi ago Ahithofeli ge yagha.

⁵ Abusalomu yaakoba ati: “Mundhetere Hushai Omuaraki, tuwulire yeena ky'akoba.”

⁶ Hushai bwe yatuuka, Abusalomu yaamukoba ati: “Ahithofeli akobye ati n'ati. Tukole nga bw'akobye oba busa? Bw'oba okoba oti tutakola tutyo, iwe tukobere bwe tube tukole.”

⁷ Hushai yairamu Abusalomu ati: “Ku mukuzi guno amagezi Ahithofeli g'aghaire ti malungi.”

⁸ Hushai era yaayongeraku ati: “Okiidhi nga lata wo n'abasaadha be ba maani agataloodheka, ate nga bali n'obusungu ng'oti n'ekisolo ekikambwe ekitooleibwaku ebyana byakyo. N'ekindi lata wo eby'entalo abiidhi inho, taidha kutenduka ghalala na bantu.

⁹ Bona eno, ni saawa eno yeene aghanga okuba nga yeegisiisa mu biina oba okwegisa aghantu aghandi. Era ku bantu abaife bwe kunaabaaku abafa mu lulumba olusooka, kiisi anaakiwulira aidha kukoba ati, ‘Abantu ab'oku luuyi lwa Abusalomu baitiibwa inho.’

¹⁰ Olwo n'omulwani mwene aziramu ntete, ali n'omwoyo omugumu ng'oti gwa mpologoma, aidha kutekemuka atye kuba abantu boonaboona mu Isiraeli baidhi nga lata wo mulwani wa maani era nga n'abantu baali nabo balwani beene abaziramu ntete.

¹¹ Kale nze mpa amagezi gano: soloza Abaisiraeli boonaboona okuva e Dani okutuuka e Beerisheba, babe kamaala ng'oti musenho gwa ku nhandha, olwo iwe mwene oje nabo mu lutalo aghazira kutuma.

¹² Twidha kumutuukaku woonawoona gh'anaaba, tumugweku ng'oti n'omusulo bwe gugwa ku isubi. Era agho mwene, n'abantu boonaboona b'ali nabo twidha kubaita aghazira kulekagho waire omulala ati.

¹³ Bw'anaalumukira mu kibuga, Abaisiraeli boonaboona baidha kuta emigugha ku kibuga ekyo tukikwekwebye okukituusa mu kiiko tukimaliregho irala ghalobe kusigalagho kabaale waire akalala kati.”

¹⁴ Agho Abusalomu n'Abaisiraeli boonaboona baakoba bati: “Amagezi ga Hushai Omuaraki malungi okusinga aga Ahithofeli.” Musengwa Katonda yali asazeegho ng'aja kubaleetera balobe kukolera ku magezi amalungi Ahithofeli ge yagha, mu nsambo eyo aleete akabi ku Abusalomu.

Daudi bamulabula yaalumukagho

¹⁵ Agho Hushai yaakobera Zadoki ni Abiathari bakabona, amagezi mwene ge yagha Abusalomu n'abakulembeze mu Isiraeli, n'ago Ahithofeli ge yabagha.

¹⁶ Hushai oyo yaayongeraku ati: “Buti ni mwangughe mugheereze Daudi obukwenda nga mumukoba muti, ‘Obwire bwaleero mutasula mu bifo eby'omu irungu omwiga ghe gusomokerwa, aye musomoke mweyongereyo, kuba iwe Isebantu kyabazinga n'abantu boonaboona b'oli nabo, abazigu basobola okubalumba baabasaaniagho.’ ”

¹⁷ Mu kiseera ekyo Yonathani mutabane wa Abiathari ni Ahimaazi mutabane wa Zadoki, baali bateegereire nga bali mu kifo ekyetebwa Enirogeli, kuba baali tibenda bantu kubabona nga baingira mu kibuga. Omugheereza omughala n'eyabatwaliranga obukwenda, ni baja bakobera kyabazinga Daudi.

¹⁸ Aye ghaabaagho omwisuka eyababona, yaaja yaakobera Abusalomu. Agho bombi baavaagho mangu, baaja baatuuka e Bahurimu ku ndhu ey'omusaadha eyali n'ensulo okumpi n'endhu ye baika mu nsulo omwo.

¹⁹ Omukazi yaaghemba ekintu ku munwa ogw'ensulo eyo, ekintu ekyo yaakifukaku emere ey'empeke era yaagyandhalamu. Ghaaloba kubaagho kimanhikaku naire.

²⁰ Abagheereza ba Abusalomu bwe baidha ni batuuka ku ndhu eyo, baabuuza omukazi oyo bati: “Ahimaazi ni Yonathani bali gha?” Omukazi yaabairamu ati: “Basomoike akaiga baaja.” Agho baabanoonia aye baaloba kubabona, kale bairayo e Yerusalemu.

²¹ Abo bwe baamala okuja, Ahimaazi ni Yonathani baavaayo mu nsulo, baaja baatwalira kyabazinga Daudi obukwenda. Baamukoba bati: “Musitukiremu mangu musomoke omwiga, kuba Ahithofeli aghaire Abusalomu amagezi ag'okubalwanisa, ati n'ati.”

²² Kale Daudi yaasitukiramu ni boonaboona be yali nabo, baasomoka omwiga Yorudani. Obwire bwaja okusansaana nga ghaziragho akaali kusomoka.

²³ Ahithofeli bwe yabona ng'amagezi ge tibagajiiriireeku, yaata ku ndogoyi ye ekintu ekityamwaku yairayo eka mu kibuga eky'ewaibwe. Yaatereeza eby'omu ndhu ye, memale yeetuga. Baamuziika mu lwambiidhi lwa badhaadha be.

²⁴ Agho Daudi yaatuuka e Mahanaimu, eno nga Abusalomu bw'asomoka omwiga Yorudani n'Abaisiraeli boonaboona.

²⁵ Abusalomu yali nga yalonda Amasa okukulira amagye ng'aira mu kifo kya Yoabu. Amasa oyo yali mutabane w'omusaadha eyayetebwanga Ithura Omuishimaeli, eyali afumbiirwa Abigaili mughala wa Nahashi, era muganda wa Zeruia eyazaala Yoabu.

²⁶ Agho Abusalomu oyo n'Abaisiraeli, baasimba weema dhaibwe mu kiketezo ky'e Gileadi.

²⁷ Daudi bwe yaatuuka e Mahanaimu, Shobi mutabane wa Nahashi ow'e Rabba eky'Abammoni, ni Makiri mutabane wa Ammieli ow'e Lodebari, ni Barazillai Omugileadi ow'e Rogelimu,

²⁸ baaleeta ebyebwiko, ebbakuli, ebibya n'entamu, engaano, sayiri, obuwunga, emere ey'empeke enkalange, ebidhandhaali, empindi,

²⁹ omudheenene ogw'endhuki, amata amasaadhe, entaama, omuzigo omugemu. Ebyo byonabyona baabireetera Daudi n'abantu boonaboona be yali nabo, nga bakoba mule bati: “Abantu buti endhala n'endiwo biri kubaluma, ate nga bakoowu eyo mu irungu ye bali.”