2 Samueli 16 - Baibuli Ekibono kya Katonda 2014

Daudi ni Ziba

¹ Kyabazinga Daudi bweyali ng'amaze okubitaku akabanga katono ku mutwe gw'olusozi, yayagaanana ni Ziba omugheereza wa Mefiboshethi. Yali n'endogoyi ibiri edhiriku ebintu ebityamibwaku, nga dheetwise emigaati ebikumi bibiri, n'obufaaganda kikumi obw'emizabbibu emikaze, n'ebifaaganda kikumi eby'ebibala ebisookereza okwenga, n'ensagho ey'oluwu ey'omwenge ogw'emizabbibu.

² Kyabazinga Daudi yaabuuza Ziba ati: “Bino byonabyona oleese byaki?” Ziba yaamwiramu ati: “Endogoyi dha ba mu ndhu yo iwe Isebantu kyabazinga, batambulirengaku. Emigaati n'ebibala ebisookereza okwenga bya baisuka bo kulya. Omwenge ogw'emizabbibu gw'abo abanaazirikanga mu irungu kunhwangaku.”

³ Kyabazinga Daudi yaamubuuza ati: “Ate musengwa wo Mefiboshethi mwidhukulu wa Saulo ali gha?” Ziba yaamwiramu ati: “Asigaireyo mu Yerusalemu ng'akoba ati, ‘Olwaleero Abaisiraeli baidha kundhiriza obwakyabazinga obwali obwa dhaadha wange.’ ”

⁴ Kyabazinga yaakoba Ziba ati: “Byonabyona ebibaire ebya Mefiboshethi, mperaano bifuuse bibyo.” Ziba yaamukoba ati: “Isebantu kyabazinga, nkutaamu ekinhagansi! Era ngwananga naakola ebikusiimya buliidho.”

Daudi ni Shimei

⁵ Kyabazinga Daudi bwe yatuuka e Bahurimu, ghaabaagho omusaadha ow'oku lulyo lwa Saulo nga bamweta Shimei mutabane wa Gera. Omusaadha yaidha nga bw'avuma kyabazinga Daudi oyo aghazira kusalaku.

⁶ Yaakonhoogerera kyabazinga Daudi oyo amabaale n'abagheereza be boonaboona, n'abantu boonaboona, n'abasaadha ab'amaani abaamuba ku luuyi olw'omukono gwe omusaadha ni ku lw'omugooda.

⁷ Shimei oyo yaavuma Daudi ati: “Ja, ja! Omusaadha omutemo iwe era aziraku ky'agasa!

⁸ Musengwa Katonda akwesasuuliizaaku olw'okwita ab'endhu ya Saulo, era n'omunhagaku obwakyabazinga bwe. Buti Musengwa Katonda obwakyabazinga obwo abughaire Abusalomu mutabane wo, era iwe otuuse okuzikirira olw'okuba omutemo.”

⁹ Agho Abishai mutabane w'omukazi eyayetebwanga Zeruia, yaakoba kyabazinga Daudi ati: “Lwaki eno embwa obubwa enfu ekuvuma, iwe Isebantu kyabazinga? Ndeka mmujiire, mmutemeku omutwe.”

¹⁰ Aye kyabazinga Daudi yaakoba Abishai ati: “Mundeke, imwe batabane ba Zeruia. Musengwa Katonda bw'aba nga n'amukobye ati, ‘Vuma Daudi’, naani aghanga okumubuuza ati, ‘Lwaki okoze otyo?’ ”

¹¹ Agho Daudi yaakoba Abishai oyo n'abagheereza be boonaboona ati: “Bona eno, ate oba mutabane wange mwene ayenda kundhita, me kitasi Omubenjamini oyo! Mumuleke avume, kuba Musengwa Katonda n'amulagiire.

¹² Oba katyo Musengwa Katonda anaalingirira okudaagadaaga kwange, yansasulamu ebirungi mu kuvumibwa kwange kuno olwaleero luno.”

¹³ Kale Daudi n'abasaadha be beeyongerayo nga batambulira mu luguudo, ng'eno Shimei bw'abanonereza ng'atambulira ku mbali kw'olusozi. Yeeyongera okuvuma kyabazinga Daudi, eno nga bw'amukonhoogerera amabaale, n'okumusuulaku enkungu.

¹⁴ Kyabazinga Daudi n'abantu be yali nabo, baatuuka ku mwiga Yorudani nga bakoowu inho, baawuumuliraku eyo.

Abusalomu ng'ali mu Yerusalemu

¹⁵ Agho Abusalomu ng'ali ni Ahithofeli era n'Abaisiraeli be yali nabo, baaja e Yerusalemu.

¹⁶ Hushai Omuaraki, mukagwa wa Daudi, bwe yaja ye Abusalomu, yaakoba Abusalomu ati: “Ghangaala kyabazinga! Ghangaala Kyabazinga.”

¹⁷ Abusalomu yaakoba Hushai ati: “Obwesigwa bwo eri mukagwa wo Daudi bwaja gha? Lwaki tiwaja naye?”

¹⁸ Hushai yaamwiramu ati: “Busa, ndidha kubanga ku luuyi olw'oyo Musengwa Katonda y'alonze, era n'abantu bano boonaboona Abaisiraeli ye balonze. Kale nze ndidha kubanga ghalala n'iwe.

¹⁹ Ate n'ekindi, naani owundi ye ngwaniire okugheereza okutoolaku mutabane wa musengwa wange? Nga bwe nagheerezanga lata wo, era ntyo weena bwe ndidha okukugheerezanga.”

²⁰ Agho Abusalomu yaakoba Ahithofeli ati: “Buti tughe ku magezi. Tukole ki?”

²¹ Ahithofeli yaamwiramu ati: “Ja obe ni baka lata wo ab'embali mu buliri, be yaleka okukuuma ekisaagaati eky'obwakyabazinga. Olwo Abaisiraeli boonaboona bwe banaakiwulira, baidha kukitegeera bati ofuuse muzigu eri lata wo. Ekyo kireetere abantu abali n'iwe okweyongeramu amaani.”

²² Kale baasimbira Abusalomu eweema ghaigulu ku ngulu kw'endhu ya kyabazinga, yaaja yaaba ni baka lata we ab'embali mu buliri, ng'Abaisiraeli boonaboona babona.

²³ Mu biseera ebyo amagezi goonagoona Ahithofeli ge yaghanga ng'abantu bagatwala ng'oti n'ole ge yeebuuziiza ku Katonda. Daudi ni Abusalomu boona batyo bwe baagatwalanga okuba.