2 Samueli 15 - Baibuli Ekibono kya Katonda 2014

Abusalomu ategeka okudheemera kyabazinga

¹ Ebyo bwe byawa, Abusalomu yaategeka ekigaali eky'omu lutalo, n'embalaasi, n'abasaadha makumi ataanu ab'okumukuumanga.

² Abusalomu oyo yaawuunanga, yaayemerera ku ngira aghali omulyango ogwingira mu kibuga. Omuntu yeenayeena eyaidhanga ng'ali n'ensonga yaayenda kyabazinga awulire, Abusalomu oyo ng'amweta yaamubuuza ati: “Oviira mu kibuga ki?” Ole bweyamwirangamu ati: “Nze omugheereza wo ndi wa mu kika lebe eky'omu Isiraeli,”

³ nga Abusalomu amukoba ati: “Ensonga dho nungi era ntuufu, aye ghazira muntu kyabazinga ye yataagho kudhiwulira.”

⁴ Abusalomu oyo era yaayongeraku ati: “Kale nguli nali mulamuzi mu nsi yaife! Olwo buli muntu eyandibairenga n'omusango oba ensonga yoonayoona, yandiidhienga ye ndi, naamusaliranga mu mazima.”

⁵ Era omuntu bwe yaseetanga eri Abusalomu oyo okumukubira amakiryaivu, ng'Abusalomu agolola omukono ng'amugema era ng'amunhwegera.

⁶ Abusalomu yaakolanga atyo ku buli Muisiraeli yeenayeena eyaidhanga ye kyabazinga okumumalira ensonga dhe. Mu nsambo eyo yaaleetera Abaisiraeli okukyuka, baamwikiririzaamu.

⁷ Bwe ghaabitagho emyaka ena, Abusalomu yaakoba kyabazinga Daudi ati: “Nkweghemba ondhikirize nje e Heburoni ntuukirize obweyamo bwange bwe neeyama eri Musengwa Katonda.

⁸ Nze omugheereza wo bwe nali nga nkaali e Geshuri mu Aramu, neeyama nti, ‘Bwenebwene Musengwa Katonda bw'alindhizaayo e Yerusalemu, ndimusinziza mu Heburoni.’ ”

⁹ Kyabazinga Daudi yaamukoba ati: “Ja miraala.” Kale Abusalomu yaasitula yaaja e Heburoni.

¹⁰ Aye yaagheereza abakwenda mu ngiso mu bika bya Isiraeli byonabyona, ng'akoba ati: “Kasita muwulira nga bali kufuuwa amagwala, nga mukoba muti, ‘Abusalomu ni kyabazinga mu Heburoni.’ ”

¹¹ Mu kuva e Yerusalemu, abantu ebikumi bibiri n'abaaja ni Abusalomu e Heburoni ng'abageni abeete. Baaja mu mwoyo mulungi, nga bazira kye baidhi ku ntegeka dhe.

¹² Era Abusalomu bweyali ali kughaayo emisengo, yaayetesa Ahithofeli Omugiloni eyabanga mu kibuga Gilo, nga yali muwi wa magezi owa Daudi. Agho abantu abaali ku luuyi lwa Abusalomu baaja nga beeyongera obungi, n'olukwe lweyongeramu amaani.

Daudi alumuka mu Yerusalemu

¹³ Ghaabaagho omukwenda eyaja n'akobera Daudi ati: “Abaisiraeli bakuviireku baize ku luuyi lwa Abusalomu.”

¹⁴ Agho Daudi yaakoba abagheereza be boonaboona be yali nabo e Yerusalemu ati: “Musitukiremu mukole tulumuke, tiikulwa nga tubulwa engeri ey'okuwonamu Abusalomu. Mwangughe tuveegho, atatwagaana n'atukolaku kabi, n'aita na bantu ba mu kibuga boonaboona.”

¹⁵ Abagheereza ba kyabazinga baamukoba bati: “Isebantu kyabazinga, ife abagheereza bo tuli beetegefu okukola kyonakyona iwe musengwa waife ky'onaaba ng'osazeegho.”

¹⁶ Kale kyabazinga Daudi yaalumuka mu Yerusalemu n'ab'omu ndhu ye boonaboona. Aye yaalekayo bakazi be ab'embali ikumi, baakuuma ekisaagaati kye eky'obwakyabazinga.

¹⁷ Kyabazinga yaava mu kibuga ng'abantu boonaboona bali kumunonereza, yaaja yaatuuka ku ndhu esembayo, yaayemerera.

¹⁸ Abagheereza be boonaboona baamubitaku. N'abaamukuumanga Abakerethi n'Abapelethi boonaboona baamubitaku. N'abalwani boonaboona olukaaga (600) Abagitti, abaamunonereza ng'ava e Gathi, boona baamubitaku.

¹⁹ Agho kyabazinga Daudi yaakoba Ittai Omugitti ati: “Lwaki weena oli kuja n'ife? Irayo, obe eyo ni kyabazinga omuyaaka, kuba iwe oli musenze busenze eyaidha okufuna obubudamo.

²⁰ Waakaidha bwidhe muno, kale lwaki mperaano nkutambuzatambuza eyo ntyo nga tiidhi ni ye nja? Busa, irayo otwale ni Bagitti baino. Nsaba Musengwa Katonda abagonzenga obutalekera era abenga mwesigwa ye muli.”

²¹ Aye Ittai yairamu kyabazinga Daudi ati: “Ndayira mu Musengwa Katonda omulamu, era naakulayirira Isebantu kyabazinga, nti buli y'onaajanga zeena yeenaajanga, ni bwe kinaabanga nga kyetaagisa kufa.”

²² Agho kyabazinga Daudi yaakoba Ittai ati: “Kale bitagho, oje.” Ittai Omugitti yaabitagho n'abasaadha be yali nabo boonaboona, n'abaana baibwe boonaboona be baali nabo.

²³ Abantu boonaboona baalira nga bawowoola, nga kyabazinga Daudi n'abantu be yaja nabo bali kubita. Kyabazinga n'abantu boonaboona be yali nabo, baaja baasomoka akaiga Kiduroni, beeyongerayo nga boolekeire eirungu.

²⁴ Agho Abiathari yaidha, era okuja okubona nga ni Zadoki kabona yeena aidha n'Abalevi boonaboona nga babbeedie Esanduuku ey'Endagaano ya Katonda. Baisa ghansi Esanduuku ey'Endagaano, okutuusa abantu boonaboona bwe baamala okuva mu kibuga.

²⁵ Agho kyabazinga Daudi yaakoba Zadoki ati: “Mubbeede Esanduuku ey'Endagaano ya Katonda mugiizeeyo mu kibuga. Musengwa Katonda bw'aliba angemeirwa ekivunika, alindhiza naagibonaku, naabona n'ekifo kyayo mw'eba.

²⁶ Aye bw'alinkoba ati, ‘By'okola tibisiima,’ kale nze ndigho, alinkola mwene ky'alibona nga n'ekingwaniire.”

²⁷ Kyabazinga Daudi era yaakoba Zadoki kabona ati: “Bona eno, irayo mu kibuga n'emiraala, ghalala ni mutabane wo Ahimaazi, ni Yonathani mutabane wa Abiathari.

²⁸ Nze ndidha kusigala nga nteegereire mu kifo omwiga ghe gusomokerwa okuja mu irungu, okutuusa lwe ndifuna obukwenda obuva y'oli okunkobera ebiriyo.”

²⁹ Kale Zadoki ni Abiathari baatwala Esanduuku ey'Endagaano ya Katonda e Yerusalemu, era baasigala eyo.

³⁰ Daudi yaaja ng'ali kulira amaziga, yaaniinaniina Olusozi olw'Emiti Emyoliva nga yeeghembereire omutwe olw'okunakughala, era ng'ali mu bigere byereere. Ni be yali nabo boonaboona baaja nga bali kulira amaziga, baaniinaniina nga beeghembereire emitwe.

³¹ Agho ghaabaagho abaakobera Daudi bati: “Ahithofeli ali mu abo abakudheemeire abali ni Abusalomu.” Daudi bwe baamukobera, yaasaba ati: “Wo Musengwa Katonda, nkweghembye fafaagania amagezi Ahithofeli g'anaagha Abusalomu, gafuukemu busiru.”

³² Daudi bwe yatuuka ku ngulu ku lusozi kwe baasinzizanga Katonda, yaja okulinga ati ng'abona Hushai Omuaraki ng'ali kwidha y'ali. Yali akanwiremu ekivaalo kye era ng'omutwe gwe agusiize eitaka.

³³ Daudi yaamukoba ati: “Bw'onaaja ninze ozira ky'oidha kuunhambamu naire.

³⁴ Aye bw'onairayo mu kibuga n'okoba Abusalomu oti, ‘Isebantu kyabazinga, ndidha kuba mugheereza wo nga bwe mbairenga omugheereza wa lata wo mu biseera ebibise, era ntyo bwe ndidha okuba omugheereza wo mperaano,’ olwo oidha kuunhamba okutakania amagezi Ahithofeli g'agha.

³⁵ Bakabona Zadoki ni Abiathari baidha kuba eyo n'iwe. Kale kyonakyona ky'onaabanga ng'owuliire mu ndhu ya kyabazinga oidha kukikoberanga abo.

³⁶ Era abo bali eyo ni batabane baibwe: Ahimaazi nga ni mutabane wa Zadoki ate Yonathani yaaba mutabane wa Abiathari. Kale abo be mwidhanga okutuma, bandeeterenga amawulire goonagoona ge munaawuliranga.”

³⁷ Kale Hushai mukagwa wa Daudi, yairayo mu kibuga Yerusalemu era yaatuukayo nga ni Abusalomu ali kwingira ati.