2 Samueli 13 - Baibuli Ekibono kya Katonda 2014

Amunoni ni Tamari

¹ Abusalomu mutabane wa Daudi yali ni mwanhina aboneka obulungi einho, ng'ayetebwa Tamari. Bwe ghaabitaghooku ekiseera, Amunoni mutabane wa Daudi owundi yeegomba Tamari oyo.

² Ekyo kyaleetera Amunoni oyo obulumi bungi, yaalwala n'okulwala olw'okwenda einho mwanhina oyo Tamari kuba Tamari yali mughala mwegha, kale nga Amunoni abona nga ghazira gh'amutuukiraku.

³ Aye Amunoni yali ni mukagwa we nga bamweta Yonadabu mutabane wa Shimea, nga Shimea oyo yali muganda wa Daudi. Yonadabu oyo yali musaadha agetageta ebintu einho ng'amagezi tigamuwaaku.

⁴ Agho yaakoba Amunoni ati: “Iwe omwana owa kyabazinga, lwaki oba nga agho ng'oli munakughavu buli kaakyeire? Lwaki tonkoberaku kizibu kyo?” Amunoni yaamwiramu ati: “Neegomba inho Tamari mwanhina wa muganda wange Abusalomu.”

⁵ Yonadabu yaamukoba ati: “Lambaala ku buliri bwo weefuule okuba omulwaire. Lata waimwe bw'anaidha okukubona, oidha kumukoba oti, ‘Nkusaba, mwanhinaze Tamari aidhe ampe ku mere ndyeku. Nhenda aidhe afumbire ghano ghe ndi nga mmubona, andeetere emere ghano mwene mu ngalo dhe, ndye.’ ”

⁶ Kale Amunoni yaalambaala, yeefuula okuba omulwaire. Kyabazinga bwe yaja okumubona, Amunoni yaamukoba ati: “Nkusaba, mwanhinaze Tamari aidhe anfumbire yo emigaati ghano ghe ndi, agindeetere ghano mwene mu ngalo dhe, ndye.”

⁷ Agho Daudi yaayetesa Tamari ng'amukoba ati: “Ja mu ndhu ya mwanhoko Amunoni omufumbire ku mere.”

⁸ Tamari yaaja mu ndhu ya mwanhina Amunoni mwe yali ng'alambaire. Yaatoola engaano, yaagikanda, yaagikolamu emigaati nga Amunoni ali kumubona, yaamala yaagifumba.

⁹ Yaaja yaiwulira agho mu maiso ga Amunoni emigaati gyonagyona egyali mu ntamu ye yafumbamu. Aye Amunoni yaaloba kugirya, era yaakoba ati: “Koba abantu boonaboona bave ghe ndi.” Kale abantu boonaboona baava gh'ali.

¹⁰ Agho Amunoni yaakoba Tamari ati: “Leeta eno eby'okulya mu kisenge, iwe mwene ompe ndye.” Tamari yaatoola emigaati gye yafumba, yaagitwala mu kisenge eri Amunoni mwanhina.

¹¹ Aye bwe yagiseesa kumpi naye alye, Amunoni yaamugema omukono, yaamukoba ati: “Mwanhinaze, idha obe ninze mu buliri.”

¹² Tamari yaamwiramu ati: “Busa mwanhinaze, otankaka, kuba ekintu ng'oti n'ekyo tikikolebwa mu Isiraeli. Otakola kintu ekyo kya budankaanu.

¹³ Nze nzira ye ndija nga mmaze okuswala ntyo. Ate iwe oidha kutwalibwanga ng'omudankaanu mu Isiraeli. Kale ni nkweghembye yogera ni kyabazinga, taidha kukundobera.”

¹⁴ Aye Amunoni yaaloba kumuwulirisa, era olw'okuba yali amusinga amaani, yamukaka yaaba naye mu buliri.

¹⁵ Agho Amunoni yaakyagha Tamari yaabitiriza, kuba ensambo ye yamukyaghamu yasingira ghala inho okwegomba kwe yamwegombangamu mu kusooka. Era yaamukoba ati: “Situkiramu oje!”

¹⁶ Aye Tamari yaamukoba ati: “Busa mwanhinaze, okunsindiikiriza otyo kibi inho okusinga kire ky'osoose okunkola.” Aye Amunoni yaaloba kumuwulirisa,

¹⁷ yaayeta omwisuka amugheereza yaamukoba ati: “Toola ghano omukazi ono omufulumye kuliya, omale osibegho olwigi.”

¹⁸ Tamari yali avaire ekivaalo kireeyi nga kya mikono mireeyi, kuba baghala ba kyabazinga abaalinga nga bakaali beegha, batyo bwe baavaalanga mu biseera ebyo. Kale omugheereza yaafulumya Tamari kuliya, yaamala yaasibagho n'olwigi.

¹⁹ Tamari yeemansira eivu mu mutwe, yaakanulamu ekivaalo kye ekireeyi kye yali avaire, yeetwika emikono gye yaaja ng'ali kuwowoola.

²⁰ Abusalomu mwanhina bwe yamubona, yaamubuuza ati: “Mwanhoko Amunoni abaire n'iwe mu buliri? Mwanhinaze, iwe sirika. Ekyo kitakunakughaza inho, kuba oyo mwanhoko.” Kale Tamari yaabanga ewa Abusalomu mwanhina nga munakughavu.

²¹ Kyabazinga Daudi bwe yawulira ebintu ebyo byonabyona, yaasungughala ebitaloodheka.

²² Abusalomu yaakyagha Amunoni olw'okukaka Tamari mwanhina, era nga tayogera kintu ni Amunoni oyo, ka kibe ekirungi oba ekibi.

Abusalomu yeesasuuza

²³ Nga ghabiseegho emyaka ebiri emiramba, Abusalomu yaafuna abantu baamusalira ku ntaama dhe ebiviiri e Baali Hazori okumpi ni Efuraimu. Abusalomu oyo yaayeta batabane ba kyabazinga boonaboona ku mukolo ogwo,

²⁴ era yaaja ye kyabazinga yaamukoba ati: “Bona eno, nze omugheereza wo ndi n'abasala ku ntaama ebiviiri, kale nkweghemba Isebantu kyabazinga n'abagheereza bo, mwidhe tuje ninze omugheereza wo.”

²⁵ Aye kyabazinga yaakoba Abusalomu ati: “Mwana wange titwidha kwidha twenatwena, kuba tughanga okukuzitoogherera einho. Abusalomu yaakanda kumwegayirira, nga kyabazinga Daudi alobye. Aye kyabazinga Daudi yaamusabira enkabi.”

²⁶ Abusalomu yaamukoba ati: “Kale ni nkweghemba omale gaganha muganda wange Amunoni aje n'ife.” Kyabazinga yaamubuuza ati: “Lwaki aidha n'imwe?”

²⁷ Aye Abusalomu yeegayirira kyabazinga okutuusa bwe yaleka Amunoni ni batabane ba kyabazinga abandi boonaboona okuja ni Abusalomu.

²⁸ Agho Abusalomu yaalagira abagheereza be ati: “Mugenderere Amunoni gh'anaabeera ng'atamiire omwenge, nze ndidha kubalagira nti, ‘Mumufumite’, ng'olwo mumwita. Mutatya, kuba ninze naaba mbalagiire. Mugume emyoyo, mutabaamu ntete naire.”

²⁹ Kale abagheereza ba Abusalomu baakola nga bwe yabalagira, baita Amunoni. Agho batabane ba kyabazinga abandi baasitukiramu, buli muntu yaaniina enhumbu ye yaalumukagho.

³⁰ Bwe baali bakaali mu ngira, olubono lwatuuka ku Daudi nga lukoba luti: “Abusalomu aise batabane bo boonaboona, era ghazira awoniegho!”

³¹ Agho kyabazinga yaasituka yaakanulamu ebivaalo bye olw'okunakughala, yalambaala ku itaka. N'abagheereza be abaali naye agho, boona baakanulamu ebivaalo byaibwe.

³² Aye Yonadabu mutabane wa Shimea, nga Shimea oyo yali muganda wa Daudi, yaakoba ati: “Isebantu kyabazinga, otadhuuba oti baise abaisuka batabane bo boonaboona. Amunoni yenka n'afiire, kuba Abusalomu abairenga ng'aboneka okuba omumalirivu okumwita, kasookanga Amunoni oyo akaka Tamari mwanhina.

³³ Agho ni musengwa wange kyabazinga, otakitwala inho oti batabane bo boonaboona bafiire, kuba Amunoni yenka n'afiire.”

³⁴ Ebyo byabanga nga biri kubaagho, ate ng'ere Abusalomu alumwike. Mu kiseera ekyo, omwisuka eyali ku gw'okukuuma, yaja okulinga ati ng'abona abantu kamaala bali kwidha nga baviira mu luguudo oluva e Horonaimu ku mbali okw'olusozi.

³⁵ Yonadabu yaakobera Kyabazinga ati: “Musengwa Katonda wange, bona ere! Batabane bo batuuse. Nze omugheereza wo kye nkobye kituukiriire.”

³⁶ Olwamala okwogera ati, nga batabane ba kyabazinga batuuka. Bwe baatuuka baakuba empungu, baalira inho. Ni kyabazinga ghalala n'abagheereza be, boona baagegenga.

³⁷ Abusalomu yalumuka, yaaja ewa kyabazinga Talumai ow'e Geshuri mutabane wa Ammihudi. Kyabazinga Daudi yaaliranga mutabane we buli lunaku.

³⁸ Abusalomu bwe yalumuka n'aja e Geshuri, eyo yamalayo entangama ya myaka esatu.

³⁹ Aye kyabazinga Daudi bwe yamala okwenaliza olw'okufiirwa Amunoni, omwoyo gwamulumira mutabane we Abusalomu.