2 Samueli 12 - Baibuli Ekibono kya Katonda 2014

Nathani aleetera Daudi obukwenda, Daudi yeenenia

¹ Agho Musengwa Katonda yaatuma Nathani omulanzi ye Daudi. Yaaja yaamukoba ati: “Ghaaligho abantu babiri mu kibuga kirala, owundi nga mukombe ate owundi yaaba mwavu.

² Omukombe yali n'ebyayo kamaala: entaama, n'embuzi, n'ente.

³ Aye omwavu ng'azira kantu, okutoolaku akataama akaluusi ke yagula. Akataama ako ng'akalabirira era nga kaba ghalala n'abaana be. Nga kalya ku mere ye yalyangaku, kaanhweranga ku kikopo kye, era yaakaleranga nga kali ng'oti mwana y'ali.

⁴ Lwali lulala omugeni omubise yaidha ew'omukombe oyo. Omukombe yaaloba kwenda kwitaku endala ku nte dhe, oba ku mbuzi dhe, waire ku ntaama dhe, afumbire omutambuze oyo eyaidha ewuwe. Aye yaatoola akataama akato ak'ole omwavu, yaakaitira omubise oyo.”

⁵ Agho obusungu bwa Daudi bwatumbukira ku muntu oyo ng'oti muliro. Yaakoba Nathani ati: “Ndayira Musengwa Katonda omulamu nti omuntu eyakola ekintu ekyo agwaniire kufa.

⁶ Era ateekwa okuliyira omwavu oyo entaama ina, olw'akataama ke akato ako kuba ekyo kye yakola yakikola ng'azira kusaasira.”

⁷ Agho Nathani yaakoba Daudi ati: “Niiwe omuntu oyo. Era Musengwa Katonda wa Isiraeli akoba ati, ‘Nakusiiga omuzigo obe kyabazinga wa Isiraeli, naakuwonia omuzigu wo Saulo.

⁸ Naakugha endhu ya musengwa wo oyo Saulo, n'abakazi be naabakugha babe babo. Era naakugha okufuga abantu Abaisiraeli n'aba Yuda boonaboona. Ebyo bwe byandibaire nga tibikumala nandikwongeireku ebindi kamaala ebyaga n'ebyo obungi nga bya mikuzi ebiri.

⁹ Lwaki wanhooma ebiragiro bya Musengwa Katonda, n'okola ebibi y'ali? Waita Uria Omuhitti nga weeyambisa Abammoni, waatoola mukazi we waamufuula wuwo.

¹⁰ Kale ni mu b'endhu yo timuja kulekera kubangamu aitibwa, kuba onnhoomye nze waatwala muka Uria Omuhitti waamufuula mukazi wo.’

¹¹ Musengwa Katonda oyo era akoba ati, ‘Bona eno, ndidha kuleetera omuntu ow'omu ndhu yo mwene, akutuuseeku akabi. Ndidha kutoola bakazi bo ng'obona, mbaghe musaadha mwino, abe nabo mu buliri, omusana gwene.

¹² Iwe kye wakola wakikola mu ngiso, aye nze kye nja okukola nja kukikola nga Abaisiraeli boonaboona babona, omusana gwene.’ ”

¹³ Agho Daudi yaakoba Nathani ati: “Nakola ekibi naasungughaza Musengwa Katonda.” Nathani yaamukoba ati: “Musengwa Katonda akusoniighe toidha kufa.

¹⁴ Aye olw'okuba wakola ekikolwa ekyo wanhooma inho Musengwa Katonda, omwana wo aidha kufa.”

¹⁵ Nathani yairayo ewuwe. Agho Musengwa Katonda yaasindika obulwaire bwagema omwana Daudi ye yazaala mu muka Uria, yaalwala inho.

Omwana wa Daudi afa

¹⁶ Kale Daudi yaasabira omwana oyo eri Katonda, yaasiiba, era yangiranga mu ndhu yaalambaalanga ghansi obwire bwonabwona.

¹⁷ Abakungu ab'omu ndhu ye baaja y'ali okumusitusa ave ghansi, aye yaaloberagho, era yaaloba okulya emere nabo.

¹⁸ Ku lunaku olwomusanvu omwana yaafa. Abagheereza ba Daudi baatya okumukobera bati omwana afiire, nga bakoba bati: “Bona eno, omwana ng'akaali mulamu twagezaaku okwogera naye, yaaloba okutuwulirisa, memale tughanga tutya okumukobera tuti omwana afiire? Aghanga okwekola ekibi.”

¹⁹ Aye Daudi bwe yabona ng'abagheereza be bali kukubagana obwama, yaakitegeera ng'omwana afiire. Kale n'okubabuuza ati: “Omwana afiire?” Bamwiramu bati: “Yii, afiire.”

²⁰ Agho Daudi yaava ghansi, yaanaaba, yeesiiga omuzigo, yaavaala ebivaalo ebindi, yaaja mu isinzizo lya Musengwa Katonda yaasinza. Bwe yamala yaaja mu ndhu ye, yaasaba emere baamugha yaalya.

²¹ Abagheereza be baamukoba bati: “Ekyo ky'okoze kitegeeza ki? Wasiiba era waalirira omwana wo ng'akaali mulamu, aye bw'afiire waasituka waalya n'emere!”

²² Yaabakoba ati: “Kituufu, omwana bweyali ng'akaali mulamu, nasiiba era naalira nga nkoba mule nti, ‘Tomanha, oba katyo Musengwa Katonda aidha kungemerwa ekivunika, omwana alobe kufa?’

²³ Aye buti amaze okufa, kale lwaki nsiiba? Nkaaghanga okumwiza? Luliba lulala nze naaja y'ali, aye mwene taja kwira ye ndi.”

Solomoni azaalibwa

²⁴ Agho Daudi yaagumya mukazi we Bathisheba, yaaba naye mu buliri yaatoola enda, yaazaala omwana mulenzi. Daudi yaatuuma omwana oyo eriina Solomoni. Musengwa Katonda yaagonzanga inho omwana oyo,

²⁵ era yaatuma Nathani omulanzi yaagha omwana oyo eriina Yedidia, kuba Musengwa Katonda oyo yamugonzanga inho.

Daudi agema ekibuga Rabba

²⁶ Agho Yoabu yaalumba ekibuga Rabba eky'Abammoni, yaakigema.

²⁷ Yaagheereza Daudi abakwenda ng'amukoba ati: “Nnumbye ekibuga Rabba, naagema ekifo ekirimu amaadhi.

²⁸ Mperaano ni, soloza abantu boonaboona abasigairegho ozingize ekibuga ekyo Rabba okigeme, tiikulwa nga nze nkinhaga naakyeta eriina eryange.”

²⁹ Kale Daudi yaasoloza abantu ghalala, yaaja yaalwanisa ekibuga Rabba, yaakigema.

³⁰ Daudi yaatoola engule ku mutwe gwa kyabazinga waibwe yaagita ku mutwe gwe. Engule eyo yali ya zaabu n'amabaale ag'omughendo, ng'ezitogha kilo ng'oti amakumi asatu na itaanu. Daudi era yaanhaga ebintu kamaala inho mu kibuga.

³¹ Era yaatwala n'abantu abaali mu kibuga omwo, yaabakozesanga emirimo nga bakozesa emisumeeni, ensuuluulu, n'empasa, era yaabakozesanga okwokya amatoofaali. Era atyo bwe yakola abantu boonaboona abaali mu bibuga eby'Abammoni byonabyona. Agho Daudi n'abantu be boonaboona bairayo e Yerusalemu.