2 Samueli 11 - Baibuli Ekibono kya Katonda 2014

Daudi ni Bathisheba

¹ Agho ng'omwaka gutoolera, mu biseera bakyabazinga ghe baajiiranga okulwana entalo, Daudi yaatuma Yoabu ng'ali n'abagheereza be ghalala n'Abaisiraeli boonaboona. Baaja baalumba Abammoni, baabaghangula era baazingiza ekibuga Rabba okukyezunguluza. Aye Daudi mwene yaasigala e Yerusalemu.

² Lwali lulala eiguloigulo, Daudi yaasituka yaava ku buliri bwe ng'amaze okulambaala okuwuumulaku, yaatambulatambula ghaigulu ku ngulu okw'endhu ye. Ng'ali eyo ghaigulu yaalengera omukazi ali kunaaba, ng'aboneka bulungi inho.

³ Agho Daudi yaatuma abakwenda babuulirize ebigema ku mukazi oyo. Baamukobera bati, ni Bathisheba mughala wa Eliamu era muka Uria Omuhitti.

⁴ Kale Daudi yaatuma abakwenda baamunona baamumutwalira, yaaba naye mu buliri. Omukazi oyo yali ali kwetukuza, nga yaakava mu kulwala okwa buli mwezi.

⁵ Agho omukazi oyo yaatoola enda, yaatuma baakobera Daudi bati ali mabunda.

⁶ Daudi yaagheereza Yoabu obukwenda ng'akoba ati: “Mpeereza Uria Omuhitti aidhe.” Yoabu yaagheereza Uria eri Daudi.

⁷ Uria bwe yatuuka ye Daudi, Daudi yaamubuuza Yoabu n'abalwani bwe bali, n'olutalo bwe luli kuja.

⁸ Olwamala, Daudi yaakoba Uria ati: “Ja ewuwo owuumuleku.” Uria yaafuluma mu ndhu ya kyabazinga yaaja. Agho ekirabo kyamuvaaku einhuma nga bakireeta okuva ye kyabazinga.

⁹ Aye Uria yaaloba kuja ka, yaasula agho gha mulyango gw'endhu ya kyabazinga n'abagheereza ba musengwa we oyo abandi boonaboona.

¹⁰ Daudi baamukobera bati: “Uria tiyajiire wuwe.” Agho yaabuuza Uria ati: “Tiwaviire mu lugendo luleeyi? Memale lwaki tiwajiire wuwo?”

¹¹ Uria yaamwiramu ati: “Esanduuku y'Endagaano eri mu ntindi, n'abasaadha aba Isiraeli n'aba Yuda boonaboona basula mu ntindi. Era musengwa wange Yoabu n'abagheereza be, basimbye weema dhaibwe mu irungu. Memale nze nnaaja ntya eka, okulya, okunhwa n'okusula ni mukazi wange? Busa naire. Ndayira musengwa wange iwe kyabazinga omulamu nti, tiidha kukola kintu ng'oti n'ekyo.”

¹² Agho Daudi yaakoba Uria ati: “Kale sigala ghano n'olwaleero. Enkyo ndidha kukusiibula oje” Uria yaasigala mu Yerusalemu olunaku olwo n'olwairirira.

¹³ Daudi yaamweta yaalya naye era yaanhwa naye, yaamutamiiza. Aye era Uria yaaloba kuja wuwe. Yaasula ghalala n'abagheereza ba musengwa we Daudi oyo.

¹⁴ Bwe bwakya enkyo Daudi yaaghandiikira Yoabu embaluwa, yaagigha Uria agimutwalire.

¹⁵ Mu mbaluwa omwo yaghandiikamu ati: “Ta Uria emberi mu lutalo aghasinga kuba ghabi, memale imwe mumuleke eyo mwire einhuma, abazigu bamufumite bamwite.”

¹⁶ Kale Yoabu bwe yaazingiza ekibuga okukyezunguluza, yaata Uria mu kifo ghe yali aidhi nga n'aghali abasaadha abaziramu ntete.

¹⁷ Agho abasaadha ab'omu kibuga baidha baalwana ni Yoabu. Baita abandi ku bagheereza ba Daudi. Uria Omuhitti yeena baamwitiramu.

¹⁸ Agho Yoabu yaagheereza Daudi amawulire goonagoona agagema ku lutalo.

¹⁹ Yaalagira omukwenda ye yatuma ati: “Bw'onaamala okukobera kyabazinga amawulire goonagoona agagema ku lutalo,

²⁰ kyabazinga n'asungughala era n'akubuuza ati, ‘Lwaki mwaseeta kumpi inho n'ekibuga nga mukirwanisa? Ti mwamanha nga baidha kubalasa nga bali ku kimante?

²¹ Naani eyaita Abimeleki mutabane wa Yerubbeshethi? Omukazi tiyali ku kimante memale n'amusuulaku enso ey'olubengo, n'afiira e Thebezi? Lwaki mwaseeta kumpi inho n'ekimante mutyo?’ Oidha kumukoba oti, ‘N'omugheereza wo Uria Omuhitti yeena bamwise.’ ”

²² Kale omukwenda yaaja ye Daudi, yaamukobera byonabyona Yoabu bye yamutuma.

²³ Yamukobera ati: “Abazigu baasooka baatunhigiriza, baavaayo mu kibuga baidha okutulwanisa mu nsiko. Aye twamala twababingirira twabaizaayo ku mulyango ogw'ekibuga ekyo.

²⁴ Agho ab'obulaso baatoolera okutulasa nga bali ku kimante, baita abandi ku bagheereza bo, Isebantu kyabazinga. N'omugheereza wo Uria Omuhitti yeena bamwise.”

²⁵ Daudi yaakoba omukwenda ati: “Ja okobe Yoabu oti, ‘Ebyo ebibairegho bitakumalamu maani, kuba ghazira aghanga kumanha oyo anaafiira mu lutalo. Kale ni weeyongere bwa kulumba ekibuga ekyo n'amaani, okigeme.’ Era weena omwizeemu amaani.”

²⁶ Bathisheba bwe yawulira nga Uria iba bamwise, yaamulira.

²⁷ Ekiseera eky'okulira bwe kyawaaku, Daudi yaatuma abakwenda baaleeta Bathisheba oyo mu kisaagaati kya kyabazinga, yaamufuula mukazi we, era yamuzaalira omwana omulenzi. Aye ekintu ekyo Daudi kye yakola kyasungughaza Musengwa Katonda.