2 Samueli 1 - Baibuli Ekibono kya Katonda 2014

Daudi bamukobera okufa kwa Saulo

¹ Agho Saulo ng'amaze okufa, Daudi yaira e Zikulaga ng'amaze okutirimbula Abamaleki, yaabayooku enaku eibiri.

² Ku lunaku olwokusatu yaja okubona ng'omwisuka atuuka, ng'ava mu kifo Saulo ghe yasimba weema dhe. Omwisuka oyo yali akanwiremu ebivaalo bye nga n'omutwe gwe gwidhwire nkungu olw'enaku. Bwe yatuuka eri Daudi yaakuba amakiryaivu era yaakutama n'ekyeni kyatuuka ku itaka.

³ Daudi yaamubuuza ati: “Ova gha?” Yaamwiramu ati: “Neibye mu kifo Abaisiraeli ghe baasimba weema dhaibwe.”

⁴ Daudi yaamukoba ati: “Nkobera. Byajiire bitya?” Yairamu ati: “Abaisirukale baife baalumwike mu lutalo era abantu baife kamaala baabaise. Era Saulo ni mutabane we Yonathani, boona baabaise.”

⁵ Daudi yaamubuuza ati: “Wamanhie otya nga Saulo ni mutabane we Yonathani, baafiire?”

⁶ Omwisuka oyo yairamu ati: “Neeyagaine nga ndi ku lusozi Giliboa. Okuja okulinga nti, nga mbona Saulo yeesiire ku ifumo lye. Era okuja okulinga nti, nga mbona ebigaali eby'omu lutalo n'abalwani ab'oku mbalaasi nga bali kumwidhira.

⁷ Bwe yalinze einhuma we yambona, yandheta, naavugira nti, ‘Wangi isebo.’

⁸ Yambuuza ati, ‘Niiwe ani?’ Naamwiramu nti, ‘Ndi Muamaleki.’

⁹ Yankoba ati, ‘Nkweghembye seeta ghano ondhite, kuba banfumiite ebiwundu eby'amaani, waire nga nkaagheera.’

¹⁰ Kale naaseeta naamwita, kuba bwenebwene nabaire ndidhi ng'olunaagwa ati, aidha kufa bufe. Kale naatoola engule eyabaire ku mutwe gwe n'ekikomo ekyabaire ku mukono gwe, biibino mbikuleeteire iwe musengwa wange.”

¹¹ Agho Daudi yaakanulamu ebivaalo bye olw'enaku, n'abasaadha be boonaboona be yali nabo agho baakola batyo.

¹² Baalira amaziga, baagegenga era baaloba kulya mmere okutuusa eigulo, olw'okuba Saulo, ni Yonathani mutabane we, n'Abaisiraeli abantu ba Musengwa Katonda, baafiira mu lutalo.

¹³ Daudi yaabuuza omwisuka oyo eyamuleetera amawulire ago ati: “Oviira gha?” Yairamu ati: “Ndi mwana wa musaadha musenze Omuamaleki.”

¹⁴ Daudi yaamubuuza ati: “Oghanga otya obutatya kugolola mukono gwo, okuzikiriza omuntu wa Musengwa Katonda eyasiigibwa omuzigo?”

¹⁵ Agho Daudi yaakoba owundi ku baisuka be ati: “Ja omwite.” Era ole yaaja yaamufumita, yaamwita.

¹⁶ Daudi yaakoba Omuamaleki oyo ati: “Niiwe mwene oweereeteire okufa, kuba omunwa gwo gwene n'ogughaire obudhulizi obukulumiriiza, ng'okoba oti, ‘Naita omuntu wa Musengwa Katonda eyasiigibwa omuzigo.’ ”

Daudi alira Saulo ni Yonathani

¹⁷ Agho Daudi yaalira Saulo ni mutabane we Yonathani mu olwembo olw'okulira.

¹⁸ Yaalagira olwembo olwo balwegerese abantu b'omu Buyudaaya. Era bona, lwaghandiikibwa mu Kitabo kya Yashari. Olwembo olwo luja luti:

¹⁹ Wo Isiraeli, abakugheesa ekitiibwa babaitiire ku nsozi dho! Abantu ab'amaani bagwire inho!

²⁰ Mutakikoberaku bantu b'e Gathi, waire okukisansaania mu nguudo edh'e Ashikeloni; kuba mwidha kuleetera baghala b'Abafilisiti okusagamba, olwo muleetere baghala b'abantu abo abatali bakekete okutuumira ghaigulu olw'eisanhu.

²¹ “Imwe ensozi edh'e Giliboa, mugwananga mwaloba kugwaku maadhi waire omusulo obusulo, oba waire amasamba gaimwe okuvaamu ebikungulwa; kuba ku imwe, engabo edh'ab'amaani kwe dhaayonoonerwa, engabo ya Saulo baalekera okugisiiga omuzigo.

²² Akalaso ka Yonathani tikairanga, nga tikasaabaine musaayi gwa bafiire era nga tikafumiite masavu ga b'amaani; n'empiima ya Saulo tiyairiranga agho bwereere.

²³ Saulo ni Yonathani baali bagonzi era abasanhusa! Mu bulamu ni mu kufa tibaayawukana, baali ba mbiro okusinga enkookooma, era baaba ba maani okusinga empologoma.

²⁴ Imwe baghala b'Abaisiraeli mulire Saulo, eyabavaazanga ebivaalo eby'ebitiibwa ni mutoonha, era eyabavaazanga ebyamadholobera ebya zaabu.

²⁵ Abalwani ab'amaani bagwire inho, baabaitira mu lutalo! Yonathani agwire yaafiira mu nsozi.

²⁶ Muganda wange Yonathani, ndi mu bughafu bubitirivu ku lulwo! Obaire mukagwa wange inho. Obairenga ng'ondholeka okugonza okutaloodheka, nga kusinga n'okugonza okw'abakazi.

²⁷ Abantu ab'amaani bagwire inho, n'eby'okulwanisa baabirekulira bw'agho.”