2 Petero 2 - Baibuli Ekibono kya Katonda 2014

Abeegeresa abaguya

¹ Nga bwe ghaaligho abalanzi abaguya mu bantu ba Katonda, ni mu imwe mulibaamu abeegeresa abaguya. Balyeibirira, baayegeresa ebikiidhamya Obukurisito era ebireeta okuzikirira. Era balyegaana Musengwa eyabanunula, beereetera okuzikirira amangu.

² Ghalibaagho abantu kamaala abalijiira ku mpisa dhaibwe edh'obudankaanu era baavumagania Enjira ey'amazima.

³ Era olw'amairu gaibwe ag'okufuna, balifuna mu imwe amagoba nga bakozesa ebibono eby'obuguya. Katonda yamala ira okubasalira omusango, era aja kubazikiriza nga bwe yategeka.

⁴ Katonda tiyasaasira bamalaika abaayona, aye yaabasuula mu geyeena, yaabasibira mu nzikiiza okutuusa ku lunaku olw'okusalirwaku omusango.

⁵ Era Katonda tiyasaasira nsi mu biseera bya Noa, aye yasindika omwidhuzo okusaaniagho abantu abatamutya. Yaawoniagho Noa eyakoberanga abantu nga Katonda bw'ayenda beebise, era yaawoniagho n'abantu abandi musanvu.

⁶ Katonda yafuula Sodoma ni Gomorra eky'okuboneraku eri abo abatalimutya bwe yasalira ebibuga ebyo omusango ni gubisinga, n'abisaaniagho n'omuliro.

⁷ Yawoniagho Loti omusaadha omutuufu, eyali yeesiniirwa empisa edh'obudankaanu edh'abantu ababi.

⁸ Omusaadha oyo, bye yabonanga ni bye yawuliranga buli kaakyeire ng'ali mu bantu abo, nga bimugemya enaku.

⁹ Ebyo biraga nga Katonda aidhi okutoola abamutya mu buzibu, era n'okukuumira ababi mu kubonerezebwa okutuusa ku lunaku olw'okusalirwaku omusango.

¹⁰ Era Katonda abonereza okusingira irala abo abajiira ku mairu amabi ag'omubiri, ni banhooma obufuzi. Abeegeresa abo abaguya bakanu, era beidhi bonka tibatya na kuvuma ba kitiisa.

¹¹ Ate nga bamalaika, waire nga basinga abantu bano amaani n'obukumu, tibabavuma nga babaseegha ye Musengwa.

¹² Aye abantu bano bali ng'oti nsolo busolo edhizira magezi, edhijiira obw'oku butonde edhizaalibwa nga dha kuyiigibwa na kwitibwa. Kiisi kye bataidhi bakivumagana. Boona balizikirizibwa ng'ensolo edh'omu nsiko.

¹³ Era balidaagadaaga nga bwe badaazadaaza abantu. Kibasangaaza okukola ebinhoonha emibiri gyaibwe omusana omukulu. Abantu bano baswaza era bagemya ensoni bwe baidha ni babeeyimbaku ku biiwulo byaimwe. Kino kibanhoonha inho bwe babona nga beene bali kuguya imwe.

¹⁴ Bamoga bwenzi bwereere era tibasinwa kukola bibi. Basendasenda abanafu mu kwikiriza. Emyoyo gyaibwe girowooleza bwa mu kufuna. Ba kuzikirira!

¹⁵ Baaleka engira entuufu, baadaaliima, baagema engira ya Balaamu omulanzi, omwana wa Beori eyagonza einho eby'obufuni ni bimukoza n'ebisobu.

¹⁶ Aye yaanenezebwa olw'ekibi kye, endogoyi ye ku olwo bwe yayogera oti muntu, era n'eresa omulanzi oyo eby'ekiralu bye yali aja okukola.

¹⁷ Abantu abo bali ng'oti n'ensulo edhaakala eira, era ng'oti n'ebire ebitwalibwa kiwunga. Katonda abategekeire enzikiiza eri bedimudimu.

¹⁸ Mu busiru bwaibwe baasiikana nga beesuuta, era baakozesa obudankaanu bwaibwe obw'omubiri okusendasenda abo abaakava obuve mu bantu abakaali mu nsobi.

¹⁹ Babasuubiza eidembe ate nga beene bairu ba kibi kuba kiisi muntu aba mwiru w'ekyo ekimughangula.

²⁰ Abantu bwe bamala okuwona obubi obw'ensi eno nga babita mu kumanha Musengwa waife era Omulokozi Yesu Kurisito, memale kabiri ni babwiramu era ni bubaghangula, embeera yaibwe ku nkomerero eba mbi inho okusinga eyasooka.

²¹ Ekyandiwuze n'abantu abo okuba nga tibamanhangaku ngira ya butuufu, mu kifo eky'okugimanha memale kabiri ni bakyuka ni bava ku biragiro ebitukuvu ebyabagheebwa.

²² Ebyabatuukaku byakakasa endhogera ekoba eti: “Embwa by'esesema emala yaabirya!” N'eno ekoba eti: “Bw'onaaza embiidhi, emala yaira mu bisoodo.”