2 Ebyomubyanda 9 - Baibuli Ekibono kya Katonda 2014

Kyabazinga omukazi ow'e Sheba akyalira Solomoni

¹ Agho kyabazinga omukazi ow'e Sheba bwe yawulira obumanhifu bwa Solomoni, yaidha e Yerusalemu n'ebibuuzo ebikalangafu okumuleba. Yaidha n'ekikunsu eky'abagheereza be nga kinene inho, n'engamiya edheetwise obuwoowo, ni zaabu mungi inho, n'amabaale ag'omughendo. Bwe yatuuka ewa Solomoni yaamukobera byonabyona ebyamuli ku mwoyo.

² Solomoni yaamwiramu ebibuuzo bye byonabyona. Ghazira kintu waire ekirala kiti ekyazibughalira Solomoni okwinhonhola.

³ Kyabazinga omukazi ow'e Sheba oyo yaabona amagezi ga Solomoni, n'ekisaagaati kye eky'obwakyabazinga kye yazimba,

⁴ n'emere ye yagabulanga ku meeza ye, n'ensambo abakungu be ye baatyamangamu, n'ensambo abagheereza be ye baagheerezangamu nga bali mu bivaalo byaibwe, n'ensambo abo abaagheerezanga eby'okunhwa ye baavaalangamu. Era yaabona n'ebigheebwayo ebyokebwa Solomoni bye yaghangayo mu isinzizo. Ebyo byonabyona byamwewuunhisa inho ekibitiriire.

⁵ Agho yaakoba Solomoni ati: “Bye nawulira nga ndi mu nsi yange ku bikolwa byo ni ku magezi go, byali bituufu.

⁶ Aye tyabiikiriza, okutuusa lwe ndidhie ni mbyeboneraku n'agange. Era bwenebwene bye nawulira byali katundu butundu ak'ebyo bye mboine. Amagezi g'oli nago gasingira ghala ebyo bye nawuliraku.

⁷ Bakazi bo beesiimye! N'abagheereza bo ababa buliidho mu maiso go ni bawulira eby'amagezi by'oyogera beesiimye!

⁸ Musengwa Katonda wo asaakibwe, eyayoleka nga bw'akusiimye, n'akufuula kyabazinga, ofugenga mu liina lye. Musengwa Katonda oyo agonza inho abantu be Abaisiraeli era ayenda okubakuuma babeegho lubeerera, kyeyava n'akufuula kyabazinga waibwe, olamulenga mu mazima ni mu butuufu.”

⁹ Agho yaatonera kyabazinga zaabu agheza kilo ng'oti enkumi ina (4,000), n'eby'obuwoowo kamaala inho, n'amabaale ag'omughendo. Era ghaali tighabangaghooku buwoowo ng'oti n'obwo kyabazinga omukazi ow'e Sheba bwe yatonera kyabazinga Solomoni.

¹⁰ Abagheereza ba Hiramu n'aba Solomoni abaaleeta zaabu okuva mu Ofiri, baaleeta n'embaawo edh'emiti egyetebwa emyalumugi, n'amabaale ag'omughendo.

¹¹ Kyabazinga Solomoni yaakozesa embaawo edho okukola amadaala ag'omu isinzizo, n'ag'omu kisaagaati kye eky'obwakyabazinga. Yaadhikolamu n'endingidi, n'entongooli edh'abembi. Mu Buyudaaya mwali timubangamuuku mbaawo edhiri ng'oti n'edho.

¹² Agho kyabazinga Solomoni yaagha kyabazinga omukazi ow'e Sheba byonabyona bye yayenda, na buli kye yasaba ng'otoireku ebyo kyabazinga omukazi oyo bye yamuleetera. Kale kyabazinga omukazi oyo yaasiibula, yairayo mu nsi ye, ghalala n'abagheereza be.

Obukombe bwa kyabazinga Solomoni

¹³ Zaabu Solomoni ye yafunanga omwaka, yaghezanga kilo ng'oti emitwalo ebiri n'enkumi isatu (23,000),

¹⁴ nga tobaliireeku oyo eyavanga mu musolo abasuubuzi gwe baasasulanga, ni mu mpooza ku bitundibwa. Ni bakyabazinga boonaboona ab'e Buwarabu, n'abafuzi ab'ebiketezo mu nsi eyo, boona baaleeteranga Solomoni zaabu ni feeza.

¹⁵ Kyabazinga Solomoni yagheesa engabo enene ebikumi bibiri (200), buli ndala yaagirimbyaku zaabu azitogha kilo ng'oti musanvu.

¹⁶ Yaagheesa n'engabo entono ebikumi bisatu, buli ndala yaagirimbyaku zaabu azitogha kilo ng'oti isatu. Dhoonadhoona yaadhita mu ndhu eyayetebwanga Ekibira kya Lebanoni.

¹⁷ Kyabazinga era yaakola ekityamo eky'obwakyabazinga ekikologho mu isanka, yaakirimbyaku zaabu omukenenule.

¹⁸ Ekityamo ekyo kyaliku amadaala mukaaga, n'ekintu ky'otaaku ebigere ekya zaabu. Kyabaaku ni kw'ota emikono eruuyi n'eruuyi, nga ku mbali okwa buli mukono, ghaligho ekifaananie ky'empologoma eyemereire.

¹⁹ Ghaaligho n'ebifaananie ebindi eby'empologoma ikumi na bibiri, nga dheemereire ndala ndala ku luuyi ni ku luuyi okwa buli idaala, ku madaala gale omukaaga. Tighaalighooku kityamo kya bwakyabazinga kyakolebwa kabiri mu bwakyabazinga bundi, nga kifaanana n'ekyo.

²⁰ Ebintu byonabyona ebya kyabazinga Solomoni bye yakozesanga ku by'okunhwa, byali bya zaabu. Era ebintu byonabyona ebyakozesebwanga ku by'okulya mu ndhu eyayetebwanga Ekibira kya Lebanoni, byali bya zaabu mukenenule. Mu biseera bya Solomoni, feeza tiyatwalibwanga ng'ekintu eky'omughendo.

²¹ Kyabazinga yali n'olugololiro olw'amaato agaajanga e Tarushishi ku nhandha enene nga gali ghalala n'olugololiro olw'amaato ga Hiramu. Buli ku nkomerero ya myaka esatu, olugololiro lw'amaato olwo lwairanga okuva e Tarushishi nga luleese zaabu, ni feeza, n'amasanka, n'ensude, n'enkembo.

²² Kale atyo kyabazinga Solomoni yaasingira ghala mu bukombe n'amagezi bakyabazinga boonaboona ku nsi.

²³ Bakyabazinga ab'omu nsi yoonayoona baayendanga okwidha aghali Solomoni oyo, okuwulira ebibono eby'amagezi ge, Katonda ge yamugha.

²⁴ Buli eyaidhanga, ng'aleeta ekirabo: ebintu bya feeza n'ebya zaabu, ebivaalo, obuwoowo, embalaasi, n'enhumbu. Baaleetanga ebintu ebyo mu bungi buli mwaka.

²⁵ Solomoni era yali n'ebisenge enkumi ina (4,000) eby'embalaasi dhe, n'ebigaali byadho eby'omu lutalo, n'abavuzi ab'embalaasi omutwalo mulala n'enkumi ibiri (12,000), be yata mu bibuga ebikuumirwamu ebigaali eby'omu lutalo ni mu Yerusalemu, mwene mwe yali.

²⁶ Era Solomoni oyo yafuganga bakyabazinga boonaboona okuviira irala ku mwiga Eufurate, okutuukira irala ku nsi y'Abafilisiti, ni ku nsalosalo y'e Misiri.

²⁷ Mu biseera bye, feeza yayala mu Yerusalemu, yaaba mungi ng'oti bwa mabaale. N'emivule gyaba mingi ng'oti miti emisikamore egy'omu biketezo bya Buyudaaya eby'omu biiko.

²⁸ Embalaasi Solomoni dhe yali nadho, yadhiragirizanga kuva mu Misiri ni mu nsi edhindi.

Ebyali mu bufuzi bwa Solomoni mu bumpimpi

²⁹ Ebindi byonabyona Solomoni bye yakola, okuva lwe yainhama okufuga okutuuka ku nkomerero ye, byaghandiikibwa mu Byafaayo bya Nathani Omulanzi, ni mu Byalangibwa Ahiya ow'e Shilo, ni mu Byali mu Kubonekerwa kwa Iddo Omulanzi nga bigema ku Yeroboamu mutabane wa Nebati.

³⁰ Entangama Solomoni ye yamala ng'afuga Isiraeli yoonayoona mu Yerusalemu, yali ya myaka makumi ana (40).

³¹ Agho Solomoni oyo yaafa yeeyimba ku badhaadha be abaafa, yaaziikibwa mu kyetebwa Ekibuga kya Daudi lata we. Mutabane we Rehoboamu yaamusikira ku bwakyabazinga.