2 Ebyomubyanda 8 - Baibuli Ekibono kya Katonda 2014

Ebirungi Solomoni bye yakola

¹ Agho emyaka amakumi abiri Solomoni gye yazimbiramu eisinzizo n'ekisaagaati kye eky'obwakyabazinga bwe gyawaaku,

² Solomoni oyo yaazimba buyaaka ebibuga Hiramu bye yamugha, era yaabigha Abaisiraeli baabibaamu.

³ Agho Solomoni oyo yaaja, yaanhaga ekiketezo ky'e Hamathi n'eky'e Zoba.

⁴ Yaazimba ekibuga Tadimori mu irungu, era yaazimba n'ebibuga mu Hamathi ebyalimu amaterekero.

⁵ Era yaazimba ebibuga Bethi Horoni eky'Eitale, ni Bethi Horoni eky'Eifo, nga byezungulwirwa ebimante ebigumu era nga biriku endhigi edhiriku ebisiba eby'ekyuma.

⁶ Era yaazimba ekibuga Baalathi, n'ebibuga bye ebyalimu amaterekero, n'ebibuga mwe yakuumiranga ebigaali bye eby'omu lutalo, n'ebibuga by'abasaadha be abavuzi b'embalaasi, n'ebindi byonabyona Solomoni bye yayenda okuzimba mu Yerusalemu ni mu Lebanoni, n'aghandi woonawoona mu biketezo bye yali afuga.

⁷ Ghaaligho abantu abaawonagho abataali Baisiraeli, nga n'omuli Abamori, Abahitti, Abaperizzi, Abahivi, n'Abayebusi, abaali mu nsi Kanaani.

⁸ Abaidhukulu b'abantu abo, Abaisiraeli be bataazikiriza, Solomoni be yakozesanga emirimo egy'olukako. Era abo n'abakaagikola ni ye buli eno.

⁹ Aye ghazira muntu waire omulala ati ku Baisiraeli, Solomoni ye yafuulaku mwiru wa kukola mirimo. Baabanga baisirukale be, na bakulu mu magye, na baduumizi ba magye, na bakulu ba bavuzi be ab'ebigaali eby'omu lutalo, na bavuzi be ba mbalaasi.

¹⁰ Ghaaligho abakungu abakologho ebikumi bibiri n'ataanu (250), abaafuganga abantu.

¹¹ Agho Solomoni yaatoola mukazi we mu kyetebwa Ekibuga kya Daudi, yaamuta mu kisaagaati ekikye kye yamuzimbira, ng'akoba ati: “Mukazi wange taidha kuba mu kisaagaati kya kyabazinga Daudi owa Isiraeli, kuba ebifo Esanduuku ya Musengwa Katonda bye yatuukamuuku biba bitukuvu.” Mukazi wa Solomoni oyo yali mughala wa kyabazinga w'e Misiri.

¹² Agho Solomoni yaaghangayo eri Musengwa Katonda ebigheebwayo ebyokebwa ku alutaari ye yazimba emberi gh'eisinzizo.

¹³ Yaabighangayo nga bwe kyalinga kiragirwa buli lunaku, ng'Amateeka ga Musa bwe galagira okubighaayo: ku Sabbato, ni ku Kibinuko eky'Okuboneka kw'Omwezi, ni ku bibinuko ebisatu ebya buli mwaka eky'Emigaati Egitazimbulukusiibwa, n'eky'Amakungula, n'eky'Entindi.

¹⁴ Solomoni oyo yaakola nga lata we Daudi bwe yalagira, yaataagho engobo bakabona dhe baakolerangamu omulimo gwaibwe. Yaataagho n'engobo Abalevi dhe baakolerangamu omulimo gwaibwe ogw'okwemba enhembo edhisaaka, n'okugheereza nga bayambaku bakabona, nga bwe kyetaagisanga buli lunaku. Yaataagho n'abakuumi b'emiryango mu ngobo, ku buli mulyango kuba atyo Daudi omuntu wa Katonda bwe yalagira.

¹⁵ Kyabazinga Daudi bye yalagira bakabona n'Abalevi ku bintu ebyaterekebwa ni ku bintu ebindi, baabituukiriza bukalamu.

¹⁶ Mu nsambo eyo Solomoni yaamaliriza omulimo gwonagwona, okuviira irala ku lunaku lwe baataagho omusingi gw'eisinzizo, okutuusa lwe lyawa okuzimba. Kale eisinzizo eryo lyamalirizibwa.

¹⁷ Agho Kyabazinga Solomoni yaaja mu Ezionigeberi ni mu Elothi, ku mbali kw'enhandha, mu nsi Edomu.

¹⁸ Kyabazinga Hiramu yaasindika ku bagheereza be n'amaato, abaali n'obumanhi ku by'oku nhandha, baajiira mu maato ago ghalala n'abagheereza ba Solomoni. Baaja mu nsi Ofiri, baatoolayo zaabu agheza kilo ng'oti omutwalo mulala n'enkumi itaanu (15,000), baamuleetera kyabazinga Solomoni.