2 Ebyomubyanda 7 - Baibuli Ekibono kya Katonda 2014

Eisinzizo balitukuza

¹ Solomoni bwe yamala okusaba kwe, omuliro gwaghanuka okuva mu igulu, gwayokya ebigheebwayo ebyokebwa n'emisengo gwabisaanaigho. N'okumesunkana okw'ekitiisa kya Musengwa Katonda kwabuna eisinzizo eryo.

² Bakabona tibaasobola kwingira mu isinzizo, kuba okumesunkana okw'ekitiisa kya Musengwa Katonda kwali kulibunie lyonalyona.

³ Abaisiraeli boonaboona bwe baabona omuliro n'okumesunkana okw'ekitiisa kya Musengwa Katonda nga biri kwika ku isinzizo, baakuba amakiryaivu ku mabaale amataanhe era baakutama n'ebyeni byatuuka ku itaka. Era baasinza Katonda nga bamwebaza, nga bakoba bati: “Musengwa Katonda mulungi okugonza kwe tikukoma, kubaagho byanda na byanda.”

⁴ Agho kyabazinga n'abantu boonaboona, baaghaayo emisengo ye Musengwa Katonda.

⁵ Kyabazinga Solomoni yaaghaayo ente emitwalo ebiri n'enkumi ibiri (22,000), n'entaama emitwalo ikumi n'ebiri (120,000) ng'emisengo. Kale atyo kyabazinga Solomoni n'abantu boonaboona baatukuza eisinzizo okulighaayo libe erya Katonda.

⁶ Bakabona baayemerera mu bifo byaibwe. N'Abalevi boona baayemerera nga balingagaine ni bakabona abo, nga bagemye ebivuga Daudi bye yakola okusaakirangaku Musengwa Katonda era baabikozesa mu lwembo Daudi oyo lwe yabeegeresa olw'okwebaza Musengwa Katonda, olw'okuba okugonza kwe tikukoma, kubaagho byanda na byanda. Bakabona baafuuwa amagwala nga n'Abaisiraeli boonaboona beemereire.

⁷ Kyabazinga Solomoni yaatukuza oluya olwa ghagati olwali emberi gh'eisinzizo, kuba eyo ye yagheerayo ekigheebwayo ekyokebwa kyonakyona okuwaagho, n'ekigheebwayo eky'emere ey'empeke, n'amasavu agaava ku bigheebwayo olw'okutabagana. Yabigheerayo eyo, kuba alutaari ey'ekyuma eky'ekikomo ye yakola, yali ntono inho ng'ebigheebwayo ebyo byonabyona tibisobola kusugaku.

⁸ Kale mu kiseera ekyo, Solomoni ng'ali ghalala n'Abaisiraeli boonaboona nga beesoloiza, baakola embaga ey'ekibinuko kye baamalaku enaku omusanvu. Ekibinuko ekyo kyaliku abantu abeesoloiza kamaala inho, okuva eruuyi ere aghaingirirwa e Hamathi, okutuuka ku kaiga ak'oku nsalosalo ni Misiri.

⁹ Baamala enaku omusanvu edh'okutukuza alutaari ebe eya Musengwa Katonda, n'enaku edhindi omusanvu edh'ekibinuko ekyo. Ku lunaku olwomunaana boonaboona beesoloza ghalala okusinza.

¹⁰ Ku lunaku olwairirira, olwamakumi abiri n'eisatu (23) olw'omwezi ogwomusanvu, kyabazinga Solomoni yaasiibula abantu okwirayo ewaibwe. Abantu bairayo ewaibwe nga basangaavu era nga basagamba mu myoyo gyaibwe olw'ebirungi Musengwa Katonda bye yagha Daudi, ni Solomoni oyo, n'abantu be Abaisiraeli.

Katonda airamu okubonekera Solomoni

¹¹ Mu nsambo eyo, Solomoni yaamaliriza okuzimba eisinzizo n'ekisaagaati kye eky'obwakyabazinga, era yaamaliriza byonabyona bye yayenda okuzimba nga bwe yabitegeka.

¹² Agho Musengwa Katonda yaamubonekera obwire, yaamukoba ati: “Mpuliire by'onsabye, era ndhikiriiza eisinzizo lino libenga ery'okugheerangamu emisengo ye ndi.

¹³ Bwe nnaasibanga amaadhi ni gatagwa, oba ni nsindika enzige okulya ebirime, oba ninsindika obulwaire obubi mu bantu bange,

¹⁴ aye abantu bange abo ni bagonda ni bansaba, era ni balekera agho okukola ebibi ni baira ye ndi, olwo nze ndidha kubawulirisanga eyo mu igulu ye mba, mbasonighenga ebibi byaibwe era mponienga ensi yaibwe.

¹⁵ Ndidha kulabiriranga eisinzizo lino era ntegenga amatu okuwulira byonabyona bye banansabanga nga bali omwo

¹⁶ kuba mpegaano ntukwiza eisinzizo lino, libe ery'okunsinzizangamu enaku dhoonadhoona. Ndidha kulikuumanga obutatemya enaku dhoonadhoona.

¹⁷ Era iwe bw'onaajiiranga ku bye nkoba, nga lata wo Daudi bwe yakolanga, n'ogonderanga biragiro byange era n'ogemanga amateeka gange,

¹⁸ ndireetera obwakyabazinga bwo okusigalagho nga bugumu, nga bwe nasuubiza lata wo Daudi nti, ‘Mu b'eizaire lyo toobulengamu muntu atyama ku kityamo kya bwakyabazinga bwa Isiraeli.’

¹⁹ Aye bwe mulinvaaku ni mudheemera amateeka n'ebiragiro byange bye mbaghaire, ate ni mwira ku kugheereza n'okusinza bakatonda abandi,

²⁰ olwo ndibinga Abaisiraeli mu nsi ye mbaghaire, era naalekulira agho eisinzizo lino lye ntukwiza okunsinzizangamu, naalifuula eky'okwogeraku era enseko dh'abalamu mu maghanga goonagoona.

²¹ Eisinzizo lino mpegaano lya kitiisa inho, aye mu biseera ebyo buli abaliribitangaku balyewuunhianga. Era balibuuzanga bati, ‘Lwaki Musengwa Katonda yakola atyo ensi eno n'eisinzizo lino?’

²² Olwo abantu baliirangamu bati, ‘Lwa kuba baava ku Musengwa Katonda waibwe, eyatoola badhaadha baibwe mu nsi Misiri, ate baira ku kugheereza n'okusinza bakatonda abandi. Musengwa Katonda kyaviire n'abatuusa ku kabi akaaga agho.’ ”