2 Ebyomubyanda 6 - Baibuli Ekibono kya Katonda 2014

Solomoni bye yakoba abantu

¹ Agho Solomoni yaakoba ati: “Wo Musengwa Katonda, iwe wakoba oti oidha kubanga mu nzikiiza egemye bedimudimu.

² Mpegaano nze nkuzimbiire eisinzizo ery'ekitiibwa, ekifo mw'onaabanga enaku dhoonadhoona.”

³ Agho kyabazinga yaakyuka, yaalingirira Abaisiraeli boonaboona abaali beesoloiza nga bali agho, yaabasabira enkabi.

⁴ Yaabakoba ati: “Tumusaake Musengwa Katonda, oyo Katonda wa Isiraeli, atuukiriiza kye yasuubiza lata wange Daudi, bwe yakoba ati,

⁵ ‘Kasookanga ntoola bantu bange Abaisiraeli mu Misiri, tirondangaghooku mu bika bya Isiraeli byonabyona kibuga waire ekirala kiti, mwe bananzimbira eisinzizo. Era titangaghooku muntu waire omulala ati, akulemberenga abantu bange Abaisiraeli.

⁶ Aye mpegaano nonzeegho Yerusalemu kibe ekifo mwe banansinzizanga, era naataagho iwe Daudi okulemberenga abantu bange Abaisiraeli.’ ”

⁷ Solomoni yaayongera okukoba ati: “Lata wange Daudi yali n'ekidhuubo eky'okuzimbira Musengwa Katonda, oyo Katonda wa Isiraeli eisinzizo.

⁸ Aye Musengwa Katonda yaamukoba ati, ‘Wakola bukalamu okuba n'ekidhuubo eky'okunzimbira eisinzizo.

⁹ Aye ti niiwe oja okulizimba. Mutabane wo, iwe mwene y'olizaala, n'alinzimbira eisinzizo.’

¹⁰ “Mpegaano Musengwa Katonda atuukiriiza kye yasuubiza, nze naasikira lata wange Daudi, n'atyama ku kityamo eky'obwakyabazinga bwa Isiraeli, nga Musengwa Katonda bweyasuubiza. Era nzimbiire Musengwa Katonda, oyo Katonda wa Isiraeli eisinzizo.

¹¹ Naalitaamu ekifo ekibaamu Sanduuku y'Endagaano, endagaano eyo Musengwa Katonda ye yakola n'Abaisiraeli.”

Solomoni asaba Katonda

¹² Solomoni yaayemerera mu maiso g'alutaari ya Musengwa Katonda, ng'Abaisiraeli boonaboona abeesoloiza bali agho, yaayandhuluza emikono gye.

¹³ Solomoni oyo yali amaze okukola ekituuti mu kyuma eky'ekikomo, ng'endhuyi dhaakyo dhoonadhoona eina dhaagayaga, buli lulala lwa mita ibiri n'obutundu bubiri. Ate obugungumavu bw'ekituuti ekyo nga bwa mita ndala n'obutundu busatu. Era ng'amaze n'okukita ghagati mu luya. Agho yaaniina ghaigulu ku kituuti ekyo, yaakuba amakiryaivu ng'Abaisiraeli boonaboona abeesoloiza bali agho, era yaayandhululiza emikono gye eri eigulu.

¹⁴ Yaakoba ati: “Wo Musengwa Katonda, iwe Katonda wa Isiraeli, ezirayo katonda ali ng'oti niiwe, k'ebe mu igulu oba ku nsi; kuba iwe okuuma endagaano y'okola n'abantu bo era waabagonza obutalekera, kasita bagumira ku iwe n'omwoyo gwaibwe gwonagwona.

¹⁵ Wakuuma ekyo kye wasuubiza omugheereza wo, lata wange Daudi. Bwenebwene wakimusuubiza iwe mwene, era olwaleero okituukiriiza.

¹⁶ Wo Musengwa Katonda, iwe Katonda wa Isiraeli, mpegaano ni kuuma kye wasuubiza omugheereza wo lata wange Daudi oyo, bwe wakoba oti, ‘Mu b'eizaire lyo toobulengamu muntu ye ntaagho okutyama ku kityamo kyo eky'obwakyabazinga bwa Isiraeli, kasita banaawuliranga bye nkoba, ni bagumira ku nze nga iwe bwe wakola.’

¹⁷ Wo Musengwa Katonda, iwe Katonda wa Isiraeli, nkweghembye ni, ganha ekyo kye wasuubiza omugheereza wo Daudi kituukirire.

¹⁸ “Aye obwo bwenebwene iwe Katonda osobola okuba aghalala n'abantu ab'oku nsi? Ate oba waire mu igulu lyene, erisingayo okuba ghaigulu tosugamu, memale onaasuga otya mu isinzizo lino lye nzimbye!

¹⁹ Wo Musengwa Katonda wange, nkweghemba owulire okusaba kwange n'okugegenga kwange nze omugheereza wo, ompe kye nkusaba.

²⁰ Kuumanga eisinzizo lino omusana n'obwire, kuba kino n'ekifo kye wakoba oti mwe banaakusinzizanga. Nkweghembye wulirisanga bye nnaakusabanga nze omugheereza wo, nga ningiriire eisinzizo lino.

²¹ Wulirisanga bye nnaakusabanga nze omugheereza wo, era n'abantu bo Abaisiraeli bye banaakusabanga nga balingiriire ekifo kino. Bwenebwene tuwulirisenga ng'oli mu igulu eyo y'oba, era otusonighenga ng'otuwuliire.

²² “Omuntu bw'anaakolanga mwine ekibi ni bamukoba alayire, era n'aidha gh'alutaari yo mu isinzizo lino n'alayira,

²³ wuliranga ng'oli eyo mu igulu era olamulenga abagheereza bo. Era bonerezanga aliku omusango nga bw'agwaniire, ate weedheerezenga aziraku musango, omusasulenga ng'ojiira ku butuufu bwe.

²⁴ “Abantu bo Abaisiraeli bwe banaaghangulwanga abazigu baibwe olw'okukola ebibi y'oli, aye ni baira y'oli okwenenia era ni bakusaba nga bakweghemba mu isinzizo lino,

²⁵ bawulirenga eyo y'oli mu igulu. Era osonighenga ebibi by'abantu bo abo Abaisiraeli, obaizenga mu nsi ye wagha badhaadha baibwe.

²⁶ “Eigulu bwe lineesibanga amaadhi ni gatagwa, olw'abantu okuba nga bakoze ebibi ni bakusungughaza, aye ku nkomerero ni bamala balekayo okukola ebibi ng'omaze okubabonereza, era ni bakweghemba nga balingiriire ekifo kino,

²⁷ bawulirenga eyo y'oli mu igulu. Era osonighenga ebibi by'abagheereza bo, Abaisiraeli abantu bo, obeegeresanga okukola ebituufu. Era gwisanga amaadhi ku nsi yo eno, ye wagha abantu bo okuba omugabo gwaibwe.

²⁸ “Mu nsi bwe munaagwangamu endhala, oba ni mubaamu endwaire ya kawumpuli, oba ebirime ni bifungalala ni biidhaku obukuku, oba ni byonoonebwa enzige oba ebisiisa ebindi, oba abazigu ni balumba abantu bo mu kindi ku bibuga byaibwe, oba ni ghabaagho ekibamba kyonakyona oba okulumizibwa kwonakwona,

²⁹ memale abantu bo Abaisiraeli ni bakusaba nga bakweghemba nga bayandhululiza emikono okugyolekeza eisinzizo lino, omuntu omulala ku lulwe yenka oba boonaboona aghalala, olw'enaku ebaluma ku mwoyo,

³⁰ bawulirenga eyo y'oli mu igulu, era obasonighenga. Kiisi muntu omukoleranga ku bibye nga bw'agwaniire, kuba iwe wenka, niiwe oidhi emyoyo gy'abantu.

³¹ Olwo bakutyenga ekiseera kyonakyona kye balimala mu nsi ye wagha badhaadha baife.

³² “Omusenze ataba mu bantu bo Abaisiraeli, bw'anaavanga mu nsi ey'eghala ng'awuliire nga bw'oli omukologho, era ow'obuyinza, era nga bw'okola eby'amaani ebitaloodheka, memale n'aidha okukusinza ng'alingiriire eisinzizo lino,

³³ wuliranga by'akusaba eyo y'oli mu kifo kyo mu igulu. Olwo abantu boonaboona mu nsi basobole okukumanha era n'okukutya ng'oti n'abantu bo Abaisiraeli bwe bakuwulira. Era bamanhe bati eisinzizo lino lye nzimbye, n'ekifo eky'okukusinzizangamu.

³⁴ “Abantu bo bwe banaajanga y'onaabanga ng'obatumye okulwanisa abazigu baibwe, memale ni bakusaba nga balingiriire ekibuga kino kye walonda, era nga balingiriire eisinzizo lino lye nkuzimbiire,

³⁵ wuliranga okusaba kwaibwe nga bakweghemba eyo y'oli mu igulu, era obaghenga bye bakusaba.

³⁶ “Abantu bo bwe banaakolanga ebibi y'oli, nga bwekiri nti ghazira muntu atakola kibi, memale n'obasungughalira era n'oleka abazigu baibwe ni babaghangula era ni babatwala nga banhage mu nsi ey'abazigu k'ebe ey'okumpi oba ey'eghala,

³⁷ aye ni bamala beerowooza nga bali eyo mu nsi ye baatwalibwa ng'abanhage, ni beenenia era ni bakweghemba bati, ‘Twayonoona, twadaaliima era twakola ebibi’,

³⁸ bawulirenga bwe baneenenianga n'omwoyo gwaibwe gwonagwona nga bali eyo mu nsi y'abazigu baibwe abaabatwala nga banhage. Era obawulirenga bwe banaakusabanga nga balingiriire ensi yaibwe ye wagha badhaadha baibwe, era nga balingiriire ekibuga kye walonda, era n'eisinzizo lino lye nkuzimbiire.

³⁹ Wuliranga bye bakusaba nga bakweghemba eyo y'oli mu igulu, era obaghenga bye bakusaba. Sonighanga abantu bo abo olw'okukola ebibi y'oli ni bakusungughaza.

⁴⁰ “Wo Musengwa Katonda, mpegaano ni tulingeku n'amaiso go era otege kutu wo, owulire bye tukusaba mu kifo kino.

⁴¹ Wo Musengwa Katonda waife, situkiramu otyame mu kifo kyo, obeemu n'Esanduuku yo ey'Endagaano eyoleka obukumu bwo. Bakabona bo baleetere okukolanga ebituufu buliidho, ekyo kibenga ng'ekivaalo ekitabavaaku; era abo abakutya baleetere okukubanga emizira olw'eisanhu.

⁴² Wo Musengwa Katonda waife, kola nga bwe wasuubiza omugheereza wo Daudi, otamusuula ere oyo kyabazinga ye walonda.”