2 Ebyomubyanda 5 - Baibuli Ekibono kya Katonda 2014

¹ Mu nsambo eyo omulimo gwonagwona kyabazinga Solomoni gwe yakola ku isinzizo gwawa. Era Solomoni oyo yaingiza mu isinzizo eryo ebintu byonabyona lata we Daudi bye yaghaayo okubanga ebya Musengwa Katonda: feeza, ni zaabu, n'ebikozesebwa byonabyona, yaabitereka mu iterekero ery'eisinzizo lya Katonda.

Esanduuku ey'Endagaano bagireeta mu isinzizo

² Agho kyabazinga Solomoni yaayeta abakulembeze boonaboona ab'omu Isiraeli, n'abakulu b'ebika n'abakulu b'enda dh'abantu, okwidha y'ali e Yerusalemu, baje batoole Esanduuku ey'Endagaano ya Musengwa Katonda mu kyetebwa Ekibuga kya Daudi, ekyo nga ni Sioni.

³ Kale abantu boonaboona beesoloza ewa kyabazinga Solomoni ku Kibinuko eky'Entindi, mu mwezi ogwomusanvu.

⁴ Abakulu ab'ebika ab'omu Isiraeli boonaboona bwe baidha, Abalevi baabbeeda Esanduuku ey'Endagaano,

⁵ baagitwala mu isinzizo. Era bakabona nga bali ghalala n'Abalevi abo, baatwala n'Eweema ey'Okwagaananirangamu ni Musengwa Katonda, ghalala n'ebintu byonabyona ebitukuvu ebyali mu Weema eyo, byona baabitwala mu isinzizo.

⁶ Agho kyabazinga Solomoni n'Abaisiraeli boonaboona abaali beesoloiza gh'ali, baaba agho mu maiso g'Esanduuku ey'Endagaano, era baaghaayo ente n'entaama ng'omusengo, nga tidhibalika olw'obungi.

⁷ Kale bakabona baaleeta mu isinzizo Esanduuku ya Musengwa Katonda ey'Endagaano, baagita mu kifo kyayo munda mu isinzizo, mu Kifo Ekitukuvu Einho, ghansi gh'amaghagha ag'ebitonde ebyetebwa bikerubi

⁸ kuba bikerubi ebyo byakolebwa nga byandhulwiza amaghagha gabyo, era nga ghansi gh'amaghagha ago n'aghali ekifo kye bataamu Sanduuku eyo n'emiti gyayo egy'okugibbeedesa.

⁹ Emiti egyo gyali mireeyi inho, ng'omuntu ali mu isinzizo ng'ali mu maiso g'Ekifo Ekitukuvu aghanga okubona enkomerero yagyo, aye ng'ole ali kuliya taghanga kugibona. Emiti egyo gikaaliyo ni ye buli eno.

¹⁰ Mu Sanduuku ey'Endagaano eyo timwalimu kintu kindi, okutoolaku ebibaadho by'amabaale ebibiri, Musa bye yagitaamu ku lusozi Sinai, Musengwa Katonda bwe yakola endagaano n'Abaisiraeli nga baviire mu nsi Misiri.

Ekitiisa kya Musengwa Katonda

¹¹ Bakabona boonaboona abaaligho, baali bamaze okwetukuza. Kale boonaboona baaseeta aghazira kufaayo ku bikunsu byaibwe bye baabangamu.

¹² Ate Abalevi abembi boonaboona: Asafu, ni Hemani, ni Yeduthuni, ghalala ni batabane baibwe n'aboluganda lwaibwe, baayemerera ku luuyi lw'alutaari olw'e buvandhuba nga bali mu bivaalo ebyakolebwa mu lugoye olughegheevu era nga bagemye ebide, n'entongooli, n'endingidi. Baali nga beemereire ghalala ni bakabona kikumi n'abiri (120) abafuuyi b'amagwala.

¹³ Agho abembi n'ab'ebivuga baakwania amamiro, nga basaaka era nga beebaza Musengwa Katonda. Baagemagania ghalala mu lwembo amamiro gaibwe, n'ag'amagwala, n'ebide, n'ebivuga ebindi, bati: “Musaake Musengwa Katonda kuba mulungi, okugonza kwe tikukoma, kubaagho byanda na byanda.” Agho ekire kyagema woonawoona mu isinzizo,

¹⁴ nga bakabona tibakaasobola kusigalamu kukola gwa bugheereza olw'ekire ekyo, kuba ekitiisa kya Katonda kyabuna woonawoona mu isinzizo.