2 Ebyomubyanda 36 - Baibuli Ekibono kya Katonda 2014

Kyabazinga Yehoahazi owa Buyudaaya

¹ Agho abantu ab'omu Buyudaaya baalonda Yehoahazi mutabane wa Yosia, baamufuula kyabazinga mu kifo kya lata we oyo mu Yerusalemu.

² Yehoahazi yali agheza emyaka amakumi abiri n'esatu egy'obukulu ghe yafuukira kyabazinga wa Buyudaaya. Era yaafugira entangama ya myezi esatu mu Yerusalemu.

³ Kyabazinga Neko owa Misiri yaamutoola ku bwakyabazinga mu Yerusalemu, era yaaleetera Buyudaaya okughanga omusolo gwa talanta kikumi edha feeza ni talanta ndala eya zaabu.

⁴ Kyabazinga Neko oyo yaatoola Eliakimu muganda wa Yehoahazi, yaamufuula kyabazinga wa Buyudaaya ni Yerusalemu. Era yaakyusa n'eriina lya Eliakimu, yaamutuuma Yehoiakimu. Yaagema Yehoahazi muganda wa Yehoiakimu oyo, yaamutwala e Misiri.

Kyabazinga Yehoiakimu owa Buyudaaya

⁵ Yehoiakimu yali agheza emyaka amakumi abiri n'etaanu egy'obukulu ghe yafuukira kyabazinga wa Buyudaaya. Era yaafugira entangama ya myaka ikumi na mulala mu Yerusalemu. Yaakolanga ebibi ebitaasiimya Musengwa Katonda we.

⁶ Kyabazinga Nebukadinezzari ow'e Babilonia yaidha yaamulwanisa, era yaamala yaamusiba ku ndhegere, yaamutwala e Babilonia.

⁷ Nebukadinezzari oyo yaatoola n'ebindi ku bintu ebyakozesebwanga mu isinzizo lya Musengwa Katonda, yaabitwala yaabita mu kisaagaati kye eky'obwakyabazinga e Babilonia.

⁸ Ebindi byonabyona ebigema ku kyabazinga Yehoiakimu, omuli ebyenhinhalwa bye yakola, n'ebindi bye baamuvuunaana, byaghandiikibwa mu Kitabo ky'Ebyafaayo bya Bakyabazinga ba Isiraeli ni Buyudaaya. Mutabane we Yehoiakini yaamusikira ku bwakyabazinga.

Kyabazinga Yehoiakini owa Buyudaaya

⁹ Yehoiakini yali agheza emyaka munaana egy'obukulu ghe yafuukira kyabazinga wa Buyudaaya. Era yaafugira entangama ya myezi esatu n'enaku ikumi mu Yerusalemu. Yaakolanga ebibi ebitaasiimya Musengwa Katonda.

¹⁰ Agho omwaka nga guli kutoolera, ekiseera ebimera kye bisibukiramu, kyabazinga Nebukadinezzari yaatwala Yehoiakini e Babilonia nga musibe, yaatwala n'ebintu eby'omughendo eby'omu isinzizo. Yaataagho Zedekia muganda wa Yehoiakini oyo, yaamufuula kyabazinga wa Buyudaaya ni Yerusalemu.

Kyabazinga Zedekia owa Buyudaaya

¹¹ Zedekia yali agheza emyaka abiri na mulala egy'obukulu ghe yafuukira kyabazinga. Era yaafugira entangama ya myaka ikumi na mulala mu Yerusalemu.

¹² Yaakolanga ebibi ebitaasiimya Musengwa Katonda we. Yaaloba n'okugondera Yeremia omulanzi, ng'aidhie okumukobera Musengwa Katonda oyo bye yamutuma.

Ekibuga Yerusalemu bakizikiriza

¹³ Zedekia era yaadheemera ni kyabazinga Nebukadinezzari, eyali amaze okumulayiza mu Katonda, ng'ali n'okuwuliranga ebiragiro bya Nebukadinezzari oyo. Aye Zedekia oyo yaakola bwa mpwitu era yaakalangusa omwoyo gwe, yaaloba kwenenia kwira eri Musengwa Katonda, Katonda wa Isiraeli.

¹⁴ Ni bakabona abakulu nga kw'otaire n'abakulembeze abantu, boona baakola ebibi einho nga bajiira ku byenhinhalwa byonabyona eby'abamaghanga agandi. Kale baayonoona batyo eisinzizo Musengwa Katonda mwene lye yatukuza mu Yerusalemu.

¹⁵ Musengwa Katonda oyo, Katonda wa badhaadha baibwe yayongera okubagheerezanga abakwenda aghazira kukoogha naire, kuba yali ayenda okubawonia beene era n'okuwonia eisinzizo lye.

¹⁶ Aye baayeeyereza abakwenda ba Katonda baanhooma bye yabakoba, era baasekerera abalanzi be, okutuusa lwe baaleetera Musengwa Katonda oyo okubasungughalira ekibitiriire, nga tibakaasobola kuwona.

¹⁷ Agho Musengwa Katonda yaaleeta kyabazinga w'e Babilonia okwidha okubalwanisa, yaitira abaana baibwe abaakaisuka ni mu isinzizo mwene, aghazira kusaasira muntu waire omulala k'abe mukulu oba muto, musaadha oba mukazi, mulamu oba mulwaire. Musengwa Katonda yaabaghaayo boonaboona mu ngalo edh'abazigu.

¹⁸ Yaatoola n'ebintu byonabyona ebyakozesebwanga mu isinzizo ka bibe ebinene oba ebitono, n'eby'obukombe eby'omu isinzizo, n'eby'obukombe ebya kyabazinga, n'eby'abakungu be, byonabyona yaabitwala e Babilonia.

¹⁹ Yaayokya eisinzizo, yaamenhagho ekimante ekyali kyezungulula Yerusalemu, yaayokya amayumba gaamu goonagoona, era yaazikiriza n'ebintu byamu ebirungi byonabyona.

²⁰ Yaatoola abo abaawonagho mu lutalo, yaabatwala e Babilonia. Baabanga eyo nga bamugheereza era baamala baagheereza n'abaamwiririra ng'aviiregho, okutuusa obwakyabazinga obw'e Perusia bwe bwaidhagho.

²¹ Ekyo kyabaagho okutuukiriza Musengwa Katonda bye yayogera ng'abita mu Yeremia omulanzi, ati: “Ensi erirekebwa agho etyo okumala entangama ya myaka nsanvu ng'ewuumula, olw'okwesasuuza ekiwuumulo kya Sabbato kye baali tibakuzanga.”

Kyabazinga Kuro alagira Abayudaaya okwirayo mu nsi yaibwe

²² Mu mwaka ogwasooka ogwa kyabazinga Kuro okufuga Perusia, Musengwa Katonda yatuukiriza ekyo kye yayogera ng'abita mu Yeremia omulanzi. Musengwa Katonda oyo yaleetera kyabazinga Kuro oyo okulangirira ekiragiro mu bwakyabazinga bwe bwonabwona, era yaakita mu bughandiike ati:

²³ “Kyabazinga Kuro ow'e Perusia akoba ati: Musengwa Katonda, Katonda ow'eigulu, yampa obwakyabazinga bwonabwona obw'oku nsi, era ampaire obuvunaanizibwa okumuzimbira eisinzizo e Yerusalemu ekiri mu Buyudaaya. Kale ni buli muntu ku imwe abantu be, aje eyo. Nsaba Musengwa Katonda oyo abe n'imwe mwenamwena abantu be.”