2 Ebyomubyanda 32 - Baibuli Ekibono kya Katonda 2014

Abassiria batiisatiisa Yerusalemu

¹ Ebyo Hezekia bye yakola n'obwesigwa nga bimaze okuwa, Sennakeribu kyabazinga w'e Assiria yaidha okulumba Buyudaaya. Yaasimba weema dhe kumpi n'ebibuga ebyezungulwirwa ebimante ebigumu, ng'asuubira okubighangula abigeme.

² Hezekia bwe yabona nga Sennakeribu aidhie, era nga mwetegefu okulwanisa Yerusalemu,

³ yaaba ghalala n'abakungu be era n'abasaadha be ab'amaani, baategeka okusemba ensulo edh'amaadhi edhaali kuliya kw'ekibuga.

⁴ Agho abantu kamaala beesoloza, baasemba ensulo dhoonadhoona edh'amaadhi era n'akaiga akaakuuluuliranga mu kiketezo ekyo, nga bakoba bati: “Tusobola tutya okuleka obuleke bakyabazinga ba Assiria okwagaana amaadhi amangi gatyo nga baidhie?”

⁵ Agho kyabazinga yaazimba n'omwoyo mulala ekimante eky'oku kibuga ekyali kimenheibwagho, era yaakizimbaku n'ebituuti ebirengererwaku. Yaazimba n'ekimante ekindi kuliya ku ekyo. Yaalongoosa mu Kibuga kya Daudi, ekifo kye baidhuzaamu eitaka olw'okwekuuma abazigu, ekyayetebwanga Millo, kyaba kigumu inho. Yaakola eby'okulwanisa kamaala n'engabo kamaala inho.

⁶ Abantu yaabataaku abaduumizi b'amagye babalabirire, era yaabasololeza ghe yali mu luya olw'oku mulyango gw'ekibuga. Agho yaayogera nabo ng'abagumya ati:

⁷ “Mube bagumu era nga muli bamalirivu. Mutatya era mutawaamu maani olw'okubona kyabazinga w'e Assiria, oba olw'okubona eigye lye einene, kuba ife tuli n'ali n'amaani okusinga abo.

⁸ Mwene ali na igye lya bantu buntu, aye ife tuli ni Musengwa Katonda waife, nga n'atubeera era nga n'atulwaniragho entalo dhaife.” Agho abantu bairamu amaani olw'ebyo kyabazinga Hezekia owa Buyudaaya bye yabakoba.

⁹ Ebyo nga biwoire, kyabazinga Sennakeribu ow'e Assiria eyali ng'azingiiza Lakishi n'amagye ge goonagoona, yaatuma abagheereza be eri kyabazinga Hezekia owa Buyudaaya, n'eri abantu b'omu Buyudaaya boonaboona abaali e Yerusalemu. Yaakoba ati:

¹⁰ “Kyabazinga Sennakeribu ow'e Assiria akoba ati, ‘Kiki ekiri kubeesiguza, ni mulinda babazingirize mu Yerusalemu?’

¹¹ Hezekia bw'abakoba ati, ‘Musengwa Katonda waimwe aidha kubawonia Abassiria,’ mulowooza muti aba tali kubasendasenda kubaghaayo, olwo mufe endhala n'endiwo?

¹² Hezekia mwene oyo ti n'eyatoolagho alutaari n'ebifo ebigulumivu eby'okusinzizaamu, memale n'alagira abantu b'omu Buyudaaya ni mu Yerusalemu okusinzizanga mu maiso g'alutaari endala obulala eti, era nga ku yeene eyo kwe bali n'okuniokezanga n'obubbaani?

¹³ Timwidhi nze ni badhaadha bange kye twakola abantu abamaghanga agandi? Mulowooza muti bakatonda ab'abantu b'omu nsi edho baasobola okubaaku kye bakola, okuwonia ensi dhaibwe badhitoole mu buyinza bwange?

¹⁴ Mundageku katonda yeenayeena, ku bakatonda boonaboona ab'amaghanga ago badhaadha bange ge baasaaniagho, eyasobola okutoola abantu be mu ngalo dhange n'abawonia. Obwo mperaano imwe kiki ekibalowoozesa nti Katonda waimwe aidha kusobola okubawonia, abatoole mu buyinza bwange?

¹⁵ Kale ni mulobe kuganha Hezekia kubaguyaguya waire okubasendasenda atyo, mutaikiriza by'abakoba; kuba oba nga ghazira katonda yeenayeena wa ighanga oba wa bwakyabazinga, eyaali asoboireku okuwonia abantu be n'abatoola mu buyinza bwange oba mu bwa badhaadha bange, memale olwo Katonda owaimwe anaabawonia atya n'abatoola mu buyinza bwange?”

¹⁶ N'abakungu ba Assiria boona baayongera okwo okuvuma Musengwa Katonda n'omugheereza we Hezekia, era baasinza nagho.

¹⁷ Era kyabazinga w'e Assiria yaaghandiika embaluwa ey'okunhooma n'okuvuma Musengwa Katonda, Katonda wa Isiraeli, ng'akoba ati: “Nga bakatonda b'omu maghanga ag'omu nsi edhindi bwe bataawonia bantu baibwe kubatoola mu buyinza bwange, ni Katonda wa Hezekia yeena atyo bw'ataidha kuwonia bantu be kubatoola mu buyinza bwange.”

¹⁸ Baasoma ebibono ebyo nga baasiikana mu lulimi lw'Abayudaaya, nga benda okutiisatiisa n'okumala amaani mu bantu b'e Yerusalemu abaali ku kimante eky'oku kibuga, olwo ekibuga ekyo kibanguyire okukigema.

¹⁹ Baayogera ku Katonda wa Yerusalemu mu nsambo n'endala nga bwe boogera ku bakatonda b'amaghanga agandi, abantu bye baakola obukole n'engalo.

²⁰ Agho kyabazinga Hezekia ni Isaia omulanzi mutabane wa Amozi, baalirira Katonda nga bamusaba okubabeera.

²¹ Musengwa Katonda yaatuma malaika, yaita okumaliragho irala abaisirukale boonaboona ab'amaani abaziramu ntete, n'abaduumizi, n'abakulu b'eigye, abaali mu kifo kyabazinga w'e Assiria mwe yasimba weema dhe. Agho kyabazinga w'e Assiria yairayo mu nsi ye nga yeenayeena ensoni dhimugemye. Lwali lulala ng'ali mu isabo lya katonda ye yasinzanga, abandi ku batabane be baamufumita empiima yaafa.

²² Kale atyo Musengwa Katonda yaawonia Hezekia n'abantu ab'omu Yerusalemu, yaabatoola mu buyinza bwa kyabazinga Sennakeribu ow'e Assiria n'obw'abazigu baibwe abandi boonaboona. Yaabaleetera okuba mu miraala ku ndhuyi dhaibwe dhoonadhoona.

²³ Agho abantu kamaala baidha e Yerusalemu nga baleeteire Musengwa Katonda ebirabo, era nga baleeteire ni kyabazinga Hezekia owa Buyudaaya ebintu eby'omughendo. Okuva ku olwo, amaghanga goonagoona gaatanga mu Hezekia oyo ekinhagansi kya maani.

Okulwala kwa Hezekia n'okwekuluntaza kwe

²⁴ Mu biseera ebyo, Hezekia yalwala inho kumpi afe. Agho yaasaba Musengwa Katonda, era Musengwa Katonda oyo yaayogera naye, yaamugha akamanhiso ati aidha kuwona.

²⁵ Aye Hezekia yaamala yeekuluntaza bwekuluntaze, yaaloba kusiima Musengwa Katonda nga bwe kyali kigwaniire, olw'ekirungi kye yamukolera. Kale Musengwa Katonda yaamusungughalira, era yaasungughalira n'abantu b'omu Buyudaaya, n'ab'omu Yerusalemu.

²⁶ Aye Hezekia yaamala yaagonda ghalala n'abantu ab'omu Yerusalemu, era baalekera agho okwekuluntaza. Kale Musengwa Katonda yaaloba kubamaliraku busungu bwe mu biseera bya Hezekia oyo.

Obukombe n'ekitiibwa Hezekia bye yali nabyo

²⁷ Hezekia yafuuka mukombe inho era yaaba wa kitiibwa ekitaloodheka. Yaazimba amaterekero ag'okutangamu, feeza, ni zaabu, n'amabaale ag'omughendo, n'obuwoowo, n'engabo, n'ebintu ebindi eby'omughendo.

²⁸ Yaaba n'amaterekero ag'engaano, n'omwenge ogw'emizabbibu, n'omuzigo ogw'ebibala eby'emiti emyoliva, n'ebigo by'ensolo edh'okwaya edha buli nsambo, n'ebisibo by'entaama.

²⁹ Era yaazimba ebibuga kamaala, yaafuna entaama n'embuzi n'ente kamaala, kuba Katonda yamugha ebintu kamaala inho.

³⁰ Era Hezekia mwene oyo, n'eyasemba omweta ogw'amaadhi ogw'eitale, ogw'ensulo ya Gihoni. Yaasimagho ogundi ogwaleetera amaadhi ago okukuuluulira ku luuyi olw'e bugwandhuba bw'ekibuga kya Daudi. Hezekia oyo ebintu byonabyona byamujiiranga bukalamu.

³¹ Era n'abakwenda ab'abakungu b'e Babiloni bwe baidha, nga babatumye okubuuza Hezekia oyo ku byewuninkiriza ebyagwa mu nsi ye, Katonda yamuleka buleke asobole okumuleba, amanhe byonabyona ebiri mu mwoyo gwe.

Enkomerero y'obufuzi bwa Hezekia

³² Ebindi byonabyona ebigema ku Hezekia, omuli n'ebirungi bye yakola, byaghandiikibwa mu Kubonekerwa kwa Isaia Omulanzi mutabane wa Amozi, ni mu Kitabo kya Bakyabazinga ba Buyudaaya ni Isiraeli.

³³ Agho Hezekia yaafa, yeeyimba ku badhaadha be abaafa, era yaaziikibwa mu kitundu eky'eitale mu lwambiidhi lwe baazikangamu baidhukulu ba Daudi. Abantu ab'omu Buyudaaya n'ab'omu Yerusalemu baamulira mu kitiibwa inho. Mutabane we Manasse yaamusikira ku bwa kyabazinga.