2 Ebyomubyanda 30 - Baibuli Ekibono kya Katonda 2014

Okutegeka Ekibinuko eky'Okwidhukiriraku Okubitizibwa

¹ Agho kyabazinga Hezekia yaagheereza obukwenda eri abantu boonaboona ab'omu Isiraeli n'ab'omu Buyudaaya, era yaaghandiikira n'ab'omu kiketezo kya Efuraimu n'ab'omu kya Manasse, ng'abakoba okwidha mu isinzizo e Yerusalemu, bakolere Musengwa Katonda, Katonda wa Isiraeli Ekibinuko eky'Okubitizibwa.

² Kyabazinga oyo yali amaze okwekobaana n'abakungu be, era n'abantu boonaboona abaali beesolokeiza mu Yerusalemu, ng'ekibinuko ekyo ba kukikola mu mwezi gwakubiri.

³ Aye tibaasobola kukikola mu nnaku dhaakyo, kuba omughendo gwa bakabona abaali beetukwiza gwali tigumala, ate n'abantu baali nga tibeesololeiza bukalamu mu Yerusalemu.

⁴ Agho kyabazinga n'abantu boonaboona abaali beesoloiza, baasiima entegeka eyo.

⁵ Kale baalagira kirangirirwe mu Isiraeli yoonayoona, okuva e Beerisheba okutuuka e Dani, nti abantu baidhe e Yerusalemu bakolere Musengwa Katonda, Katonda wa Isiraeli Ekibinuko eky'Okwidhukiriraku Okubitizibwa kuba baali tibakikolangaku nga bali kamaala nga bwe kiragirwa.

⁶ Agho abakwenda baakola nga kyabazinga bwe yalagira, baaja mu Isiraeli ni mu Buyudaaya mwonamwona nga bali n'embaluwa edhiva ye kyabazinga oyo n'abakungu be, edhikoba dhiti: “Imwe Abaisiraeli abaawonagho ni mutatwalibwa bakyabazinga ba Siria, mukyuke mwire eri Musengwa Katonda, Katonda wa Aburahamu, ni Isaaka, ni Isiraeli, memale yeena aire ye muli.

⁷ Mulobe kuba ng'oti ni badhaadha baimwe ni baganda baimwe, abaasungughaza Musengwa Katonda, Katonda wa badhaadha baibwe, n'abaghaayo okuzikirizibwa nga bwe muli kubona.

⁸ Era mulobe kuba na mpwitu ng'oti ni badhaadha baimwe, aye mwegheeyo eri Musengwa Katonda, mwingire mu isinzizo lye, lye yatukuza ebyanda n'ebyanda. Mugheerezenga Musengwa Katonda waimwe, olwo alekere agho okuboolekeza obusungu bwe obubitiriire.

⁹ Bwe munaakyuka ni mwira eri Musengwa Katonda, abo abaatwala baganda baimwe n'abaana baimwe nga basibe, baidha kubagemerwa ekivunika, babalekule baire mu nsi eno kuba Musengwa Katonda waimwe wa kisa era asaasira. Taja kubakuba nkoone nga mwize y'ali.”

¹⁰ Agho abakwenda baaja mu buli kibuga ekiri mu kiketezo kya Efuraimu n'ekya Manasse, era baaja baatuukira irala ni mu kiketezo kya Zebuluni. Aye abantu baayo baabasekerera busekerere era baabanhooma inho.

¹¹ Okutoolaku abatono bati ku b'omu bika, ekya Asheri, n'ekya Manasse, n'ekya Zebuluni, abaagonda ni baidha e Yerusalemu.

¹² Era amaani ga Katonda gaakolera mu Bayudaaya, beeyimba kitole nga bamalirivu okujiira ku kiragiro kyabazinga n'abakungu be, kye baabagha nga Musengwa Katonda bwe yalagira.

Okukuza Ekibinuko eky'Okwidhukiriraku Okubitizibwa

¹³ Agho abantu kamaala inho beesolokeza e Yerusalemu mu mwezi ogwokubiri, okukuza Ekibinuko eky'Emigaati Egitazimbulukusiibwa.

¹⁴ Baasitukiramu, baatoolagho alutaari dhoonadhoona edhaali mu Yerusalemu, edhaagheerwangaku emisengo n'okuniokezebwangaku obubbaani, baadhisuula mu kaiga Kiduroni.

¹⁵ Ku lunaku olweikumi n'eina olw'omwezi ogwokubiri, baita entaama ento edh'okukuza Ekibinuko eky'Okwidhukiriraku Okubitizibwa. Bakabona n'Abalevi abaali nga bakaali kwetukuza, ensoni dhaabagema, baaja beetukuza era baamala baaleeta mu isinzizo ebigheebwayo ebyokebwa.

¹⁶ Baayemerera mu bifo byaibwe, ng'Amateeka ga Musa omusaadha wa Katonda bwe galagira. Abalevi baatwaliranga bakabona omusaayi ogw'emisengo, ate bakabona baagumansiranga.

¹⁷ Mu bantu abaali beesoloiza, mwalimu kamaala abaali nga tibeetukwiza. Kale Abalevi baaja nga baitira buli muntu ku abo entaama ento ey'Ekibinuko eky'Okwidhukiriraku Okubitizibwa, esobole okugheebwayo eri Musengwa Katonda.

¹⁸ Era mu bantu abaali kamaala batyo, mwalimu bangi ku baava mu bika, ekya Efuraimu, n'ekya Manasse, n'ekya Issakari, n'ekya Zebuluni, abaali nga tibeetukwiza. Olwo baaba nga bali kukuza Ekibinuko eky'Okwidhukiriraku Okubitizibwa mu nsambo etali ntuufu. Aye Hezekia yali amaze okubasabira ng'akoba ati: “Musengwa Katonda omulungi asonighe buli muntu,

¹⁹ ali kusinza Musengwa Katonda, Katonda wa badhaadha baife oyo n'omwoyo omulala, waire ng'omuntu oyo tiimulongoofu ng'amateeka g'eisinzizo bwe galagira.”

²⁰ Musengwa Katonda yaawulira Hezekia kye yamusaba, yaasonigha abantu yaaloba kubakolaku kabi.

²¹ Agho Abaisiraeli abaali beesololeiza mu Yerusalemu, baamala enaku musanvu nga bali kukola embaga ey'Ekibinuko eky'Emigaati Egitazimbulukusiibwa mu kusagamba okungi. Abalevi ni bakabona baasaakanga Musengwa Katonda buli lunaku, nga bakuba ebivuga n'amaani gaibwe goonagoona.

²² Hezekia yaasiima Abalevi abaayoleka obukugu mu kugheereza Musengwa Katonda. Yaayogera nabo ng'abaizaamu amaani. Kale abantu baamala enaku musanvu nga bali kulya ebyali ku kibinuko. Baaghaayo emisengo egy'okutabagana n'egy'okwebaza eri Musengwa Katonda, Katonda wa badhaadha baibwe.

Ekibinuko ekyokubiri

²³ Agho boonaboona abaali beesoloiza, baasalagho okumala enaku edhindi musanvu nga bali kukuza ekibinuko ekyo. Kale baamala enaku edhindi musanvu nga bali kukikuza mu kusagamba.

²⁴ Kyabazinga Hezekia owa Buyudaaya yaagha abantu abo boonaboona ente enume lukumi (1,000) n'entaama kasanvu (7,000), edh'okughaayo ng'ebigheebwayo. N'abakungu ba kyabazinga boona baagha abantu abo ente enume lukumi (1,000) n'entaama omutwalo mulala (10,000). Era bakabona bangi inho beetukuza.

²⁵ Kale abantu abeesoloza ab'omu Buyudaaya, ghalala ni bakabona, n'Abalevi, n'abantu abeesoloza okuva mu Isiraeli, n'abantu ab'endha abaasenga mu Isiraeli ni mu Buyudaaya, boonaboona baasagamba.

²⁶ Era ekibuga Yerusalemu kyaidhula okusagamba, kuba ghaali tighabangaghooku kiri ng'oti n'ekyo, okuva mu biseera bya Solomoni mutabane wa Daudi, kyabazinga wa Isiraeli.

²⁷ Agho bakabona n'Abalevi baasituka, baasabira abantu enkabi. Katonda yaawulira amamiro gaibwe, yaasiima okusaba kwaibwe mu kifo kye ekitukuvu y'aba mu igulu.