2 Ebyomubyanda 3 - Baibuli Ekibono kya Katonda 2014

¹ Kyabazinga Daudi, lata wa Solomoni, yali yamala ira okutegeka ekifo eky'okuzimbamu eisinzizo. Ekifo ekyo kyali mu Yerusalemu ku lusozi Moria, Musengwa Katonda ye yamubonekera. Ekifo ekyo, Arunani Omuyebusi kye yakubirangamu engaano.

² Agho kyabazinga Solomoni yaatoolera okuzimba mu mwezi ogwokubiri ogw'omwaka ogwokuna kasookanga afuuka kyabazinga.

³ Eisinzizo kyabazinga Solomoni oyo lye yazimbira Katonda lyali mita amakumi abiri na musanvu mu buleeyi, ate mu bugazi lyaba mita mwenda.

⁴ Baalizimbaku ekisasi emberi waalyo nga kya bugazi bwa mita mwenda okwagayaga n'obugazi bw'eisinzizo eryo, ate nga mu bugungumavu kya mita amakumi ataanu na ina. Munda ku bimante, baalimbyaku zaabu omukenenule.

⁵ Ekisenge ekinene baakighembaku embaawo edh'emiti emisipuressi, ate ku ngulu kwadho baalimbyaku zaabu omukenenule era baatonaku ebifaananie eby'emiti eminaazi n'eby'endhegere.

⁶ Baatonatona eisinzizo n'amabaale ag'omughendo, era baalitonatona ni zaabu eyava mu nsi y'Abaparavi.

⁷ Baalimbya zaabu oyo ku bimante byalyo, ni ku mbaawo edh'akasolya kaalyo, ni ku myango egy'emiryango gyalyo, ni ku ndhigi dhaalyo. Era ku bimante byalyo ebyo yaatonaku ebifaananie eby'ebitonde ebiri n'amaghagha ebyetebwa kerubi.

⁸ Baazimba ekisenge eky'omunda ekyetebwa Ekifo Ekitukuvu Einho, nga mu buleeyi kiri mita mwenda ate ni mu bugazi mwona kyaba mita mwenda nga kyagayaga n'eisinzizo eryo mu bugazi. Baalimbya ku bimante by'Ekifo Ekitukuvu Einho ekyo zaabu omukenenule agheza talanta lukaaga (600).

⁹ Okukola emisumaali kwatwala zaabu agheramu obuzito bwa guraamu ebikumi bitaanu na nsanvu (570). Era ebimante ebya ghaigulu byona baabirimbyaku zaabu.

¹⁰ Yaakola ebifaananie eby'ebitonde bibiri ebiri n'amaghagha ebyetebwa kerubi, yaabita mu Kifo Ekitukuvu Einho. Yaabikola nga bya muti, era byombi yaabirimbyaku zaabu, yaabibunia.

¹¹ Amaghagha ga bikerubi ebyo byombi gaakolebwa nga mandhuluze, era nga gagheza mita mwenda mu buleeyi. Eighagha eirala erya kikerubi ekisooka lyali ligheza mita ibiri n'obutundu bubiri mu buleeyi, era nga lituuka ku kimante ky'eisinzizo ku luuyi olundi. Ate eighagha lyakyo eryokubiri nga lyona ligheza mita ibiri n'obutundu bubiri, lyagema ku ighagha eirala erya kikerubi ekyokubiri, lyona eryali nga ligheza mita ibiri n'obutundu bubiri mu buleeyi.

¹² Ate eighagha eryokubiri erya kikerubi ekyo ekyokubiri, lyona nga ligheza mita ibiri n'obutundu bubiri mu buleeyi era lyatuuka ku kimante ky'eisinzizo ku luuyi olundi.

¹³ Amaghagha ga bikerubi ebyo byombi geeyandhuluza mu bugazi bwa mita mwenda, era byayemerera nga biringiriire mu ekisenge ky'eisinzizo ekya ghagati.

¹⁴ Agho baakola olutimbe olw'omu Kifo Ekitukuvu Einho, mu ngoye edh'erangi ya bbululu, n'edh'eya nakasooma, n'edh'eya kasaayisaayi, n'empegheevu. Era olutimbe olwo baalutonatonamu ebifaananie bya bikerubi.

Empango edh'ekyuma eky'ekikomo

¹⁵ Emberi gh'eisinzizo baakoleragho empango ibiri, nga dhigheza mita ikumi na itaanu obuleeyi, era nga buli ndala eriku omutwe ogugheza emita eibiri n'obutundu obubiri mu buleeyi.

¹⁶ Buli mutwe ogwali ku buli mpango, yaagukoleraku ebifaananie eby'endhegere edhirukiibwa ng'oti katimba, n'ebifaananie by'emikomamawanga kikumi.

¹⁷ Baasimba empango edho dhombi gha kisasi ky'eisinzizo, eyindi ku luuyi olw'omukono omusaadha olw'e buvandhuba, ate eyindi ku luuyi olw'omukono omugooda olw'e buvandhuba. Ey'oku luuyi olw'omukono omusaadha olw'e buvandhuba baagituuma eriina Yakini, ate ey'oku luuyi olw'omukono omugooda olw'e buvandhuba baagituuma eriina Boazi.