2 Ebyomubyanda 29 - Baibuli Ekibono kya Katonda 2014

Kyabazinga Hezekia owa Buyudaaya

¹ Hezekia yafuuka kyabazinga wa Buyudaaya ng'agheza emyaka amakumi abiri n'etaanu egy'obukulu, era yaafugira entangama ya myaka amakumi abiri na mwenda mu Yerusalemu. Inhina nga bamweta Abiya mughala wa Zekaria.

² Hezekia yaakolanga ebituufu Musengwa Katonda by'asiima, ng'oti n'ebyo dhaadha we Daudi bye yakolanga.

Okutukuza eisinzizo

³ Mu mwezi gwe yatooleramu okufuga mu mwaka gwe ogwasooka, yaigulagho endhigi dh'eisinzizo era yaalirongoosa.

⁴ Yaingiza bakabona n'Abalevi, beesololeza mu luya lw'eisinzizo ku luuyi olw'e buvandhuba.

⁵ Yaabakoba ati: “Imwe Abalevi mumpulirise. Mukole mwetukuze, era mutukuze n'eisinzizo lya Musengwa Katonda, Katonda wa badhaadha baimwe. Ekifo ekitukuvu kino mukitoolemu ebyo byonabyona ebikireetera okwonooneka.

⁶ Badhaadha baife baakola ebibi baaloba kuba beesigwa eri Musengwa Katonda waife. Baamuvaaku, era n'ekifo ky'abaamu baakikuba bwa nkoone.

⁷ Baigalagho endhigi edhingira mu isinzizo, baazikiza entaala, era baaloba okuniokeza obubbaani, waire okughaayo ebigheebwayo ebyokebwa eri Katonda wa Isiraeli, mu kifo kye ekitukuvu.

⁸ Musengwa Katonda kyeyava n'asungughalira ab'omu Buyudaaya n'ab'omu Yerusalemu, yaabatuusa ku buzibu obuleetera buli muntu okubeewuunhia n'okubeesiimooza, nga bwe mukyeboneraku beene n'amaiso gaimwe.

⁹ Balata baife babaitira mu ntalo, ate bakazi baife ni batabane baife era ni baghala baife, baabatwala mu bunhage.

¹⁰ “Mperaano nsazeegho okukola endagaano ni Musengwa Katonda, Katonda wa Isiraeli, olwo alekere agho okutwolekeza obusungu bwe obubitiriire.

¹¹ Baana bange, mutalwa naire, kuba Musengwa Katonda abalonze okwemereranga mu maiso ge, mumugheereze nga mumusinza era nga mumuniokeza obubbaani.”

¹² Agho Abalevi bano baasituka: Ku b'oku nda ya Kohathi mwalimu, Mahathi mutabane wa Amasai, ni Yoeli mutabane wa Azaria. Ku b'oku nda ya Merari mwalimu, Kishi mutabane wa Abudi, ni Azaria mutabane wa Yehalleleli. Ku b'oku nda ya Gereshoni mwalimu, Yoa mutabane wa Zimma, ni Edeni mutabane wa Yoa.

¹³ Ku b'oku nda ya Elizafani mwalimu, Shimuri ni Yeueli. Ku b'oku nda ya Asafu mwalimu, Zekaria ni Mattania.

¹⁴ Ku b'oku nda ya Hemani mwalimu, Yehueli ni Shimei. Ku b'oku nda ya Yeduthuni mwalimu, Shemaia ni Uzzieli.

¹⁵ Abalevi abo baasoloza Balevi banaibwe, beetukuza. Baingira ni mu isinzizo baalitukuza, nga kyabazinga bwe yabalagira ng'ajiira ku ebyo Musengwa Katonda bye yalagira.

¹⁶ Ate bakabona baingira mu kisenge eky'omunda mu isinzizo, baakirongoosa. Baatoolayo ebyo byonabyona bye baayagaanayo ebitali birongoofu, baabireeta mu luya olw'eisinzizo. Abalevi baabifulumya kuliya, baabitwala baabisuula mu kaiga Kiduroni.

¹⁷ Baatoolera okulongoosa eisinzizo ku lunaku olusooka olw'omwezi ogusooka. Era olunaku olwomunaana olw'omwezi gwene ogwo lwaja okutuuka, nga bamaze okutuuka ku kisasi aghaingirirwa mu isinzizo. Kabiri baakola enaku edhindi munaana nga bategeka eisinzizo okulitukuza. Ku lunaku olweikumi n'omukaaga olw'omwezi gwene ogwo, baamaliriza.

Eisinzizo bairamu okulitukuza

¹⁸ Agho Abalevi baaja ye kyabazinga Hezekia, baamukoba bati: “Isebantu kyabazinga, tumaze okulongoosa eisinzizo lyonalyona, n'alutaari y'ebigheebwayo ebyokebwa ghalala n'ebikozesebwaku byonabyona, n'emeeza kwe bata emigaati egigheereibwayo eri Katonda ghalala n'ebikozesebwaku byonabyona.

¹⁹ Ebikozesebwa byonabyona kyabazinga Ahazi bye yasuula ere, mu biseera bye yaviira ku Katonda, tubitegeike, twabitukuza, era buti biri mu maiso g'alutaari ya Musengwa Katonda.”

²⁰ Agho kyabazinga Hezekia yaasitukiramu ku nkyo, yaayetesa abakulembeze b'omu kibuga, beesoloza baaja mu isinzizo.

²¹ Baaleeta ente enume musanvu, n'entaama enume musanvu, n'entaama ento musanvu, n'embuzi enume musanvu. Ebyo nga n'ekigheebwayo olw'ebibi, ku lw'obwakyabazinga, ni ku lw'eisinzizo, ni ku lwa Buyudaaya. Era yaalagira bakabona baidhukulu b'Aaroni okubigheerayo ku alutaari.

²² Agho baita ente enume, bakabona baatoola omusaayi gwadho baagumansira ku alutaari. Ate baita entaama enume, baatoola omusaayi gwadho baagumansira ku alutaari. Era baita n'entaama ento, omusaayi gwadho gwona baagumansira ku alutaari.

²³ Olwo baaleeta embuzi enume mu maiso ga kyabazinga n'ag'abantu abeesoloiza, ng'ekigheebwayo olw'ebibi, era abo baadhitaaku emikono gyaibwe.

²⁴ Bakabona baadhiita, baayugha omusaayi gwadho ku alutaari, ng'ekigheebwayo olw'ebibi by'Abaisiraeli boonaboona, bisobole okubatoolebwaku kuba kyabazinga yalagira okughaayo ekigheebwayo ekyokebwa n'ekigheebwayo olw'ebibi, ku lw'Abaisiraeli boonaboona.

²⁵ Yaata Abalevi mu isinzizo nga bagemye n'ebide, n'entongooli, n'endingidi, ng'ajiira ku kiragiro Musengwa Katonda kye yagha kyabazinga Daudi, ng'abita mu Gadi omulanzi wa kyabazinga ni Nathani omulanzi.

²⁶ Abalevi baayemerera nga bagemye n'ebivuga bya Daudi, ni bakabona boona baayemerera nga bagemye amagwala.

²⁷ Agho Hezekia yaabalagira bagheeyo ekigheebwayo ekyokebwa ku alutaari. Era omukolo ogw'ekigheebwayo bwe gwatoolera, abantu baatoolera okwembera Musengwa Katonda, n'okufuuwa amagwala, n'okukuba ebivuga bya kyabazinga Daudi owa Isiraeli.

²⁸ Abantu boonaboona abaali beesolokeiza agho, baasinza. Abembi baayemba, n'abafuuyi b'amagwala baagafuuwa. Ebintu byaba bityo, okutuukiza irala ekigheebwayo ekyokebwa lwe kyawaagho.

²⁹ Ekigheebwayo ekyokebwa bwe kyawaagho, kyabazinga n'abaaligho boonaboona baakuba amakiryaivu, baasinza.

³⁰ Kyabazinga Hezekia n'abakungu be baalagira Abalevi okwemba enhembo edhisaaka Musengwa Katonda, edhaayiiyizibwa Daudi ni Asafu omulanzi. Baayemba enhembo edhisaaka nga basangaavu, era baakuba amakiryaivu, baasinza.

³¹ Agho Hezekia yaakoba abantu ati: “Mpegaano ni, nga bwe mumaze okwetukuza ni muba aba Musengwa Katonda, museete muleete mu isinzizo emisengo n'ebigheebwayo olw'okwebaza.” Abantu abaali beesoloiza baaleeta emisengo n'ebigheebwayo olw'okwebaza. Era abandi baaleeta ebigheebwayo ebyokebwa eby'ekyeyendere.

³² Baaleeta ente enume nsanvu (70), n'entaama enume kikumi (100), n'entaama ento ebikumi bibiri (200), ebyo byonabyona byaba ng'ekigheebwayo ekyokebwa eri Musengwa Katonda.

³³ Ebindi bye baaleeta okughaayo bibe ebya Musengwa Katonda, byali ente enume lukaaga (600), n'entaama enkumi isatu (3,000).

³⁴ Aye bakabona baali batono nga tibasobola kwita nsolo edho dhoonadhoona edh'ebigheebwayo ebyokebwa kuba Abalevi baafangayo inho okwetukuza okusinga bakabona. Kale baganda baibwe Abalevi baababeeraku, okutuusa ni bakabona abandi boona bwe baamala okwetukuza ni babeeyimbaku, okutuusa omulimo lwe gwawa.

³⁵ Okwongereza ku bigheebwayo ebyayokebwa byonabyona okuwaagho, ghaaligho n'amasavu ag'ebigheebwayo olw'okutabagana, n'ebigheebwayo ebifukibwa, ebyagheerwayo aghalala n'ebigheebwayo ebyayokebwa ebyo. Kale okusinza okw'omu isinzizo kwaizibwagho kutyo.

³⁶ Agho Hezekia n'abantu boonaboona baasagamba, kuba Katonda yababeera, baakola ebintu ebyo byonabyona amangu gatyo.