2 Ebyomubyanda 28 - Baibuli Ekibono kya Katonda 2014

Kyabazinga Ahazi owa Buyudaaya

¹ Ahazi yaafuuka kyabazinga ng'agheza emyaka amakumi abiri egy'obukulu, era yaafugira entangama ya myaka ikumi na mukaaga mu Yerusalemu. Tiyajiiranga ku mpisa nungi edha dhaadha we Daudi, eyakolanga ebituufu Musengwa Katonda we by'asiima.

² Aye yaajiiranga ku mpisa embi edha bakyabazinga ba Isiraeli, era yaakola n'ebifaananie by'emisambwa Baali, mu kyuma ekisaanuusiibwa.

³ Yaaniokezanga obubbaani mu kiiko kya mutabane wa Hinnomu. Yaatuuka n'okwokyanga batabane be ng'ebigheebwayo, ng'empisa eyenhinhalwa bweyali ey'abamaghanga agandi, Musengwa Katonda be yabinga mu nsi eyo nga Abaisiraeli bali kumpi okutuukayo.

⁴ Yaaghangayo emisengo era yaaniokezanga obubbaani mu bifo ebigulumivu eby'okusinzizaamu, ni ku nsozi, na buli ghansi mu kinsense kya muti muzibirivu.

Buyudaaya erwanisa Siria ni Isiraeli mu lutalo

⁵ Olw'ebibi ebyo Ahazi bye yakola, Musengwa Katonda we kyeyava n'amughaayo ye kyabazinga w'e Siria, yaamughangula, era yaatwala abantu be kamaala inho e Damasiko, nga basibe. Kabiri Musengwa Katonda oyo yaamughaayo ye kyabazinga Peka owa Isiraeli, yaamughangula ng'aise n'abantu be kamaala inho.

⁶ Peka oyo mutabane wa Remalia yaita mu Bayudaaya abantu emitwalo ikumi n'ebiri (120,000) mu lunaku lulala, olw'okuba baava ku Musengwa Katonda, oyo Katonda wa badhaadha baibwe. Abantu abo boonaboona baali abasaadha abaziramu ntete.

⁷ Ate Zikuri omulwani ow'amaani Omuisiraeli ow'omu kika kya Efuraimu, yaita Maaseia mutabane wa kyabazinga Ahazi, ni Azurikamu eyalabiriranga ekisaagaati kya kyabazinga, ni Elukana eyaiririranga kyabazinga mu buyinza.

⁸ Abaisiraeli baagema abakazi Abayudaaya, n'abaana abalenzi n'abaghala, emitwalo amakumi abiri (200,000), baabatwala nga basibe waire nga Abayudaaya abo baluganda lwaibwe. Era baabatoolaku n'ebintu kamaala ng'omunhago omunhago ogwo baagutwala e Samaria.

Omulanzi Odedi

⁹ Aye ghaaligho omulanzi wa Musengwa Katonda ng'aba Samaria, eriina lye nga ni Odedi. Oyo yaaja okweisuusaayo eigye nga liri kwira e Samaria, yaabakoba ati: “Bona eno, olw'okuba Musengwa Katonda, Katonda wa badhaadha baimwe yasungughalira ab'omu Buyudaaya, kyaviire n'abaghaayo ye muli okubaghangula. Aye mperaano awuliire engeri ye mubaiseemu n'obukambwe obutaloodheka.

¹⁰ Ate imwe buti muli kwenda kufuula abantu b'omu Buyudaaya n'ab'omu Yerusalemu, abasaadha n'abakazi, babe bairu baimwe. Aye obwo imwe muzirakuuku bibi byaimwe, bye mwakola ni musungughaza Musengwa Katonda waimwe?

¹¹ Kale ni muwulirise kye nkoba, mwizeeyo abasibe abo kuba baluganda lwaimwe. Bwe mutaakole mutyo, Musengwa Katonda aidha kubabonereza n'obukambwe.”

¹² Agho abandi ku bakulembeze, boona nga ba mu kika kya Efuraimu, baatakania abo abaali bali kwira okuva mu lutalo. Abakulembeze abo nga ni bano: Azaria mutabane wa Yohanani, ni Berekia mutabane wa Meshillemothi, ni Yehizekia mutabane wa Shallumu, ni Amasa mutabane wa Hadulai.

¹³ Baakoba abo abaali bali kwira okuva mu lutalo, bati: “Timwidha kuleeta ghano basibe abo. Ife twakola ebibi twasungughaza Musengwa Katonda mu Isiraeli, era tuli n'omusango munene. Aye ate imwe muli kwenda kwongereza ku bibi bye twakola, ni ku musango gwe tuli nagwo.”

¹⁴ Agho abaisirukale baaleka abasibe n'omunhago mu maiso g'abakulembeze n'ag'abantu boonaboona.

¹⁵ Agho abasaadha bale ab'omu kika kya Efuraimu aboogeirwaku baasituka, baatwala abasibe abaali amadu, baabagha engoye nga batoola ku munhago baabavaaza era baabagha n'engaito. Baabafunira eby'okulya n'eby'okunhwa, era baabasiiga omuzigo ogw'ebibala eby'emiti emyoliva. Abo abaali nga baziramu maani baabatwalira ku ndogoyi, baabatuusa mu boluganda lwaibwe e Yeriko, ekibuga eky'emiti eminaazi. Agho Abaisiraeli bairayo e Samaria.

Kyabazinga Ahazi asaba Assiria obuyambi

¹⁶ Mu biseera ebyo, kyabazinga Ahazi yaasaba kyabazinga w'e Assiria okumubeera,

¹⁷ kuba Abaedomu baali kabiri nga balumbye ab'omu Buyudaaya, baabaghangula era baatwala n'abasibe.

¹⁸ Abafilisiti boona nga balumbye ebibuga eby'omu biketezo eby'omu biiko bya Buyudaaya. Baagema ebibuga bino era baabibaamu: Bethi Shemeshi, ni Aiyaloni, ni Gederothi, ni Soko ghalala n'ebyalo byakyo, ni Timuna ghalala n'ebyalo byakyo, ni Gimuzo ghalala n'ebyalo byakyo.

¹⁹ Ebyo byaligho, kuba kyabazinga Ahazi oyo yakola eidhoogo mu Buyudaaya era yaaloba kuba mwesigwa eri Musengwa Katonda, yaaleetera Musengwa Katonda okusindika ebizibu ku Buyudaaya.

²⁰ Era kyabazinga Tigulathi Pileseri ow'e Assiria bwe yaidha, tiyayamba Ahazi naire, aye yamukiriga bukirige, yaayongera bwa kumweraliikiriza.

²¹ Ahazi yaatoola ku bintu ebyali mu isinzizo, ni mu kisaagaati kye eky'obwakyabazinga, ni mu ndhu edh'abakungu, yaabigha kyabazinga w'e Assiria oyo, aye era byona ghazira kye byamuyamba naire.

Ebibi bya Ahazi

²² Kyabazinga Ahazi oyo, ni mu kiseera kye yabeeramu mu buzibu, yeeyongera bweyongere okukola ebibi eri Musengwa Katonda.

²³ Yaaghaayo emisengo eri bakatonda b'e Damasiko abaamughangula, ng'akoba ati: “Bakatonda b'e Siria baayamba bakyabazinga baayo, zeena ka mbaghe emisengo baanhambe.” Aye byamuviiramu bwa kuzikirira, mwene n'ensi ye yoonayoona.

²⁴ Agho Ahazi yaasoloza ebintu ebikozesebwa mu isinzizo, yaabimenhamenha byonabyona. Yaigalagho eisinzizo, yeekolera alutaari mu buli kifo mu Yerusalemu.

²⁵ Ni mu buli kibuga kya Buyudaaya yaazimbamu ebifo ebigulumivu ebisinzibwamu, eby'okuniokezangaku obubbaani eri bakatonda ab'amaghanga agandi. Ekyo kyaleetera Musengwa Katonda, Katonda wa badhaadha be okumusungughalira.

²⁶ Ebindi byonabyona Ahazi bye yakola, n'empisa dhe dhoonadhoona, okuva mu mainhama okutuuka ku nkomerero, byaghandiikibwa mu Kitabo kya Bakyabazinga ba Buyudaaya n'aba Isiraeli.

²⁷ Agho Ahazi yaafa yeeyimba ku badhaadha be abaafa, era yaaziikibwa mu kibuga Yerusalemu aye ti mu lwambiidhi lwa bakyabazinga. Mutabane we Hezekia yaamusikira ku bwakyabazinga.