2 Ebyomubyanda 27 - Baibuli Ekibono kya Katonda 2014

Kyabazinga Yothamu owa Buyudaaya

¹ Yothamu yafuuka kyabazinga ng'agheza emyaka amakumi abiri n'etaanu egy'obukulu, era yaafugira entangama ya myaka ikumi na mukaaga mu Yerusalemu. Inhina yali nga ni Yerusha mughala wa Zadoki.

² Yothamu yaakolanga ebituufu Musengwa Katonda by'asiima, nga lata we Uzzia bye yakolanga. Aye tiyaghaguza kwingira mu isinzizo kuniokeza bubbaani, ng'oti ni ise bwe yakola waire ng'abantu baaja mu maiso n'okukola ebibi.

³ Yaazimba omulyango ogw'eitale ogw'eisinzizo lya Musengwa Katonda, era yaakola inho ku kuzimba ekimante ekigumu eky'oku kibuga Yerusalemu, mu kitundu ekyetebwa Ofeli.

⁴ Yaazimba ebibuga mu biketezo bya Buyudaaya eby'oku nsozi, era yaazimba ebifo eby'okwewogomamu n'ebituuti ebirengererwaku mu bibira eby'oku nsozi.

⁵ Yaalwanisa kyabazinga w'Abammoni yaamughangula. Abammoni abo baamugha omusolo mu mwaka ogwo, nga gwa talanta kikumi (100) edha feeza, n'ensawo omutwalo mulala (10,000) edh'engaano, n'ensawo omutwalo mulala (10,000) edhindi edha sayiri. Era baamugha omusolo ogwaga n'ogwo, mu mwaka ogwokubiri ni mu gwokusatu.

⁶ Kale Yothamu yaafuuka wa maani, kuba yagonderanga Musengwa Katonda we.

⁷ Ebindi byonabyona Yothamu bye yakola, n'entalo dhe dhoonadhoona dhe yalwana, era n'enkola ye, byaghandiikibwa mu Kitabo kya Bakyabazinga ba Isiraeli n'aba Buyudaaya.

⁸ Yothamu oyo yafuuka kyabazinga ng'agheza emyaka amakumi abiri n'etaanu egy'obukulu, era yaafugira entangama ya myaka ikumi na mukaaga mu Yerusalemu.

⁹ Agho yaafa yeeyimba ku badhaadha be abaafa, era yaaziikibwa mu kyetebwa Ekibuga kya Daudi. Mutabane we Ahazi yaamusikira ku bwakyabazinga.