2 Ebyomubyanda 26 - Baibuli Ekibono kya Katonda 2014

Kyabazinga Uzzia owa Buyudaaya

¹ Agho abantu boonaboona ab'omu Buyudaaya, baalonda Uzzia eyali ng'agheza emyaka eikumi n'omukaaga egy'obukulu, baamufuula kyabazinga okusikira lata we Amazia.

² Uzzia yaiza ekibuga Elothi ku Buyudaaya era yaakizimba buyaaka, nga lata we amaze okufa ni yeeyimba ku badhaadha be abaafa.

³ Uzzia oyo yali agheza emyaka ikumi na mukaaga egy'obukulu, era yaafugira mu Yerusalemu okumala entangama ya myaka ataanu n'ebiri. Inhina nga ni Yekolia ow'e Yerusalemu.

⁴ Uzzia yaakolanga ebituufu Musengwa Katonda by'asiima, nga lata we Amazia bye yakolanga.

⁵ Yeeghaayo yaagheerezanga Katonda, ebiseera byonabyona Zekaria eyamwegeresa okutyanga Katonda oyo bye yamala ng'akaali mulamu. Era Musengwa Katonda yaaleetera Uzzia ebintu okumujiiranga obukalamu, ekiseera kyonakyona Uzzia oyo kye yamala ng'amugheereza.

⁶ Uzzia oyo yaaja yaalumba Abafilisiti, yaabalwanisa, yaamenhagho ebimante eby'oku bibuga, Gathi, ni Yabune, ni Ashidodi. Era yaazimba ebibuga mu biketezo by'e Ashidodi, n'aghandi mu nsi y'Abafilisiti.

⁷ Katonda yaamubeeraku okughangula Abafilisiti, n'Abawarabu abaabanga e Gurubaali, n'Abameuni.

⁸ Abammoni baamughanga omusolo, era yaamanhikana inho okutuukira irala ku nsalosalo ni Misiri, kuba yafuuka wa maani inho.

⁹ Uzzia era yaazimba ebituuti ebirengererwaku, ku kimante ekyezungulwire Yerusalemu ku Mulyango ogw'omu Nsonda, ni ku Mulyango ogw'omu Kiiko, n'ekimante ghe kigonhokera.

¹⁰ Era yaazimba ebituuti ebirengererwaku mu irungu, yaasima n'ensulo kamaala, kuba yali n'ebyayo kamaala mu biketezo eby'omu biiko n'eby'oku museetwe. Era yali n'abalimi abaalabiriranga emizabbibu mu nsozi, ni mu itaka eigimu, kuba yayendanga inho okulima.

¹¹ Uzzia era yali n'eigye ery'abaisirukale abeetegefu okulwana olutalo, nga bali mu bikunsu ebirimu abaisirukale ababaliibwa era ni baghandiikibwa Yeieli omughandiisi ni Maaseia omukungu, nga bombi bakulemberwa Hanania owundi ku baduumizi ba kyabazinga.

¹² Abaduumizi abo baakuliranga enda dha baiseibwe, nga ba maani abaziramu ntete, era nga baghera enkumi ibiri na lukaaga (2,600).

¹³ Abo n'abaaduumiranga eigye ery'abaisirukale emitwalo amakumi asatu n'akasanvu n'ebikumi ebitaanu (307,500), abaabanga n'amaani amangi einho, nga basobola okuyamba kyabazinga okulwanisa abazigu be.

¹⁴ Uzzia yaategekera eigye lyonalyona engabo, n'amafumo, n'enkuufiira edh'ekyuma, n'ebivaalo eby'omu kifuba eby'ekyuma, n'obulaso, n'amabaale ag'okusuula n'ensuumulo.

¹⁵ Abasaadha abakugu baayiiya, baakola mu Yerusalemu ebyuma ebiteebwa ku bituuti ebirengererwaku ni ku nsonda dh'ebimante, ni birasa obusaale era ni bisuula amabaale amanene. Kale yaamanhika inho woonawoona, era yaaba wa maani olw'obuyambi obungi einho bwe yafuna.

Uzzia abonerezebwa olw'okwekuluntaza

¹⁶ Aye kyabazinga Uzzia bwe yafuuka ow'amaani atyo, yaidhamu okwekuluntaza era ekyo kyamuviiraku okugwa kuba yeetulinkiriza yaingira mu isinzizo lya Musengwa Katonda, yaaniokeza obubbaani ku alutaari eniokezebwaku obubbaani.

¹⁷ Aye Azaria kabona, ni bakabona ba Musengwa Katonda kinaana, abasaadha abaziramu ntete, baingira nga bali kumuvaaku einhuma,

¹⁸ baamulobera nga bakoba bati: “Uzzia, ti mulimo gwo okuniokeza Musengwa Katonda obubbaani. Ogwo mulimo gwa bakabona ab'oku lulyo lw'Aaroni abaayawulibwa okubuniosanga. Fuluma mu kifo kino ekitukuvu kuba okoze kisobyo, era Musengwa Katonda taidha kukugha kitiibwa naire olw'ekyo ky'okoze.”

¹⁹ Agho Uzzia yaasungughalira bakabona. Yali ayemereire agho mu isinzizo okuliiraana ni alutaari eniokezebwaku obubbaani, ng'agemye n'ekintu ekiniokezebwamu obubbaani. Bwe yasungughalira bakabona atyo, endwaire ey'ebigenge yaamufukumuka mu kyeni nga bakabona abo babona.

²⁰ Agho Azaria Kabona Omukulu ni bakabona abandi boonaboona, bwe baamulingirira baategeera ng'endwaire ey'ebigenge emufukumwike mu kyeni. Kale baamubinga ave mangu mu isinzizo. Ni mwene yeena yaayangughaku okufulumamu, kuba Musengwa Katonda yali amubonereiza.

²¹ Kyabazinga Uzzia yaaba n'endwaire eyo ey'ebigenge okutuusa lwe yafa. Era olw'okuba yali n'endwaire eyo, yaabanga mu ndhu yiye yenka, nga taikirizibwa kwingira mu isinzizo. Mutabane we Yothamu yaasigala nga n'akulira ekisaagaati kye eky'obwakyazinga, era nga n'afuga abantu b'ensi eyo.

²² Ebindi byonabyona Uzzia bye yakola mu mainhama okutuuka ku nkomerero, byaghandiikibwa Isaia omulanzi, mutabane wa Amozi.

²³ Agho Uzzia oyo yaafa yeeyimba ku badhaadha be abaafa, era yaaziikibwa kumpi nabo, aye nga ti mu lwambiidhi lwa bakyabazinga, kuba abantu baakoba bati: “Ali n'endwaire ey'ebigenge.” Mutabane we Yothamu yaamusikira ku bwakyabazinga.