2 Ebyomubyanda 24 - Baibuli Ekibono kya Katonda 2014

Kyabazinga Yoashi owa Buyudaaya

¹ Yoashi yafuuka kyabazinga wa Buyudaaya, ng'agheza emyaka musanvu egy'obukulu, era yaafuga okumala entangama ya myaka amakumi ana (40) mu Yerusalemu. Eriina lya inhina nga ni Zibia ow'e Beerisheba.

² Yoashi yaakolanga ebituufu Musengwa Katonda by'asiima ekiseera kyonakyona Yehoiada kabona kye yamala nga mulamu.

³ Yehoiada yaamufunira abakazi babiri, yaazaala nabo abaana abalenzi n'abaghala.

⁴ Ebyo nga biwoire, Yoashi yaasalagho okulongoosa eisinzizo.

⁵ Yaasoloza bakabona n'Abalevi, yaabakoba ati: “Mujenga mu bibuga bya Buyudaaya buli mwaka, musolozenga ku Baisiraeli boonaboona empiiya edh'okulongoosanga eisinzizo lya Katonda waimwe. Era mubone ng'ekyo mukikolaku mangu geene.” Aye Abalevi baalwagho okukikola.

⁶ Kale kyabazinga yaayeta Yehoiada omukulu waibwe, yaamukoba ati: “Lwaki tiwasalira Balevi kuleetanga musolo okuva mu Buyudaaya ni mu Yerusalemu, ogwasalibwagho Musa omugheereza wa Katonda, era mwene gwe yatoolanga ku Baisiraeli olw'okulabirira Weema ey'Okwagaananirangamu ni Musengwa Katonda?” (

⁷ Batabane ba Athalia, omukazi omubi oyo, baali bamenhie eisinzizo lya Katonda, baingira era baatoolamu ebintu byonabyona ebyagheebwayo okuba eby'eisinzizo lya Musengwa Katonda eryo, baabigha emisambwa Baali.)

⁸ Kale kyabazinga yaalagira okukola esanduuku, baagita kuliya gha mulyango ogw'eisinzizo.

⁹ Agho baalangirira mu Buyudaaya ni mu Yerusalemu mwonamwona, abantu baleete eri Musengwa Katonda omusolo, Musa omugheereza wa Katonda gwe yata ku Baisiraeli nga bali mu irungu.

¹⁰ Abakungu n'abantu boonaboona baasanhukira ekintu ekyo, era baaleetanga empiiya baadhita mu sanduuku eyo, okutuusa boonaboona lwe baamalayo omusolo gwaibwe. Kale baakolanga batyo buli lunaku, era baasolozanga empiiya kamaala inho.

¹¹ Abalevi baatwalanga esanduuku eyo eri abakungu ba kyabazinga babone ekirimu. Bwe baabonanga nga mughezeemu empiiya kamaala, omughandiisi wa kyabazinga ni Kabona Omukulu baidhanga, baadhitoolamu, ate sanduuku baagiizaayo mu kifo kyayo.

¹² Kyabazinga ni Yehoiada, baagemyanga empiiya edho abo abaalabiriranga omulimo ogw'okulongoosa eisinzizo. Ate abo baapatananga n'abakozi ab'okulongoosa eisinzizo, bano: abazimbisa amabaale, n'ababaadhi, n'abagheesa ebintu mu kyuma eky'ekikomo ni mu kyuma ekigumu einho.

¹³ Abakozi abo baalongoosa eisinzizo baaliiza buyaaka, era baaligumya inho.

¹⁴ Bwe baamala omulimo ogwo, empiiya edhaasigalagho baadhigemya kyabazinga ni Yehoiada. Ate abo baadhigulamu ebintu eby'omu isinzizo, ebikozesebwa mu kusinza ni mu kughaayo ebigheebwayo ebyokebwa: ebintu ebiniokezebwaku obubbaani, n'ebintu ebindi ebya zaabu ni feeza. Ekiseera kyonakyona Yehoiada kye yamala ng'akaali mulamu, abantu baaghangayo mu isinzizo ebigheebwayo ebyokebwa, aghazira kwosaamu.

Abantu bakyusa enkola ya Yehoiada

¹⁵ Aye Yehoiada oyo yaamala yaakairika, era yaafa ng'agheziiza emyaka kikumi n'asatu (130) egy'obukulu.

¹⁶ Baamuziika mu kyetebwa Ekibuga kya Daudi, mu lwambiidhi lwa bakyabazinga, kuba yali akoleire Katonda n'eisinzizo lye ebirungi mu Isiraeli.

¹⁷ Yehoiada bwe yamala okufa, abakungu mu Buyudaaya baaja baakubira kyabazinga amakiryaivu era baakutama n'ebyeni byatuuka ku itaka. Agho kyabazinga yaawulirisa bye baamukoba.

¹⁸ Baava ku kusinzizanga mu isinzizo lya Musengwa Katonda, Katonda wa badhaadha baibwe, baira ku kusinzanga omusambwa omukazi Ashera n'ebisinzibwa ebindi ebitali Katonda. Era Musengwa Katonda oyo yaasungughalira Buyudaaya ni Yerusalemu, olw'omusango gwaibwe ogwo.

¹⁹ Musengwa Katonda yaabagheereza abalanzi okubalabula baire y'ali, aye baaloba kwefiirayo.

²⁰ Agho omwoyo gwa Katonda gwaidha ku Zekaria mutabane wa Yehoiada kabona. Yaayemerera ghaigulu abantu ghe bamubonera obukalamu, yaakoba ati: “Musengwa Katonda akoba ati, lwaki mudheemera ebiragiro bye, ni mwereetera akabi? Nga imwe bwe mwava ku Musengwa Katonda oyo, yeena abalekuliire agho.”

²¹ Aye abantu baamukolera olukwe, baamukubira amabaale mu luya lw'eisinzizo, nga baajiira ku kiragiro kya kyabazinga.

²² Mu ngeri eyo kyabazinga Yoashi yaaloba kwidhukira ekisa Yehoiada kye yamukolera, yaita Zekaria mutabane wa Yehoiada oyo. Zekaria bweyali ali kumpi okufa, yaakoba ati: “Musengwa Katonda agwananga yaabona kino ky'okoze, yaakwesasuulizaaku.”

Enkomerero ey'obufuzi bwa Yoashi

²³ Agho ng'omwaka guli kuwaaku, ab'eigye ly'Abasiria baalumba Yoashi. Baidha mu Buyudaaya ni mu Yerusalemu, baita abakulembeze ab'abantu boonaboona okubasaaniagho, baatoola n'omunhago gwe baanhaga gwonagwona, baagutwala ye kyabazinga ow'e Damasiko.

²⁴ Waire ng'eigye ery'Abasiria lyali itono, Musengwa Katonda yaligha okughangula eigye ly'Abayudaaya eryali eikologho lyene kuba abantu b'omu Buyudaaya baali baviire ku Musengwa Katonda, oyo Katonda wa badhaadha baibwe. Kale kyabazinga Yoashi baamubonereza batyo.

²⁵ Abasiria bwe baagolola, baaleka Yoashi oyo nga bamufumiite inho ebibwa. Agho abagheereza be beene baamukolera olukwe, baamutemulira mu buliri bwe olw'okwita mutabane wa Yehoiada kabona. Kale yaafa, baamuziika mu kyetebwa Ekibuga kya Daudi, aye ti mu lwambiidhi lwa bakyabazinga.

²⁶ Abaakola olukwe okumwita, baali: Zabadi mutabane w'omukazi Omuammoni ayetebwa Shimeathi, ni Yehozabadi mutabane w'omukazi Omumoabu ayetebwa Shimurithi.

²⁷ Byonabyona ebigema ku batabane ba Yoashi oyo, ni ku ebyo abalanzi bye baalanga okumuvumirira, ni ku kuzimba obuyaaka eisinzizo, byaghandiikibwa mu Kitabo ekiinhonhola ebifa ku bakyabazinga. Mutabane we Amazia n'eyamusikira ku bwakyabazinga.