2 Ebyomubyanda 23 - Baibuli Ekibono kya Katonda 2014

Athalia bamudheemera

¹ Aye mu mwaka ogwomusanvu, Yehoiada kabona yaaguma, yeekobaana n'abaduumizi b'abaisirukale, bano: Azaria mutabane wa Yerohamu, ni Ishimaeli mutabane wa Yehohanani, ni Azaria owundi mutabane wa Obedi, ni Maaseia mutabane wa Adaia, ni Elishafati mutabane wa Zikuri.

² Baaja nga babitabita mu bibuga byonabyona eby'omu Buyudaaya, baatoolayo Abalevi, n'abakulira enda dha balata b'abantu Abaisiraeli, baidha nabo e Yerusalemu.

³ Boonaboona beesolokeza mu isinzizo, baakola endagaano ni Yoashi, mutabane wa kyabazinga. Yehoiada yaabakoba ati: “Bona eno, mutabane wa kyabazinga wuuno. Oyo n'abe afuuke kyabazinga, nga Musengwa Katonda bweyasuubiza baidhukulu ba Daudi.”

⁴ Era yaabakoba ati: “Kino kye mwidha okukola. Imwe bakabona n'Abalevi, bwe munaidha okukuuma mu ngobo dhaimwe ku Sabbato, mwidha kwegabaniamu ebikunsu bisatu nga byagayaga. Ekikunsu ekindi ku ebyo ebisatu eby'abakuumi, baidha kukuuma emiryango gy'eisinzizo.

⁵ Ekikunsu ekindi era ku bisatu ebyo baidha kukuuma ekisaagaati kya kyabazinga. N'ekikunsu ekinaasigalagho baidha kuba ku gwetebwa Omulyango ogw'Omusingi. Ate abantu boonaboona baidha kuba mu luya olw'eisinzizo.

⁶ Ghatabaagho muntu yeenayeena aingira mu isinzizo, okutoolaku bakabona n'Abalevi abali mu lugobo olw'okugheereza. Abo ba idembe okwingira, kuba baatukuzibwa. Aye abantu abandi boonaboona baidha kujiira ku kiragiro kya Musengwa Katonda, basigale kuliya.

⁷ Abalevi baidha kukuuma kyabazinga Yoashi nga bamwezungulwire era nga buli muntu agemye eby'okulwanisa bye. Omuntu yeenayeena anaingira mu isinzizo wa kwitibwa. Baidha kuba ghalala ni kyabazinga buli gh'anaajanga.”

⁸ Abalevi n'abantu ab'omu Buyudaaya boonaboona, baakola byonabyona Yehoiada kabona bye yalagira. Buli muduumizi yaaleeta abasaadha be abaali baja okukuuma ku Sabbato, ghalala n'abo abaali bamaze okukuuma kuba Yehoiada oyo kabona tiyaleka bikunsu kuja eby'abo abamaze engobo dhaibwe ku Sabbato.

⁹ Agho Yehoiada kabona yaagha abaduumizi amafumo n'engabo enene n'entono ebya kyabazinga Daudi, ebyali mu isinzizo.

¹⁰ Era yaataagho abantu boonaboona okukuuma kyabazinga, nga buli muntu agemye eby'okulwanisa bye okuva ku luuyi olw'omukono omusaadha olw'e buvandhuba w'eisinzizo, okutuuka ku luuyi lwalyo olw'omukono omugooda olw'e buvandhuba, n'okwezunguluza alutaari n'eisinzizo.

¹¹ Agho yaafulumya Yoashi, yaamuvaaza engule ey'obwakyabazinga, yaamugemya n'ekighandiiko ekirimu Amateeka, yaafuuka kyabazinga. Olwo Yehoiada oyo kabona ghalala ni batabane be, baasiiga Yoashi omuzigo, era baakoba bati: “Kyabazinga ghangaala!”

¹² Athalia bwe yawulira okuleekaana okw'abantu abali kusagamba nga bwe basaaka kyabazinga, yaaja mu isinzizo abantu ye baali beesolokeiza.

¹³ Okuja okulinga ati, ng'abona kyabazinga ayemereire okumpi n'omulyango gha mpango agheemerera kyabazinga, ng'abaduumizi b'eigye n'abafuuyi ab'amagwala bamuli agho kumpi. Era ng'abantu boonaboona bali kusagamba nga bwe bafuuwa amagwala. N'abembi boona nga bali kukuba ebivuga byaibwe, nga bakulemberamu enhembo. Agho Athalia yaakanulamu ebivaalo bye olw'okunakughala, nga bw'akoba ati: “Mundiiremu olukwe! Mundiiremu olukwe!”

¹⁴ Yehoiada kabona yaayeta abaduumizi b'eigye, yaabakoba ati: “Mutamwitira mu isinzizo. Aye mumufulumye nga mumubikiza mu nhiriri dh'abaisirukale, era omuntu yeenayeena agezaaku okumuwonia mu nhiriri, mumwite bwite.”

¹⁵ Agho baagema Athalia, baamutwala ku gwetebwa Omulyango ogw'Embalaasi ku kisaagaati kya kyabazinga, baamwitira eyo.

Yehoiada aiza ebintu obuyaaka

¹⁶ Agho Yehoiada kabona yaakola endagaano ni kyabazinga, era n'abantu boonaboona aghalala, ekakasa nga bwe baidha okubanga abantu aba Musengwa Katonda.

¹⁷ Agho abantu boonaboona baaja baingira mu isabo ly'omusambwa Baali, baalimenhagho. Era baamenhamenha alutaari n'ebifaananie byagwo. Ni kabona waagwo eyayetebwanga Mattani, baamwitira emberi w'alutaari.

¹⁸ Yehoiada yaagemya bakabona n'Abalevi omulimo ogw'okukolanga mu isinzizo lya Musengwa Katonda abo nga Daudi be yataagho mu isinzizo eryo, okughangayo eri Musengwa Katonda ebigheebwayo ebyokebwa, nga bwe kyaghandiikibwa mu Mateeka ga Musa. Era ekyo bakikolenga nga basagamba era nga bemba, nga Daudi oyo bwe yalagira.

¹⁹ Yehoiada era yaataagho abakuumi ku miryango gy'eisinzizo, lirobenga kwingirwamu atali mulongoofu.

²⁰ Agho Yehoiada oyo, n'abaduumizi b'eigye, n'abakungu, n'abakulembeze, era n'abantu boonaboona, baatoola kyabazinga mu isinzizo baamutwala mu kisaagaati kya kyabazinga, nga babitira mu mulyango ogw'eitale. Baamutyamya ku kityamo eky'obwakyabazinga.

²¹ Agho abantu boonaboona baasagamba, ekibuga kyatereera, nga bamaze okwita Athalia.