2 Ebyomubyanda 22 - Baibuli Ekibono kya Katonda 2014

Kyabazinga Ahazia owa Buyudaaya

¹ Agho abantu b'omu Yerusalemu baataagho Ahazia, asembayo obuto mu batabane ba Yehoramu, yaasikira ise ku bwakyabazinga kuba ekikunsu eky'abalwani abaidha n'Abawarabu okulumba, kyali kimaze okwita abaana ba Yehoramu oyo abakulu boonaboona. Kale Ahazia mutabane wa Yehoramu kyabazinga wa Buyudaaya, yaatoolera okufuga.

² Yali agheza emyaka amakumi ana n'ebiri (42) egy'obukulu, era yaafugira entangama ya mwaka mulala mu Yerusalemu. Inhina yali nga ni Athalia mughala wa kyabazinga Ahabu, era mwidhukulu wa kyabazinga Omuri owa Isiraeli.

³ Ahazia nga bweyali omwidhukulu mu ndhu ya Ahabu, yeena yajiira ku mpisa embi edh'ab'endhu ya Ahabu oyo, kuba inhina n'eyamughanga amagezi agaamukozesanga ebibi.

⁴ Yaakolanga ebibi yaasungughaza Musengwa Katonda, ng'ab'endhu ya Ahabu bwe baakolanga kuba ise bwe yamala okufa, abo n'abaamughanga amagezi agaamutuusa ku kugwa.

⁵ Era kyabazinga Ahazia oyo ng'ajiira ku magezi ge baamugha, yaaja mu lutalo ni kyabazinga Yoramu owa Isiraeli mutabane wa Ahabu, okulwanisa kyabazinga Hazaeli owa Siria. Olutalo olwo lwataamira e Ramothi Gileadi, Abasiria baafumitira eyo Yoramu ebibwa.

⁶ Kyabazinga Yoramu oyo, yairayo e Yezireeli amale okuwona ebibwa Abasiria bye baamufumitira e Rama ng'alwanisa kyabazinga Hazaeli owa Siria. Agho kyabazinga Ahazia mutabane wa Yehoramu kyabazinga wa Buyudaaya, yaajaayo okumubona obulwaire.

⁷ Aye Musengwa Katonda yali amaze okutegeka ng'okuzikirira kwa Ahazia kuja kumwidhira lwa kukyalira Yoramu, kuba Ahazia oyo bwe yatuukayo, yaja ni Yoramu okubona Yehu mutabane wa Nimushi, Musengwa Katonda ye yali amaze okulonda nga n'ow'okuzikiriza ab'endhu ya Ahabu.

⁸ Agho Yehu bweyali ali kutuukiriza ekibonerezo Katonda kye yasalira ab'endhu ya Ahabu, yaayagaana abakungu ba Buyudaaya n'abaana ba baganda ba Ahazia, abaali bagherekeireku Ahazia oyo ku bugeni. Yehu yaabaita.

⁹ Yaalagira baayagaaza woonawoona nga banoonia Ahazia, era baamugema nga yeegisiisa mu Samaria. Baamuleeta eri Yehu, baamwita, era baamuziika olw'okuba baakoba bati: “Ono mwidhukulu wa Yehoshafati eyafubanga einho okugheereza Musengwa Katonda n'omwoyo omulala.” Mu b'endhu ya Ahazia timwasigalamu muntu asobola kufuga bwakyabazinga.

Omukazi Athalia afuuka kyabazinga omukazi owa Buyudaaya

¹⁰ Agho Athalia inhina wa kyabazinga Ahazia bwe yabona nga mutabane we oyo bamwise, yaasitukiramu, yaazikiriza ab'oku lulyo olulangira boonaboona.

¹¹ Aye Yehosheba mughala wa kyabazinga Yoramu, ng'aba mwanhina Ahazia oyo era nga yafumbirwa Yehoiada kabona, yaawoniagho Yoashi owundi ku batabane ba Ahazia oyo. Yamutoola mu balangira abaali baja okwitibwa, ng'amwibagho, yaaja yaabagisa bombi n'omulezi we, mu kisenge ekisulwamu mu isinzizo mu nsambo eyo yaamuwonia Athalia okumwita.

¹² Era Yehosheba oyo yaabanga ghalala naye ng'amugisiisa mu isinzizo, okumala entangama ya myaka mukaaga, nga Athalia n'afuga nga kyabazinga omukazi.