2 Ebyomubyanda 21 - Baibuli Ekibono kya Katonda 2014

¹ Agho Yehoshafati oyo yaafa, yeeyimba ku badhaadha be abaafa, era yaaziikibwa mu lwambiidhi lwa badhaadha be abo, mu kyetebwa Ekibuga kya Daudi. Mutabane we Yehoramu yaamusikira ku bwakyabazinga.

Kyabazinga Yehoramu owa Buyudaaya

² Yehoramu yali ni baganda be bano: Azaria, ni Yehieli, ni Zekaria, ni Azaria owundi, ni Mikaeli, ni Shefatia boonaboona abo nga batabane ba Yehoshafati kyabazinga wa Buyudaaya.

³ Iseibwe oyo Yehoshafati yabagha ebintu kamaala: feeza, ni zaabu, n'ebintu ebindi eby'omughendo, ghalala n'ebibuga mu Buyudaaya ebyezungulwirwa ebimante ebigumu. Aye obwakyabazinga yaabugha Yehoramu, kuba n'eyali omwana omuberi.

⁴ Era Yehoramu oyo bwe baamala okumutyamya ku kityamo eky'obwakyabazinga bwa ise, n'amala n'okukakata ku bwakyabazinga obwo, yaita baganda be boonaboona, n'abandi ku bakungu mu Isiraeli.

⁵ Yehoramu ghe yafuukira kyabazinga wa Buyudaaya, yali agheza emyaka amakumi asatu n'ebiri egy'obukulu, era yaafuga okumala entangama ya myaka munaana mu Yerusalemu.

⁶ Yafumbirwa mughala wa Ahabu, era yaakola ng'ab'endhu ya Ahabu oyo bwe baakola, yeebisa bubi nga bakyabazinga ba Isiraeli bwe baakola, yaakola ebibi ye Musengwa Katonda.

⁷ Aye Musengwa Katonda yaaloba kwenda kuzikiriza bantu ba ndhu ya Daudi kubamaliriragho, kuba yasuubiza omugheereza we Daudi oyo ati eizaire lye n'erinaafuganga obwakyabazinga obwo ebyanda n'ebyanda.

⁸ Mu biseera bya Yehoramu oyo, Abaedomu baadheemera Buyudaaya, beeteeragho obwakyabazinga obwaibwe.

⁹ Agho Yehoramu n'abaduumizi be, ng'ali ghalala n'ebigaali bye eby'omu lutalo byonabyona, baaja baalumba ensi Edomu. Eigye ery'Abaedomu lyabazingiza okubeezunguluza. Agho mwene ghalala n'abaduumizi b'ebigaali bye eby'omu lutalo, baasituka obwire, baasobola okughaguza era baaja.

¹⁰ Kale Abaedomu batyo bwe baadheemera Buyudaaya ni ye buli eno. Era mu biseera byene ebyo, n'ab'omu kibuga Libuna boona baadheemera Yehoramu oyo, olw'okuba yava ku Musengwa Katonda, Katonda wa badhaadha be.

¹¹ Ate n'ekindi, yazimba ebifo ebigulumivu eby'okusinzizaamu ku biketezo bya Buyudaaya eby'oku nsozi, yaaleetera abantu ab'omu Yerusalemu n'ab'omu Buyudaaya boonaboona, okwonoona eri Musengwa Katonda.

¹² Agho omulanzi Eliya yaagheereza Yeroboamu embaluwa ng'ekoba eti: “Musengwa Katonda, Katonda wa dhaadha wo Daudi akoba ati, waloba okwebisanga obukalamu nga lata wo Yehoshafati bwe yakolanga, era nga dhaadha wo Asa kyabazinga wa Buyudaaya yeena bwe yakolanga.

¹³ Aye weebisanga bubi nga bakyabazinga ba Isiraeli bwe baakolanga, waaleetera abantu b'omu Yerusalemu n'ab'omu Buyudaaya boonaboona okuva ku Musengwa Katonda, ng'oti ni Ahabu n'ab'endhu ye bwe baaleetera Abaisiraeli okuva ku Musengwa Katonda oyo. Era okwo waayongeraku n'eky'okwita baganda bo, abaana ba lata wo mwene, abaali abantu abakalamu okusinga n'iwe.

¹⁴ Kale ni bona eno, Musengwa Katonda aidha kuleeta endwaire embi einho egeme abantu bo, n'abaana bo, ni bakazi bo, era aidha kuzikiriza n'ebintu byo byonabyona.

¹⁵ N'iwe mwene weena oidha kulwala endwaire enkakali ey'omu byenda, erikuleetera ebyenda okukufulumanga buli lunaku aghazira kulekeraku naire.”

¹⁶ Era Musengwa Katonda yaasiikuula obusungu bw'Abafilisiti n'obw'Abawarabu abaalinga nga baba kumpi n'Abaethiopia, yaabaleetamu omwoyo ogw'okulwanisa Yehoramu.

¹⁷ Baalumba ensi Buyudaaya baagighangula, baanhaga ebintu byonabyona mu kisaagaati kya kyabazinga. Baanhaga ni bakazi be, n'abaana be boonaboona, okutoolaku Yehoahazi omwana we omulenzi nkoma.

¹⁸ Ebyo byonabyona nga bimaze okubaagho, Musengwa Katonda yaaleetera Yehoramu oyo okulwala endwaire ey'omu byenda etawona.

¹⁹ Bwe ghaabitagho entangama ya myaka ebiri, ebyenda byamufuluma mu nda olw'endwaire eyo, yaafiira mu bulumi obutaloodheka. Abantu be baaloba okumukumira ekisiki eky'omuliro okumulira, nga bwe kyakolebwanga ku badhaadha be.

²⁰ Yatoolera okufuga ng'agheza emyaka amakumi asatu n'ebiri egy'obukulu, era yaafugira entangama ya myaka munaana mu Yerusalemu. Bwe yafa, ghazira muntu waire omulala ati eyawulira mule ng'amusaire. Agho baamuziika mu kyetebwa Ekibuga kya Daudi, aye ti mu lwambiidhi lwe baazikangamu bakyabazinga.