2 Ebyomubyanda 20 - Baibuli Ekibono kya Katonda 2014

Olutalo n'abantu ab'omu Edomu

¹ Ebyo nga biwoire, Abamoabu, n'Abammoni, ghalala n'abandi ku Bameuni, baidha baalumba Yehoshafati okumulwanisa.

² Ghaidhagho abakwenda baakoba Yehoshafati bati: “Eigye einene liidhie okukulumba nga liva mu Edomu, ere ng'osomoike Enhandha Eyomuunhu. Era mpegaano liri Hazazoni Tamari ekyo era nga n'ekiketezo ekyetebwa Engedi.”

³ Yehoshafati yaatya, yaasaba Musengwa Katonda ng'amweghemba, era yaalangirira ghabeegho okusiiba mu Buyudaaya mwonamwona.

⁴ Abantu baava mu bibuga bya Buyudaaya byonabyona, beesoloza okusaba Musengwa Katonda abayambe.

⁵ Agho Yehoshafati yaayemerera mu maiso g'abantu b'omu Buyudaaya n'ab'omu Yerusalemu abaali beesololeiza emberi gh'oluya oluyaaka olw'eisinzizo.

⁶ Yaasaba ati: “Wo Musengwa Katonda, Katonda wa badhaadha baife, iwe oba eyo mu igulu waafuga obwakyabazinga obw'amaghanga goonagoona. Oli n'obuyinza n'amaani, era ghazira asobola kukutakania.

⁷ Wo Katonda waife, iwe wabinga mu nsi eno abantu abaagirimu ng'abantu bo Abaisiraeli bali kumpi okutuukayo. Waagigha baidhukulu ba mukagwa wo Aburahamu, ebenga yaibwe lubeerera.

⁸ Era bagibairemu baakuzimbira n'eisinzizo ery'okukusinzizangamu, nga bakoba bati,

⁹ ‘Akabi bwe kanaatutuukangaku, ka lube olutalo, oba okusalirwa omusango, oba obulwaire obubi, oba endhala, twidha kwemereranga mu maiso go emberi gh'eisinzizo lino kuba agho ghe twidha twakusinza, twakukobera nga bwe tudaazibwadaazibwa, era iwe waatuwulirisa waatuwonia.’

¹⁰ “Mpegaano bona, Abammoni, n'Abamoabu, n'abantu ab'oku lusozi Seiri batulumbye. Ate nga badhaadha baife bwe baava mu nsi Misiri, tiwabaganha kulumba bantu abo. Badhaadha baife baabita ghala n'abantu abo, baaloba kuseeta ye bali era baaloba kubazikiriza.

¹¹ Buti bali kutusasulamu na kutubinga mu nsi ye watugha okubanga obutaka bwaife.

¹² Wo Katonda waife, babonereze, kuba ife tuzira maani ga kulwanisa igye inene lino eritulumbye. Titwidhi kya kukola, aye tulingiriire ku iwe.”

¹³ Mu kiseera n'ekirala ekyo, abasaadha boonaboona ab'omu Buyudaaya baali beemereire agho ni bakazi baibwe, n'abaana baibwe.

¹⁴ Agho omwoyo gwa Musengwa Katonda gwaidha ku Mulevi eyali mu bantu abaali beesololeiza agho. Omulevi oyo ng'ayetebwa Yahazieli mutabane wa Zekaria, Zekaria mutabane wa Benaia, Benaia mutabane wa Yeieli, Yeieli mutabane wa Mattania, owundi ku baana ba Asafu.

¹⁵ Yahazieli oyo yaakoba ati: “Isebantu kyabazinga Yehoshafati, n'imwe mwenamwena abantu ab'omu Buyudaaya ni mu Yerusalemu, muwulirise: Musengwa Katonda akoba ati, mutatya, era eigye lino einene litabamalamu maani, kuba olutalo luno ti niimwe mwidha okululwana, aye Katonda mwene n'aidha okululwana.

¹⁶ Olwaidho imwe muje mubalumbe. Mwidha kubabona nga bali kuniinaniina ghale aghaingirirwa mu Zizi, olwo mubaagaane ekiiko ghe kikoma, aghatandiikira eirungu ery'e Yerueli.

¹⁷ Tikiidha kubeetaagisa imwe kulwana lutalo luno. Imwe mwetegeke, mwemerere bwemerere, olwo mubone obughanguzi Musengwa Katonda bw'anaabagha. Imwe abantu ab'omu Buyudaaya n'ab'omu Yerusalemu, mutatya era mutawaamu maani. Olwaidho imwe muje mubalumbe, Musengwa Katonda aidha kuba ghalala n'imwe.”

¹⁸ Agho Yehoshafati yaakuba amakiryaivu era yaakutama n'ekyeni kyatuuka ku itaka. N'abantu boonaboona ab'omu Buyudaaya n'ab'omu Yerusalemu baakuba amakiryaivu mu maiso ga Musengwa Katonda, baamusinza.

¹⁹ Abalevi abasimuka mu Kohathi ni mu Kora, baayemerera, baasaaka Musengwa Katonda, Katonda wa Isiraeli mu mamiro ag'amaani einho.

²⁰ Bwe bwakya, baasituka ku nkyo okuja mu irungu ly'e Tekoa. Bwe baali bali kuja, Yehoshafati yaayemerera, yaakoba ati: “Imwe abantu ab'omu Buyudaaya n'ab'omu Yerusalemu, mumpulirise. Mwikirize Musengwa Katonda waimwe, olwo mwidha kuba bagumu. Mwikirize eby'abalanzi be, olwo mwidha kughangula.”

²¹ Bwe yamala okwebuuzaaku ku bantu, yaataagho ab'okwembera Musengwa Katonda okumusaaka, nga bavaire ebivaalo eby'emikolo emitukuvu. Abo baakulemberamu eigye, baaja nga bemba bati: “Musaake Musengwa Katonda, kuba okugonza kwe tikukoma, kubaagho byanda na byanda.”

²² Bwe baatoolera okwemba n'okusaaka, Musengwa Katonda yaazinduukiriza Abammoni, n'Abamoabu, n'abantu ab'oku lusozi Seiri, abaali balumbye Buyudaaya eigye lyaibwe lyagumbulukuka.

²³ Abammoni n'Abamoabu baalumba abantu ab'oku lusozi Seiri, baabaita okubasaaniagho. Era bwe baamala okubasaaniagho, olwo boonaboona baatoolera okwitagana beene na beene.

²⁴ Abayudaaya bwe baatuuka ku kituuti ekirengererwaku eky'omu mu irungu, baalengeza eri eigye ery'abazigu eribaire einene. Baabona nga boonaboona mirambo egigwire agho, era ghazira muntu awoniegho.

²⁵ Yehoshafati n'abantu be bwe baajaayo okutoolayo omunhago, baayagaanayo eby'obukombe kamaala, n'engoye, n'ebintu eby'omughendo, baatwalaku bye baasobola, ebindi byabalemeragho. Baamala enaku isatu nga bakaasomba omunhago ogwo, kuba gwali mungi.

²⁶ Ku lunaku olwokuna beesololeza mu kiiko kya Beraka, baasaaka Musengwa Katonda. Era okuva ku olwo ekifo ekyo kyayetebwanga ekiiko kya Beraka.

²⁷ Agho Yehoshafati yaakulembera abantu boonaboona ab'omu Buyudaaya n'ab'omu Yerusalemu, bairayo e Yerusalemu nga basangaavu, kuba Musengwa Katonda yaghangula abazigu baibwe.

²⁸ Bwe baatuuka e Yerusalemu, baaja mu isinzizo nga bali kukuba entongooli n'endingidi, eno nga bwe bafuuwa n'amagwala.

²⁹ Abantu ab'omu bwakyabazinga obw'ensi dhoonadhoona bwe baawulira nga Musengwa Katonda alwaniisa abazigu ba Isiraeli, baatya inho Katonda oyo.

³⁰ Kale obwakyabazinga bwa Yehoshafati bwaba bwa miraala, kuba Katonda yamugha emiraala ku ndhuyi dhoonadhoona.

Enkomerero ey'obufuzi bwa Yehoshafati

³¹ Yehoshafati yafuuka kyabazinga wa Buyudaaya ng'agheza emyaka amakumi asatu n'etaanu egy'obukulu, era yaafugira entangama ya myaka amakumi abiri n'etaanu mu Yerusalemu. Inhina yali nga ni Azuba, mughala wa Shilihi.

³² Yehoshafati oyo yali wa mpisa nkalamu era nga tadhivaaku, ng'oti ni lata we Asa bweyali. Yaakolanga ebirungi Musengwa Katonda by'asiima.

³³ Aye ebifo ebigulumivu eby'okusinzizaamu tiyabitoolagho. Abantu baasigala nga bakaali kwemalira ku kugheereza Katonda wa badhaadha baibwe.

³⁴ Ebindi byonabyona Yehoshafati bye yakola, okuva lwe yatoolera okufuga okutuuka lwe yakoma, byaghandiikibwa mu kitabo kya Yehu mutabane wa Hanani, era byamala byaingizibwa mu kitabo eky'Ebyafaayo bya Bakyabazinga ba Isiraeli.

³⁵ Ebyo nga biwoire, kyabazinga Yehoshafati oyo owa Buyudaaya, yeeyimba ni kyabazinga Ahazia owa Isiraeli eyakola ebibi kamaala.

³⁶ Baakola naye amaato ag'okujanga e Tarushishi, nga bagakolera mu Ezionigeberi.

³⁷ Agho Eliezeri mutabane wa Dodavahu ow'e Maresha, yaalanga ng'alabula Yehoshafati ati: “Nga bwe weeyimbye ni Ahazia, Musengwa Katonda aidha kuzikiriza by'okoze.” Kale amaato ago gaamenhekera mu nhandha, gaaloba kusobola kuja e Tarushishi.