2 Ebyomubyanda 17 - Baibuli Ekibono kya Katonda 2014

Yehoshafati afuuka kyabazinga

¹ Agho Yehoshafati yaasikira lata we oyo Asa ku bwakyabazinga, era yeenhweza okulwanisa Isiraeli.

² Yaata amagye mu bibuga bya Buyudaaya byonabyona ebyezungulwirwa ebimante ebigumu. Ni mu biketezo bya Buyudaaya eby'omu byalo yaataayo enkambi dh'abalwani, ni mu bibuga by'omu Efuraimu lata we Asa bye yanhaga, mwona yaataamu enkambi dh'abalwani.

³ Musengwa Katonda yaagha Yehoshafati enkabi, kuba yajiiranga ku mpisa enkalamu edha lata we edhaasooka, yaaloba kusinzanga emisambwa egyetebwa Baali.

⁴ Yaasinzanga Katonda owa lata we ng'agema ebiragiro bye, yaaloba kujiiranga ku ebyo abantu ab'omu Isiraeli bye baakolanga.

⁵ Kale Musengwa Katonda yaaleetera obwakyabazinga bwa Yehoshafati okukakata, era abantu b'omu Buyudaaya boonaboona baaleeteranga Yehoshafati oyo omusolo, yaakombaghala era yaaba wa kitiibwa inho.

⁶ Omwoyo gwe yagumaliranga ku kukola ebyo Musengwa Katonda by'ayenda, era yaatoolagho mu Buyudaaya ebifo ebigulumivu bye baasinzizangamu, n'ebifaananie by'omusambwa omukazi Ashera.

⁷ Mu mwaka gwe ogwokusatu nga ni kyabazinga, yaatuma abakungu be okuja okwegeresa mu bibuga bya Buyudaaya, bano: Benihaili, ni Obadia, ni Zekaria, ni Nethaneli, ni Mikaia.

⁸ Abakungu abo baagherekerwaku Abalevi bano: Shemaia, ni Nethania, ni Zebadia, ni Asaheli, ni Shemiramothi, ni Yehonathani, ni Adoniya, ni Tobiya, ni Tobadoniya. Ate Abalevi abo baagherekerwaku bakabona, Elishama ni Yehoramu.

⁹ Baatwala ekitabo eky'Amateeka ga Musengwa Katonda, baaja nga babitabita mu bibuga byonabyona ebya Buyudaaya, nga beegeresa abantu amateeka ago.

Kyabazinga Yehoshafati yali mukologho

¹⁰ Musengwa Katonda yaata okutya mu bantu b'obwakyabazinga bwonabwona obwali bwetooloire Buyudaaya, baaloba kutanulagho lutalo lwonalwona ku Yehoshafati.

¹¹ Abandi ku Bafilisiti baaleetera Yehoshafati ebirabo era baamugha ni feeza ng'omusolo. Abawarabu boona baamugha entaama enume kasanvu na lusanvu (7,700), n'embuzi enume dhoona kasanvu na lusanvu (7,700).

¹² Yehoshafati yaaja nga yeeyongera okuba ow'amaani, yaazimba ebifo eby'okwewogomamu, n'ebibuga ebyalimu amaterekero,

¹³ olwo yaaba ng'ali n'amaterekero amakologho mu bibuga bya Buyudaaya. Yaata mu Yerusalemu abaisirukale ab'amaani abaziramu ntete,

¹⁴ nga bategekeibwa nga bajiira ku nda dha baiseibwe: Adana n'eyali akulira baduumizi baine abaaduumiranga ebikunsu eby'abaisirukale olukumi olukumi ab'omu kika kya Yuda boonaboona aghalala ng'akulira abaisirukale ab'amaani abaziramu ntete, emitwalo amakumi asatu (300,000).

¹⁵ Yehohanani n'eyali omuduumizi amwiririra, ng'akulira abaisirukale emitwalo amakumi abiri na munaana (280,000).

¹⁶ Ku oyo kwairaku Amasia mutabane wa Zikiri, eyeeghaayo ekyeyendere okugheereza Musengwa Katonda, ng'ali n'abaisirukale ab'amaani abaziramu ntete emitwalo amakumi abiri (200,000).

¹⁷ Omuduumizi w'ebikunsu by'eigye ery'ekika kya Benjamini yali nga ni Eliada, omulwani ow'amaani aziramu ntete, ng'akulira abaisirukale emitwalo amakumi abiri (200,000) abalwanisa obulaso n'engabo.

¹⁸ Yehozabadi n'eyali omuduumizi amwiririra, ng'akulira abaisirukale emitwalo ikumi na munaana (180,000) abatendekebwa obukalamu mu by'okulwana.

¹⁹ Abo n'abaagheerezanga kyabazinga, nga tobaliireeku abo be yata mu Buyudaaya mwonamwona, mu bibuga ebyezungulwirwa ebimante ebigumu.