2 Ebyomubyanda 14 - Baibuli Ekibono kya Katonda 2014

Kyabazinga Asa aghangula Abaethiopia

¹ Agho Abiya yaafa, yeeyimba ku badhaadha be abaafa, yaaziikibwa mu kyetebwa Ekibuga kya Daudi. Mutabane we Asa yaamusikira ku bwakyabazinga. Mu biseera bya Asa oyo, ensi yaaba mu miraala okumala entangama ya myaka ikumi.

² Asa yaasiimya Musengwa Katonda we, olw'ebirungi n'ebituufu bye yakola.

³ Yaatoolagho alutaari edh'abamaghanga agandi n'ebifo ebigulumivu eby'okusinzizaamu, yaamenhamenhagho empango edh'amabaale, era yaatemagho n'ebifaananie bya Ashera, omusambwa gwaibwe omukazi.

⁴ Yaalagira abantu b'omu Buyudaaya okukolanga ebyo Musengwa Katonda, oyo Katonda wa badhaadha baibwe by'ayenda, n'okugemanga amateeka ge n'ebiragiro bye.

⁵ Era yaatoola mu bibuga byonabyona ebya Buyudaaya, ebifo ebigulumivu eby'okusinzizaamu, ni alutaari edh'okuniokezaaku obubbaani. Kale, mu biseera bye, obwakyabazinga bwe bwaba mu miraala.

⁶ Yaazimba mu Buyudaaya ebibuga ebyezungulwirwa ebimante ebigumu, kuba ensi yali mu miraala. Mu myaka egyo, Asa tiyali na ntalo, kuba Musengwa Katonda yamugha okuba emiraala.

⁷ Yaakoba abantu b'omu Buyudaaya ati: “Ka tuzimbe ebibuga bino, tubyezunguluzeeku n'ebimante ebigumu, tubizimbeku n'ebituuti ebirengererwaku, era tubiteeku n'endhigi edhiriku ebisiba munda. Ensi eno ekaali yaife, kuba twakola Musengwa Katonda waife by'ayenda. Twakola by'ayenda kyeyava n'atugha emiraala ku ndhuyi dhaife dhoonadhoona.” Kale baazimba, era ebintu byabajiiranga bukalamu.

⁸ Kyabazinga Asa yali n'eigye ly'abalwani emitwalo amakumi asatu (300,000) abaava mu kika kya Yuda, abaalwanisanga engabo n'amafumo. Era yaaba n'abalwani emitwalo abiri na munaana (280,000) abaava mu kika kya Benjamini, abaalwanisanga engabo n'obulaso. Abo boonaboona baali balwani ba maani abaziramu ntete.

⁹ Agho ghaabaagho Omwethiopia ayetebwa Zera, yaabalumba n'eigye lya balwani akakaire kalamba (1,000,000), n'ebigaali eby'omu lutalo ebikumi bisatu. Yaidha yaatuukira irala e Maresha.

¹⁰ Asa yaaja okumulwanisa. Endhuyi dhombi dhaasimbya abalwani baadho enhiriri mu kiiko ky'e Zefatha okumpi n'e Maresha, baalingagana nga beetegeike okulwana.

¹¹ Asa yaasaba Musengwa Katonda we ng'akoba ati: “Wo Musengwa Katonda, ezirayo ali ng'oti niiwe mu kuyamba abanafu n'ab'amaani. Wo Musengwa Katonda waife, tuyambe ife, kuba niiwe ye twesiga era twidhie mu liina lyo okulwanisa eigye lino einene liti. Wo Musengwa Katonda, niiwe Katonda waife. Otaikiriza muntu kukughangula naire.”

¹² Agho Musengwa Katonda yaaghangula Abaethiopia mu maiso ga Asa n'ag'Abayudaaya. Abaethiopia baalumuka.

¹³ Asa n'abantu be yali nabo baababingirira okutuuka e Gerari. Abaethiopia kamaala inho baitibwa, eigye lyaibwe nga tirikaasobola kwesoloza ghalala kulwana, kuba Musengwa Katonda yabaghangula yaabamala amaani n'eigye lye. Abayudaaya baatwala omunhago mungi inho.

¹⁴ Baazikiriza ebibuga byonabyona ebyetooloire Gerari, kuba abantu baayo Musengwa Katonda yabaleetera okutya. Baanhagulula ebibuga ebyo byonabyona, kuba byalimu ebintu kamaala eby'okunhaga.

¹⁵ Era baalumba ni weema edh'abaayi, baanhaga entaama n'engamiya kamaala inho. Bwe baamala, bairayo e Yerusalemu.