2 Ebyomubyanda 13 - Baibuli Ekibono kya Katonda 2014

Olutalo Abiya lwe yalwana ni Yeroboamu

¹ Mu mwaka ogweikumi n'omunaana nga kyabazinga Yeroboamu n'afuga Isiraeli, Abiya yaafuuka kyabazinga wa Buyudaaya.

² Yaafuga okumala entangama ya myaka esatu mu Yerusalemu. Inhina yali nga ni Mikaia, mughala wa Urieli ow'e Gibea. Agho olwatuuka ghaatanukagho olutalo ghagati wa Abiya ni Yeroboamu.

³ Abiya yaaja okulwana ng'ali n'eigye ery'abalwani abaziramu ntete, emitwalo amakumi ana (400,000), abaalondebwa n'obwegendereza. Ate Yeroboamu yaidha okumulwanisa ng'ali n'eigye ery'abalwani ab'amaani, emitwalo kinaana (800,000), boona nga baalondebwa n'obwegendereza.

⁴ Abiya yaaniina ku lusozi Zemaraimu olw'omu kiketezo kya Efuraimu eky'oku nsozi, yaakoba ati: “Iwe Yeroboamu, n'imwe Abaisiraeli mwenamwena, muwulire bye nkoba.

⁵ Timwidhi nti Musengwa Katonda, Katonda wa Isiraeli, ng'abita mu ndagaano etaja kukyusibwamu, yagha Daudi n'eizaire lye okufuganga nga bakyabazinga ba Isiraeli lubeerera?

⁶ Aye ate Yeroboamu mutabane wa Nebati, omugheereza wa Solomoni mutabane wa Daudi, yaadheemera musengwa we.

⁷ Abantu abazira kye bagasa baidha beeyimba naye, baanhooma Rehoboamu mutabane wa Solomoni era baamweyawulaku, alobe kuba kyabazinga waibwe. Rehoboamu oyo yali akaali muto, ng'azira bumanhirivu obumusobozesa okubalobera okukola ekyo.

⁸ “Mpegaano muli kusala amagezi okulwanisa obwakyabazinga bwa Musengwa Katonda, mubutoole ku b'eizaire lya Daudi olw'okuba muli igye inene, era nga muli n'ebifaananie eby'ente ento ebya zaabu, Yeroboamu bye yabakolera bibenga bakatonda baimwe.

⁹ Mwabinga bakabona ba Musengwa Katonda ob'oku lulyo lwa Aaroni, mwabinga n'Abalevi. Mweteeragho bakabona abaimwe, ng'abamaghanga agandi bwe bakola. Ole bw'aidha okwetukuza, ng'aleese ente enume ento ndala n'entaama enume musanvu, mumwikiriza yaafuuka kabona w'ebintu ebyo ebitali Katonda.

¹⁰ Aye ife, Musengwa Katonda oyo ni Katonda waife era titumuvangaku naire. Bakabona be tuli nabo, abamugheereza, ba ku lulyo lwa Aaroni, era bayambibwaku Abalevi.

¹¹ Baniokeza obubbaani obuwunha akawoowo eri Musengwa Katonda, baaghaayo n'emisengo egyokebwa gyonagyona okuwaagho, buli nkyo na buli igulo. Baata emigaati egigheereibwayo eri Katonda ku meeza entukuvu, era buli igulo baalabiriranga ekikondo ky'entaala ekya zaabu, okubona ng'entaala dhaaku dhaaka. Ife tukola ebyo Musengwa Katonda waife bye yalagira. Aye imwe mwamuvaaku.

¹² Bona eno, Katonda mwene n'omuduumizi waife. Ni bakabona be, bali ghano nga bagemye amagwala ag'okufuuyira abaja okulwanisa imwe. Kale ni Abaisiraeli imwe, mutalwanisa Musengwa Katonda, Katonda wa badhaadha baimwe, kuba timwidha kughangula naire.”

¹³ Mu kiseera ekyo, Yeroboamu yali amaze okusindika abandi ku balwani be, beeteege eigye lya Buyudaaya, balizinduukirize nga baliva einhuma. Ate abalwani abandi nga ba kulirumba nga baliva emberi.

¹⁴ Abayudaaya baaja okulinga bati, nga babona olutalo luli kubava emberi n'einhuma. Agho baalirira Musengwa Katonda nga bamweghemba abawonie. Ni bakabona baafuuwa amagwala.

¹⁵ Abayudaaya baaleekaana okuleekaana okw'omu lutalo, era bwe baaleekaana einho batyo, Katonda yaaghangula Yeroboamu n'Abaisiraeli boonaboona, mu maiso ga Abiya n'ag'Abayudaaya.

¹⁶ Abaisiraeli baalumuka Abayudaaya, Katonda yaaleetera Abayudaaya okughangula Abaisiraeli abo.

¹⁷ Abiya n'eigye lye, baaghangulira irala Abaisiraeli era Abaisiraeli abo baafiirwa abalwani baibwe ab'amaani einho, abaghera emitwalo amakumi ataanu (500,000).

¹⁸ Kale Abaisiraeli baaghangulwa batyo ku mukuzi ogwo, ate Abayudaaya baaba baghanguzi, kuba Abayudaaya abo beesiga Musengwa Katonda, oyo Katonda wa badhaadha baibwe.

¹⁹ Abiya yaabingirira Yeroboamu, yaamunhagaku ebibuga bino: Betheli, ni Yeshana, ni Efuroni, ghalala n'ebyalo ebyali bibiriiraine.

²⁰ Yeroboamu tiyairamu kuba wa maani, nga Abiya oyo akaali kyabazinga. Era ku nkomerero, Musengwa Katonda yaleetera Yeroboamu oyo okulwala, yaamala yaafa.

²¹ Aye Abiya yaafuuka wa maani. Yaabayiza abakazi ikumi na bana. Yaazaala abaana abalenzi amakumi abiri na babiri, n'abaghala ikumi na mukaaga.

²² Ebindi Abiya oyo bye yakola, n'empisa dhe, ni bye yayogera, byaghandiikibwa mu Byafaayo bya Iddo Omulanzi.