2 Ebyomubyanda 12 - Baibuli Ekibono kya Katonda 2014

Abamisiri balumba Buyudaaya

¹ Rehoboamu bwe yamala okukakata ku bwakyabazinga n'aba ow'amaani, olwo mwene n'Abaisiraeli boonaboona, baava ku mateeka ga Musengwa Katonda.

² Agho mu mwaka ogwokutaanu nga kyabazinga Rehoboamu oyo n'afuga Buyudaaya, Shishaki kyabazinga w'e Misiri yaidha yaalumba Yerusalemu olw'okuba baadheemera Musengwa Katonda.

³ Yaidha n'eigye nga liri n'ebigaali eby'omu lutalo lukumi na bibiri (1,200), n'abalwani ab'oku mbalaasi emitwalo mukaaga (60,000), n'abaisirukale abandi abatasoboka kubalika olw'obungi, nga n'omuli Abalibiya, n'Abasukki, n'Abaethiopia.

⁴ Yaanhaga ebibuga ebyezungulwirwa ebimante ebigumu eby'omu Buyudaaya, okutuukira irala n'e Yerusalemu.

⁵ Agho Shemaia omulanzi yaaja eri kyabazinga Rehoboamu ye yali ng'ali n'abakungu ba Buyudaaya abeesololeza mu Yerusalemu okulumuka Shishaki. Yaabakoba ati: “Musengwa Katonda akoba ati, ‘Olw'okuba imwe mwanvaaku, zeena kyenviire ni mbaghaayo eri Shishaki.’ ”

⁶ Agho kyabazinga n'abakungu ba Isiraeli baagonda, baakoba bati: “Musengwa Katonda mutuufu.”

⁷ Musengwa Katonda bwe yabona nga bagonze, yaakoba Shemaia ati: “Nga bwebagonze batyo, tiidha kubazikiriza. Aye era ndidha kubasaasiramuuku bwa katono, olwo ndobe kumalira busungu bwange bwonabwona ku Yerusalemu, nga Shishaki akirumbye

⁸ kuba bwenebwene Shishaki oyo aidha kubaghangula basobole okubona endhawulo ghagati gh'okugheereza nze n'okugheereza bakyabazinga ab'ensi.”

⁹ Kale kyabazinga Shishaki ow'e Misiri yaidha yaalumba Yerusalemu. Yaanhaga eby'obukombe eby'omu isinzizo n'eby'omu kisaagaati kya kyabazinga, byonabyona yaabitwala. Yaatwala n'engabo dhoonadhoona edha zaabu, Solomoni dhe yagheesa.

¹⁰ Kyabazinga Rehoboamu yaagheesa engabo mu kyuma ky'ekikomo okwira mu kifo ky'edho, yaadhigemya abakulu ab'abakuumi abaakuumanga omulyango gw'ekisaagaati kye.

¹¹ Kyabazinga buli lwe yaingiranga mu isinzizo, ng'abakuumi batwala engabo edho, ate baamalanga baadhiizaayo mu ndhu mwe baadhikuumiranga.

¹² Olw'okuba Rehoboamu yagonda, Musengwa Katonda kyeyava n'atamusungughalira kumuzikiriza, n'ensi Buyudaaya yaasigala ng'ebintu bikaagijiira bukalamu.

Obufuzi bwa Rehoboamu nga bwe bwali mu bumpimpi

¹³ Kale Rehoboamu yaakakata ku bwakyabazinga mu Yerusalemu. Ghe yainhamira okufuga yali agheza emyaka egy'obukulu amakumi ana na mulala (41), era yaafuga okumala entangama ya myaka ikumi na musanvu (17) mu Yerusalemu, ekibuga Musengwa Katonda kye yalondagho mu Isiraeli yoonayoona okumusinzizangamu. Inhina wa Rehoboamu yali ng'ayetebwa Naama, era nga Muammoni.

¹⁴ Rehoboamu oyo yaakola ebibi, yaaloba kufaayo kujiiranga ku ebyo Musengwa Katonda by'ayenda.

¹⁵ Ebindi byonabyona Rehoboamu bye yakola, okuva lwe yatoolera okufuga okutuuka ku nkomerero, byaghandiikibwa mu Kitabo eky'Ebyomubyanda eby'omulanzi Shemaia n'omulanzi Iddo. Ekiseera ekyo kyonakyona, ghaabangagho entalo edhomwidhirano ghagati gha Rehoboamu ni Yeroboamu.

¹⁶ Agho Rehoboamu oyo yaafa, yeeyimba ku badhaadha be abaafa, yaaziikibwa mu lwambiidhi lwa badhaadha be abo, mu kyetebwa Ekibuga kya Daudi. Mutabane we eyayetebwanga Abiya, n'eyasikira ise oyo ku bwakyabazinga.