2 Ebyomubyanda 11 - Baibuli Ekibono kya Katonda 2014

Shemaia bye yalanga

¹ Agho Rehoboamu bwe yatuuka e Yerusalemu, yaasoloza mu kika kya Yuda n'ekya Benjamini, abasaadha abalwani einho abaghera emitwalo eikumi n'omunaana (180,000). Abalwani abo nga ba kuja kulwanisa Abaisiraeli ab'omu kiketezo eky'oku luuyi olw'omukono omugooda olw'e buvandhuba wa Isiraeli, Rehoboamu oyo asobole okukiizaayo mu bwakyabazinga bwe.

² Aye Katonda yaakoba omusaadha we Shemaia ati:

³ “Koba Rehoboamu mutabane wa Solomoni era kyabazinga wa Buyudaaya, okobe n'ab'omu kika kya Yuda, n'ekya Benjamini, oti,

⁴ ‘Musengwa Katonda akoba ati mutaja kulumba baganda baimwe, Baisiraeli banaimwe. Mwireyo buli muntu mu maka ge, kuba ebyo ebibairegho, ninze nabireetagho.’ ” Agho baagondera ekiragiro kya Musengwa Katonda, bairayo ewaibwe, baaloba kuja kulumba Yeroboamu.

Rehoboamu azimba ebimante ebigumu okwezunguluza ebibuga

⁵ Kale Rehoboamu yaasigala mu Yerusalemu, yaazimba ebimante ebigumu okwezunguluza ebibuga bino eby'omu kiketezo eky'omu Buyudaaya n'eky'omu Benjamini:

⁶ Bethelehemu, ni Etamu, ni Tekoa,

⁷ ni Bethizuri, ni Soko, ni Adullamu,

⁸ ni Gathi, ni Maresha, ni Zifu,

⁹ ni Adoraimu, ni Lakishi, ni Azeka,

¹⁰ ni Zora, ni Aiyaloni, ni Heburoni.

¹¹ Yaazimba ebifo eby'okwewogomamu nga bigumu, yaabitaamu ababikulira, era yaabitaamu amaterekero g'emere, n'omuzigo ogw'ebibala eby'emiti emyoliva, n'omwenge ogw'emizabbibu.

¹² Era ebibuga ebyo byonabyona yaabitaamu engabo n'amafumo. Mu ngeri eyo yaasigaza abantu ab'omu kika kya Yuda n'ekya Benjamini nga n'abafuga.

Bakabona n'Abalevi baidha mu Buyudaaya

¹³ Agho bakabona abaali mu Isiraeli mwonamwona, baava eyo yoonayoona ye baabanga, baidha eri Rehoboamu.

¹⁴ Abalevi abo baaleka eyo ebyayiro byaibwe n'ebibandha, baidha mu Buyudaaya ni mu Yerusalemu, kuba kyabazinga Yeroboamu n'abo abaamusikira, baabinga Abalevi abo, baabalobera okugheereza Musengwa Katonda nga bakabona.

¹⁵ Yeroboamu oyo yeeteeragho bakabona ababe abaagheerezanga mu bifo ebigulumivu eby'okusinzizaamu, n'abo abaagheerezanga emisambwa n'ebifaananie eby'ente ento.

¹⁶ Abantu ab'omu bika byonabyona eby'omu Isiraeli abaawulira mule nga benda okusinza Musengwa Katonda, Katonda wa Isiraeli, boona baidha e Yerusalemu okughaayo emisengo eri Musengwa Katonda oyo, Katonda wa badhaadha baibwe.

¹⁷ Kale abantu abo baaleetera obwakyabazinga bwa Buyudaaya okuba obugumu, era baamala emyaka esatu nga bagha Rehoboamu mutabane wa Solomoni amaani. Mu myaka egyo esatu, embeera y'obulamu yaaba nga bwe yabanga mu biseera bya Daudi n'ebya Solomoni.

Amaka ga Rehoboamu

¹⁸ Rehoboamu yafumbirwa Mahalathi mughala wa Yerimothi, Yerimothi oyo nga mutabane wa Daudi. Ate inhina wa Mahalathi oyo nga ni Abihaili, mughala wa Eliabu, Eliabu oyo nga mutabane wa Yesse.

¹⁹ Rehoboamu yazaala ni Mahalathi abaana abalenzi basatu: Yeushi, ni Shemaria, ni Zahamu.

²⁰ Rehoboamu yaamala yaafumbirwa ni Maaka mughala wa Abusalomu, ye baazaala naye abaana abalenzi bano: Abiya, ni Attai, ni Ziza, ni Shelomithi.

²¹ Rehoboamu yayendanga inho Maaka oyo mughala wa Abusalomu, okusinga bakazi be abandi ab'omu ndhu boonaboona, ni bakazi be ab'embali boonaboona. Abakazi be ab'omu ndhu boonaboona aghalala baali ikumi na munaana, ate abakazi be ab'embali baaba nkaaga. Yaazaala abaana abalenzi amakumi abiri na munaana (28), n'abaana abaghala nkaaga (60).

²² Rehoboamu yaalondamu Abiya mutabane wa Maaka okukulira baana baine boonaboona, kuba oyo ye yayenda amusikire.

²³ Era Rehoboamu oyo yaayiiya amagezi, yaata batabane be mu biketezo byonabyona ebya Yuda n'ebya Benjamini, babirabirirenga, nga boonaboona bali mu bibuga ebyezungulwirwa ebimante ebigumu. Yaabagha ebintu eby'okukozesanga kamaala, era yaabafunira n'abakazi kamaala.