2 Bakyabazinga 9 - Baibuli Ekibono kya Katonda 2014

Yehu asiigibwa omuzigo abe kyabazinga wa Isiraeli

¹ Agho Elisha omulanzi yaayeta omwisuka mulala ku b'ekikunsu eky'abalanzi, yaamukoba ati: “Weetegeke, ogeme akadoome kano ak'omuzigo ogw'ebibala eby'emiti emyoliva, oje e Ramothi Gileadi.

² Bw'onaatuukayo oidha kwagala Yehu mutabane wa Yehoshafati era mwidhukulu wa Nimushi. Olwo oingire mu ndhu mw'ali, omutoole mu baine, omutwale mu kisenge eky'omunda.

³ Agho otoole akadoome ak'omuzigo, ogumufuke ku mutwe ng'okoba oti Musengwa Katonda akoba ati, ‘Nkusiize omuzigo guno obe kyabazinga wa Isiraeli.’ Ng'omaze, oidha kwigulagho olwigi olumuke, oveeyo mangu.”

⁴ Agho omwisuka omulanzi yaaja e Ramothi Gileadi,

⁵ yaatuukayo ng'abaduumizi b'eigye batyaime mu lwekobaano. Yaakoba ati: “Isebo ndi n'obukwenda bwo.” Yehu yaamubuuza ati: “Naani ku ife y'oli kukoba.” Yairamu ati: “Iwe isebo.”

⁶ Yehu yaasituka, bombi baingira mu ndhu. Omwisuka omulanzi yaafuka omuzigo ogw'ebibala eby'emiti emyoliva ku mutwe gwa Yehu, ng'amukoba ati: “Musengwa Katonda, Katonda wa Isiraeli akoba ati, ‘Nkusiize omuzigo guno obe kyabazinga w'abantu bange Abaisiraeli.

⁷ Era oidha kwita ab'endhu ya Ahabu musengwa wo, mmwesasuulizeeku olw'abagheereza bange abalanzi n'olw'abagheereza bange abandi, Yezebeli be yaita.

⁸ Ab'endhu ya Ahabu boonaboona balizikirira. Era ndimaliragho irala mu Isiraeli buli ayetebwa musaadha asimuka mu Ahabu, k'abe omwiru oba ow'eidembe.

⁹ Ab'endhu ya Ahabu ndibakolaku nga bwe nakola ab'endhu ya kyabazinga Yeroboamu mutabane wa Nebati owa Isiraeli, era nga ni bwe nakola ku b'endhu ya kyabazinga Baasha mutabane wa Ahiya owa Isiraeli.

¹⁰ Ghazira muntu aliziika Yezebeli, omulambo gwe embwa dhiriguliira mu kiketezo eky'e Yezireeli.’ ” Omwisuka omulanzi bwe yamala okwogera ebyo, yaigulagho olwigi, yaafuluma yaalumuka.

¹¹ Agho Yehu yaafuluma, yairayo ye baduumizi baine. Owundi ku abo yaamubuuza ati: “Bye mubaireku bya miraala? Omusaadha oyo omubbamu abaire ali kukukoba ki?” Yehu yaabakoba ati: “Mwena mwidhi bukalamu omusaadha oyo n'ebibono bye.”

¹² Baamukoba bati: “Busa, ife tukobere mpegaano.” Yehu yaakoba ati: “Akobye ati Musengwa Katonda akoba ati, ‘Ndi kukusiiga omuzigo obe kyabazinga wa Isiraeli.’ ”

¹³ Amangu geene ago buli muntu ku baduumizi abo, yaatoolamu ekivaalo kye ky'avaire, yaakyaliirira ku madaala Yehu aniineku. Baafuuwa eigwala baakoba bati: “Yehu ni kyabazinga!”

Kyabazinga Yoramu owa Isiraeli bamwita

¹⁴ Agho Yehu mutabane wa Yehoshafati era mwidhukulu wa Nimushi yaakola olukwe okwita Yoramu. Mu kiseera ekyo, Yoramu n'Abaisiraeli boonaboona baali nga bali kukuuma Ramothi Gileadi kirobe kunhagibwa Hazaeli, kyabazinga wa Siria.

¹⁵ Aye kyabazinga Yoramu yali aizeeyo e Yezireeli amale okuwona ebibwa, Abasiria bye baamufumita ng'alwanisa Hazaeli kyabazinga wa Siria. Agho Yehu yaakoba baduumizi baine ati: “Oba nga muli ku luuyi lwange, mutaganha muntu yeenayeena kuseguka ni yeiba mu kibuga, okuja okukobera ab'e Yezireeli.”

¹⁶ Agho Yehu yaaniina mu kigaali kye eky'omu lutalo, yaaja e Yezireeli Yoramu ye yali ng'ali kulwalira. Ni Ahazia kyabazinga wa Buyudaaya yali ajiireyo okumubona obulwaire.

¹⁷ Agho omukuumi yali ayemereire ku kituuti ekirengererwaku mu Yezireeli, yaalengera Yehu n'ekikunsu kye eky'abantu nga kiri kwidha. Yaakoba ati: “Ndi kubona ekikunsu eky'abantu ekiri kwidha.” Yoramu yaakoba ati: “Funayo omuntu omutume ku mbalaasi, aje ye bali ababuuze ati, ‘Mwidhie lwa miraala?’ ”

¹⁸ Kale omuntu yaajiira ku mbalaasi, yaaja ye Yehu. Yaamukoba ati: “Kyabazinga ali kubuuza ati, ‘Mbu oidhie lwa miraala?’ ” Yehu yairamu ati: “Emiraala oli ku gifaaku gyaki? Bitagho, oire einhuma wange, onnonereze!” Omukuumi eyali eyemereire ku kituuti ekirengererwaku, yaatuusa amawulire ati: “Omukwenda ye ntumye abatuuseeku ye bali, aye tali kwira!”

¹⁹ Kabiri yaatuma owundi ku mbalaasi, yaabatuukaku era yaakoba ati: “Kyabazinga ali kubuuza ati, ‘Mbu oidhie lwa miraala.’ ” Yehu yairamu ati: “Emiraala oli ku gifaaku gyaki? Bitagho, oire einhuma wange, onnonereze!”

²⁰ Omukuumi oyo era yaatuusa amawulire ng'akoba ati: “Omukwenda abatuuseeku ye bali, aye tali kwira! N'envuga y'ekigaali eri ng'oti n'eya Yehu mwidhukulu wa Nimushi, avuga ekiralu!”

²¹ Yoramu yaakoba ati: “Mutegeke ekigaali kyange eky'omu lutalo.” Baakitegeka. Agho Yoramu oyo kyabazinga wa Isiraeli ni Ahazia kyabazinga wa Buyudaaya, baasitula nga buli muntu ali mu kigaali kye eky'omu lutalo, baaja okwagaanana ni Yehu, baamwagaana mu kibandha ekyali ekya Nabothi Omuyezireeli.

²² Yoramu bwe yabona Yehu, yaamubuuza ati: “Yehu, oidhie lwa miraala?” Yehu yairamu ati: “Miraala ki egisobola okubaagho, ng'okusinza ebitali Katonda n'obulogo ebya inhoko Yezebeli bikaaligho ebingi bityo?”

²³ Yoramu yaakyusa ekigaali kye eky'omu lutalo, yaalumuka nga bw'akoba Ahazi ati: “Ahazia, luno lukwe!”

²⁴ Yehu yaadhuumuula akalaso ke n'amaani ge goonagoona, yaalasa Yoramu akasaale mu mugongo, kaamubita mu mutima, yaagwa mu kigaali kye eky'omu lutalo.

²⁵ Yehu yaakoba omugheereza we Bidikari ati: “Mubbeede, omusuule mu kibandha ekyali ekya Nabothi Omuyezireeli, kuba oidhukira bukalamu nga iwe ninze bwe twali ku mbalaasi twembi nga tuli kunonereza lata we Ahabu, Musengwa Katonda yayogera ebibono bino ebikolimira Ahabu, ati,

²⁶ ‘Bwenebwene ng'olwaidho bwe naboine nga Nabothi ni batabane be babatemwire, nkukakasa nti ndikwesasuulizaaku ghano mu kibandha kino.’ Kale ni mubbeede, omusuule mu kibandha ekyo okutuukiriza ekyo Musengwa Katonda kye yakoba.”

Kyabazinga Ahazia owa Buyudaaya bamwita

²⁷ Ahazia kyabazinga wa Buyudaaya bwe yabona ebibairegho, yaalumukira mu kigaali kye eky'omu lutalo ng'agemye engira eja e Bethi Haggani. Yehu yaamubingirira, era yaakoba abasaadha be ati: “N'oyo yeena mumufumite.” Baamufumitira mu kigaali kye eky'omu lutalo, ere ng'oniinaniina Guri ekiri okumpi ni Ibuleamu. Yaalumukira e Megiddo yaafiira eyo.

²⁸ Abagheereza be baamutwalira mu kigaali eky'omu lutalo, baamwizaayo e Yerusalemu. Baamuziika mu magombe ge mu lwambiidhi lwa badhaadha be, mu kyetebwa Ekibuga kya Daudi.

²⁹ Ahazia oyo yali nga yafuuka kyabazinga wa Buyudaaya mu mwaka ogweikumi n'omulala (11) nga kyabazinga Yoramu mutabane wa Ahabu n'afuga Isiraeli.

Inhebantu Yezebeli bamwita

³⁰ Agho Yehu yatuuka mu Yezireeli. Yezebeli yaategeera ebibairegho, yeetonatona amaiso era yaawoomya enviiri ku mutwe gwe, yaalingirira kuliya ng'ali mu idinisa.

³¹ Yehu bweyali ng'ali kwingira mu mulyango, Yezebeli yaamweta ati: “Iwe Zimuri eyatemula musengwa wo, oidhie lwa miraala?”

³² Yehu yaakyukiza amaiso ghaigulu aghali dinisa, yaakoba ati: “Naani ali ku luuyi lwange? Naani?” Abalaawe ab'omu kisaagaati kya kyabazinga babiri oba basatu, baamulengezaaku.

³³ Yehu yaabakoba ati: “Mumusuule ghansi!” Baamusuula ghansi, omusaayi gwe gwasambukira ku kimante ni ku mbalaasi. Era embalaasi dhaamutyankirira.

³⁴ Yehu yaingira mu kisaagaati kya kyabazinga, yaalya era yaanhwa. Memale yaakoba ati: “Mubone nti muziika omukazi oyo eyakolimirwa, kuba mughala wa kyabazinga.”

³⁵ Aye bwe baaja okumuziika tibaayagaanagho kitundu kindi ku mubiri gwe kyonakyona, okutoolaku ekighanga, n'ebigere bye, n'ag'engalo dhe byonka.

³⁶ Bwe baira ni bakobera Yehu, Yehu yaabakoba ati: “Ekyo Musengwa Katonda kye yakoba ng'abita mu mugheereza we Eliya Omutishubi ati, ‘Embwa dhiririira omulambo gwa Yezebeli mu kiketezo ky'e Yezireeli.

³⁷ Omulambo gwe guliba mu nsiko ey'eyo mu Yezireeli ng'oti bwa busa, ghabulegho aghanga n'okukoba ati ono ni Yezebeli.’ ”