2 Bakyabazinga 8 - Baibuli Ekibono kya Katonda 2014

Omukazi ow'e Shunemu aira

¹ Elisha yali akobye omukazi Omushunami mwene mwana Elisha oyo ye yaizaamu obulamu, ati: “Kola oje n'ab'endhu yo, obone y'onaaghanga okusenga, kuba Musengwa Katonda aja kusindika endhala ku nsi emale emyaka musanvu ng'eri kuluma.”

² Kale omukazi oyo yaasituka, yaakola ng'omuntu wa Katonda bwe yamukoba. Yaaja n'ab'endhu ye, yaasenga mu nsi ey'Abafilisiti okumala emyaka musanvu.

³ Emyaka egyo omusanvu bwe gyawaaku, omukazi oyo yaava mu nsi ey'Abafilisiti, yairayo mu Isiraeli. Era yaaja eri kyabazinga okumusaba amwirize endhu ye n'ekibandha kye.

⁴ Yaayagaana nga kyabazinga ali kwogera ni Gehazi omugheereza wa Elisha omuntu wa Katonda, ng'ali kukoba ati: “Nkobera byonabyona eby'amaani Elisha bye yakola.”

⁵ Gehazi bweyali ali kukobera kyabazinga ng'Elisha bwe yaiza mu muntu eyali afiire obulamu, omukazi oyo mwene mwana Elisha ye yaizaamu obulamu yaatuuka mu kaseera ako, yaasaba kyabazinga amwirize endhu ye n'ekibandha kye. Agho Gehazi yaakoba ati: “Isebantu kyabazinga, omukazi ye ndi kwogeraku wuuno era n'omwana we n'ono Elisha ye yaizaamu obulamu!”

⁶ Kyabazinga bwe yabuuza omukazi nga bwe byali, omukazi yaamukobera byonabyona. Kale ni, kyabazinga yaamutaaku omukungu ng'amukoba ati: “Omukazi ono mwirize ebintu byonabyona ebyali ebibye, oteeku n'omughendo oguja mu bibala byonabyona ebyava mu kibandha kye, ekiseera kyonakyona kye yamala ng'aziragho.”

Elisha ni kyabazinga Benihadadi owa Siria

⁷ Agho Elisha yaaja e Damasiko. Mu kiseera ekyo Benihadadi kyabazinga wa Siria yali mulwaire. Bwe baakobera Benihadadi oyo bati: “Omuntu wa Katonda aidhie kuno,”

⁸ yaakoba Hazaeli ati: “Twala ekirabo, oje obone omuntu wa Katonda, obite mu oyo weebuuze ku Musengwa Katonda oba nga nnaawona obulwaire buno.”

⁹ Agho Hazaeli yaaja okubona Elisha, ng'atwaire ku bintu byonabyona ebirungi eby'omu Damasiko, ng'abitwise ku ngamiya amakumi ana (40). Bwe yatuuka aghali Elisha, yaakoba ati: “Mutabane wo Benihadadi kyabazinga wa Siria antumye y'oli nkubuuze oba nga anaawona obulwaire obumuluma.”

¹⁰ Elisha yaamwiramu ati: “Iwe ja omukobe oti, ‘Bwenebwene oidha kuwona.’ Aye mu butuufu nze Musengwa Katonda andholeike ng'aidha kufa.”

¹¹ Agho Elisha yaalingirira Hazaeli obutatemya, okutuusa ensoni lwe dhaagema Hazaeli oyo. Elisha omuntu wa Katonda oyo yaalira amaziga.

¹² Hazaeli yaabuuza ati: “Musengwa Katonda wange, lwaki oli kulira?” Elisha yairamu ati: “Lwa kuba ndidhi ebiinoino by'olikola ku Baisiraeli. Olikuma omuliro ku bifo byaibwe eby'okwewogomamu, waita abaana baibwe abaakaisuka, era waabaagamu abakazi baibwe abali enda.”

¹³ Hazaeli yaabuuza ati: “Katyo nze omugheereza wo ndi ng'embwa obubwa, ndisobola ntya okukola ekyaga agho?” Elisha yairamu ati: “Musengwa Katonda andholeike ng'oliba kyabazinga wa Siria.”

¹⁴ Agho Hazaeli yairayo ye Benihadadi musengwa we. Benihadadi yaamubuuza ati: “Elisha akukobye ki?” Hazaeli yairamu ati: “Ankobye ati bwenebwene oidha kuwona.”

¹⁵ Aye ku lunaku olwairirira, Hazaeli yaatoola ekyebwiko, yaakiinhika mu maadhi, yaakisemba mu nhindo ni mu kanwa mwa kyabazinga Benihadadi, yaafa ekiziyiro. Agho Hazaeli yaasikira Benihadadi ku bwakyabazinga bwa Siria.

Kyabazinga Yehoramu owa Buyudaaya

¹⁶ Mu mwaka ogwokutaanu nga kyabazinga Yoramu mutabane wa Ahabu n'afuga Isiraeli, Yehoramu yaafuuka kyabazinga wa Buyudaaya. Yehoramu oyo yali mutabane wa Yehoshafati eyali kyabazinga wa Buyudaaya.

¹⁷ Yali agheza emyaka amakumi asatu n'ebiri egy'obukulu, era yaafuga okumala entangama ya myaka munaana mu Yerusalemu.

¹⁸ Yafumbirwa mughala wa Ahabu, era yaakola ng'ab'endhu ya Ahabu oyo bwe baakola, yaajiira ku mpisa embi edha bakyabazinga ba Isiraeli, yaakola ebibi ye Musengwa Katonda.

¹⁹ Aye Musengwa Katonda yaaloba kuzikiriza Buyudaaya, kuba yasuubiza omugheereza we Daudi ati eizaire lye n'erinaafuganga obwakyabazinga obwo ebyanda n'ebyanda.

²⁰ Mu biseera bya Yehoramu oyo, Abaedomu baadheemera Buyudaaya, beeteeragho obwakyabazinga obwaibwe.

²¹ Yehoramu yaaja e Zairi n'ebigaali bye eby'omu lutalo byonabyona. Eigye ery'Abaedomu lyabazingiza okubeezunguluza. Agho mwene ghalala n'abaduumizi b'ebigaali bye eby'omu lutalo, baasituka obwire baita Abaedomu. Aye ab'eigye lye baalumuka, bairayo eka.

²² Kale ensi Edomu yaadheema ku Buyudaaya ni ye buli eno. Era mu kiseera kyene ekyo, ekibuga Libuna kyona kyadheema.

²³ Ebindi byonabyona Yehoramu bye yakola, byaghandiikibwa mu Kitabo ky'Ebyomubyanda bya Bakyabazinga ba Buyudaaya.

²⁴ Kale Yehoramu yaafa yeeyimba ku badhaadha be abaafa, era yaaziikibwa mu lwambiidhi ni badhaadha be abo, mu kyetebwa Ekibuga kya Daudi. Mutabane we Ahazia yaamusikira ku bwakyabazinga.

Kyabazinga Ahazia owa Buyudaaya

²⁵ Mu mwaka ogweikumi n'ebiri (12) nga Kyabazinga Yoramu mutabane wa Ahabu n'afuga Isiraeli, Ahazia mutabane wa Yehoramu yaafuuka kyabazinga wa Buyudaaya.

²⁶ Yali agheza emyaka amakumi abiri n'ebiri egy'obukulu, era yaafugira entangama ya mwaka mulala mu Yerusalemu. Inhina yali nga ni Athalia mughala wa kyabazinga Ahabu, era mwidhukulu wa kyabazinga Omuri owa Isiraeli.

²⁷ Ahazia nga bweyali omwidhukulu mu ndhu ya Ahabu, yeena yajiira ku mpisa embi edh'ab'endhu ya Ahabu oyo, era yaakola ebibi ye Musengwa Katonda nga bwe baakola.

²⁸ Kyabazinga Ahazia oyo yaja mu lutalo ni kyabazinga Yoramu owa Isiraeli mutabane wa Ahabu, okulwanisa kyabazinga Hazaeli owa Siria. Olutalo olwo lwataamira e Ramothi Gileadi, Abasiria baafumitira eyo Yoramu ebibwa.

²⁹ Kyabazinga Yoramu oyo, yairayo e Yezireeli amale okuwona ebibwa Abasiria bye baamufumitira e Rama ng'alwanisa kyabazinga Hazaeli owa Siria. Agho kyabazinga Ahazia mutabane wa Yehoramu kyabazinga wa Buyudaaya, yaajaayo okumubona obulwaire.