2 Bakyabazinga 7 - Baibuli Ekibono kya Katonda 2014

¹ Elisha yaakoba ati: “Muwulire Musengwa Katonda ky'akoba. Musengwa Katonda akoba ati, ‘Olwaidho mu kiseera ng'oti ni kino, ku mulyango ogwingira mu kibuga Samaria, kilo eisatu edh'obuwunga obuseereibwa obukalamu dhiidha kuba nga dhigula ekitundu kirala ekya feeza, ni kilo omukaaga edha sayiri dhoona dhiidha kuba nga dhigula ekitundu kirala kyonka ekya feeza.’ ”

² Agho omugheereza wa kyabazinga ataamuvangaku, yaabuuza omuntu wa Katonda ati: “Ni bw'aba Musengwa Katonda mwene nga n'agwisiisa amaadhi amangu ago, bwenebwene ekyaga agho kighanga okubaagho?” Elisha yairamu ati: “Oidha kukibonera irala n'amaiso go geene oti, aye ebyo toidha kubiryaku naire.”

Eigye lya Siria ligumbulukuka

³ Agho ghaabaagho abasaadha bana abali n'endwaire ey'ebigenge nga bali kuliya kw'omulyango ogwingira mu kibuga Samaria. Beekobaana beene na beene bati: “Lwaki tuli kutyama obwa ghano okutuusa lwe tunaafa?

⁴ Bwe tukoba tuti, ‘Twingire mu kibuga,’ ekibuga kirimu endhala era twidha bwa kufiira eyo. Ate bwe tutyama obutyame ghano, era twidha kufa. Kale ni mukole tuje mu kifo Abasiria ghe baasimba weema dhaibwe. Bwe banaatuleka nga tuli balamu, twidha kuba balamu. Aye bwe banaatwita, twidha kufa.”

⁵ Kale baasitula ng'obwire buli kuziba, baaja mu kifo Abasiria ghe baasimba weema dhaibwe. Bwe baakituukaku, baaja okulinga bati nga ghaziragho muntu waire omulala ati

⁶ kuba Musengwa Katonda yaaleetera ab'eigye lya Siria okuwulira okupakalana okw'ebigaali eby'omu lutalo, n'okugabbalya okw'ebigere by'embalaasi, nga kuli ng'oti kwa igye inene. Kale beekobaana beene na beene bati: “Bona, kyabazinga wa Isiraeli apangiisa bakyabazinga ab'Abahitti n'ab'Abamisiri okwidha okutulwanisa!”

⁷ Kale baalumukagho ng'obwire buli kuziba baaja, baalekulira agho eweema dhaibwe, n'embalaasi dhaibwe, n'endogoyi dhaibwe, era n'ekifo kyonakyona ghe baasimba weema dhaibwe baakireka nga bwe kyali.

⁸ Abasaadha abo ab'endwaire ey'ebigenge bwe baatuuka ku kifo Abasiria ghe baasimba weema dhaibwe, baingira mu yindi ku weema, baalya, baanhwa, era baatoolamu feeza ni zaabu n'ebivaalo, baaja baabigisa. Baamala baira, kabiri baingira mu weema eyindi, baatoolamu ebyalimu, byona baaja baabigisa.

⁹ Agho beekobaana beene na beene bati: “Kye tuli kukola ti kituufu. Olwaleero lwa mawulire malungi. Aye bwe tunaagasirikira ni tuteega obwire okukya memale tugasansaanie, baidha kutubonereza. Kale ni mwidhe tuje tukobere abakungu ba kyabazinga.”

¹⁰ Agho bairayo ku kibuga Samaria, baayeta abaigazi b'ekibuga ekyo, baabakobera bati: “Tujiire mu kifo Abasiria ghe baasimba weema dhaibwe, twaloba kwagaanayo waire okuwulirayo omuntu naire omulala ati. Aye ghabairegho bwa mbalaasi na ndogoyi nga nsibe, ni weema nga badhirese nga bwe dhaabaire.”

¹¹ Abaigazi b'ekibuga baalangirira amawulire ago, era baagatuusa mu kisaagaati kya kyabazinga.

¹² Agho kyabazinga yaasituka mu bwire obwo, yaakoba abakungu be ati: “Ka mbakobere Abasiria kye bategeike: Baidhi ng'endhala etuli bubi, kye baviire ni bava mu kifo ghe baasimba weema dhaibwe, ni baja okwegisa mu irungu nga bakoba bati, ‘Abaisiraeli bwe banaafuluma mu kibuga, twidha kubagema nga balamu twingire ekibuga.’ ”

¹³ Omulala ku bakungu be yaakoba ati: “Leka abasaadha bageme eitaanu ku mbalaasi edhikaasigaireyo, badhivuge bajeeyo, kuba era kiri nti abantu abasigairegho mu kibuga kino, ba kufa ng'oti n'Abaisiraeli abandi boonaboona abafiire. N'olw'ekyo ka tutumeyo tubone.”

¹⁴ Kale baaleeta ebigaali bibiri eby'omu lutalo, kyabazinga yaatuma abantu okunonereza eigye ery'Abasiria, ng'akoba ati: “Muje mubone ekiriyo.”

¹⁵ Abakwenda baaja baatuukira irala ku Yorudani, era baabona nga mu ngira mwonamwona mwidhwire ebivaalo n'ebintu ebindi Abasiria bye baasuula nga bali kulumuka. Agho bairayo baakobera kyabazinga.

¹⁶ Abantu ab'omu Samaria baaja baanhaga ebintu mu kifo Abasiria ghe baasimba weema dhaibwe. Kilo eisatu edh'obuwunga obuseereibwa obukalamu dhaagula ekitundu kirala ekya feeza, ni kilo omukaaga edha sayiri dhoona dhaagula ekitundu kirala kyonka ekya feeza, nga Musengwa Katonda bwe yakoba.

¹⁷ Mu kiseera ekyo kyabazinga yali alonze omugheereza we ataamuvangaku, yaamutaagho okukuuma omulyango ogwingira mu kibuga. Abantu baatyankirira omugheereza oyo ng'ali mu mulyango, yaafa ng'Elisha omuntu wa Katonda bwe yalanga ku lule kyabazinga lwe yaja y'ali okumubona.

¹⁸ Elisha oyo yali akobye kyabazinga ati: “Olwaidho mu kiseera ng'oti ni kino, ku mulyango ogwingira mu kibuga Samaria, kilo eisatu edh'obuwunga obuseereibwa obukalamu dhiidha kuba nga dhigula ekitundu kirala ekya feeza, ni kilo omukaaga edha sayiri dhoona dhiidha kuba nga dhigula ekitundu kirala kyonka ekya feeza.”

¹⁹ Aye omugheereza oyo yairamu Elisha ati: “Ni bw'aba Musengwa Katonda mwene nga n'agwisiisa amaadhi amangu ago, bwenebwene ekyaga agho kighanga okubaagho?” Elisha yairamu ati: “Oidha kukibonera irala n'amaiso go geene oti, aye ebyo toidha kubiryaku naire.”

²⁰ Mu nsambo eyo ekyo kyatuukirira, kuba abantu baamutyankirira ng'ali mu mulyango, yaafa.