2 Bakyabazinga 6 - Baibuli Ekibono kya Katonda 2014

Elisha aleetera empasa eyagwa mu maadhi okuboneka

¹ Lwali lulala, ab'omu kikunsu ky'abalanzi abaabanga ni Elisha baamukoba bati: “Isebo, weena nga bw'oli kubona, ekifo kye tubaamu n'iwe kitono inho.

² Tuganhe tuje ku mwiga Yorudani tutemeyo omuti mulala mulala buli muntu, twezimbiregho ekifo eky'okubaamu.” Elisha yairamu ati: “Kale muje.”

³ Omulala ku abo yaakoba ati: “Nkweghemba oganhe oje n'ife abagheereza bo.” Elisha yairamu ati: “Kale tuje.”

⁴ Kale yaaja ghalala nabo, era bwe baatuuka ku mwiga Yorudani, baatema emiti.

⁵ Aye omulala ku abo bweyali ali kutema omuti, empasa yaaghanguka mu muyini yaagwa mu maadhi. Yaaleekaana ng'akoba ati: “Nkagwireku nze, musengwa wange! Empasa ngyeyaziike bweyazike!”

⁶ Elisha omuntu wa Katonda yaabuuza ati: “Egwire gha?” Ole yaamwoleka ekifo gh'egwire. Elisha yaatema akati, yaakasuula mu maadhi, yaaleetera empasa okulera ku maadhi.

⁷ Agho yaakoba ati: “Gitooleyo.” Ole yaaghaaniriza omukono yaagitoolayo.

Eigye ery'Abasiria lighangulwa

⁸ Lwali lulala kyabazinga wa Siria yaatanula olutalo ku Isiraeli. Yeebuuza ku bakungu be, yaalondagho ekifo mwe banaasimba weema dhaibwe.

⁹ Aye Elisha omuntu wa Katonda yagheereza kyabazinga wa Isiraeli obukwenda obulabula ng'akoba ati: “Otageza naire kubita mu kifo ekyo, kuba Abasiria bali kujaayo.”

¹⁰ Agho kyabazinga wa Isiraeli yaagheereza obukwenda obwo obulabula eri ab'omu kiketezo ekyo Elisha omuntu wa Katonda kye yamukoberaku. Elisha yalabulanga kyabazinga ku kifo ekyo emikuzi egigheraku, kale mu nsambo eyo kyabazinga yaawonanga akabi okumutuukaku mu kifo ekyo.

¹¹ Ekyo kyaleetera kyabazinga wa Siria okutabulwa einho. Yaayeta abakungu be, yaababuuza ati: “Naani mu ife ali ku luuyi lwa kyabazinga wa Isiraeli?”

¹² Owundi ku bakungu be yairamu ati: “Isebantu kyabazinga, ghaziragho waire omulala ati. Aye Elisha, omulanzi ali mu Isiraeli, n'akobera kyabazinga wa Isiraeli byonabyona, ni bwe biba ebyo by'oyogerera mu kisenge kyo ky'osulamu.”

¹³ Kyabazinga wa Siria yaakoba ati: “Muje muzuule gh'ali, nsobole okutumayo abantu bamuleete.” Baamukobera bati: “Bona, Elisha ali Dothani.”

¹⁴ Agho yaasindikayo eigye enene n'embalaasi, n'ebigaali eby'omu lutalo. Eigye eryo lyatuukayo bwire, lyazingiza ekibuga okukyezunguluza.

¹⁵ Omugheereza wa Elisha omuntu wa Katonda bwe yazuuka enkyo ku nkyo, yaafuluma. Okuja okulinga ati, ng'abona eigye n'embalaasi, n'ebigaali eby'omu lutalo, nga bazingiiza ekibuga okukyezunguluza. Agho yaakoba Elisha ati: “Tukagwireku, musengwa wange! Tunaakola tutya?”

¹⁶ Elisha yaamwiramu ati: “Otatya, kuba abali ku luuyi olwaife, bangi okusinga abali ku luuyi olwaibwe.”

¹⁷ Agho Elisha yeeghemba Musengwa Katonda ng'akoba ati: “Wo Musengwa Katonda, nkweghemba oigule amaiso ge aghange okubona.” Musengwa Katonda yaigula amaiso g'omugheereza oyo. Yaja okulinga ati, ng'abona olusozi nga lwidhwire embalaasi n'ebigaali eby'omu lutalo ebiri kwaka omuliro, nga byezungulwire Elisha.

¹⁸ Abasiria bwe baidha okulumba Elisha, Elisha oyo yaasaba Musengwa Katonda ati: “Wo Musengwa Katonda, nkweghemba oleetere amaiso g'abantu bano okutulughala.” Musengwa Katonda yaaleetera amaiso gaibwe okutulughala ng'Elisha bwe yasaba.

¹⁹ Agho Elisha yaaja ye bali yaabakoba ati: “Eno engira ye mugemye ti n'entuufu, era kino ti n'ekibuga kye mwidhiriire. Muunonereze nze, ndidha kubatuusa ku muntu ye muli kwagala.” Yaabatwala e Samaria.

²⁰ Olwatuuka bati mu Samaria, Elisha yaasaba Musengwa Katonda ati: “Wo Musengwa Katonda, nkweghemba oigule amaiso g'abantu bano baghange okubona.” Kale Musengwa Katonda yaigula amaiso gaibwe, baabona. Baaja okulinga bati, nga bali mu Samaria ghagati.

²¹ Kyabazinga wa Isiraeli bwe yabona Abasiria abo, yaabuuza Elisha ati: “Lata wange, mbaite? Mbaite?”

²² Elisha yairamu ati: “Busa, otabaita. Ky'okoba oti n'abantu b'oba onhaze mu lutalo, obaita bwite? Baghe emere n'amaadhi balye era banhwe, memale obaleke baireyo ye musengwa waibwe.”

²³ Agho kyabazinga wa Isiraeli yaabafumbira embaga enene. Bwe baamala okulya n'okunhwa, kyabazinga oyo yaabasiibula, bairayo ye musengwa waibwe. Okuva n'olwo, Abasiria baalekera agho okujanga okulumba ensi Isiraeli.

Abasiria bazingiza Samaria okukyezunguluza

²⁴ Ebyo bwe byawa, Benihadadi kyabazinga wa Siria yaasoloza eigye lye lyonalyona, yaaja yaazingiza ekibuga Samaria.

²⁵ Okuzingiza okwo kwaleeta endhala ey'amaani mu kibuga, omutwe gw'endogoyi gwatuuka okugula ebitundu ekinaana ebya feeza, n'akatundu akalala ku buli butundu obuna obwa saabira w'enjiibwa kaagula ebitundu bitaanu ebya feeza.

²⁶ Kyabazinga wa Isiraeli bweyali ng'ali kubita kumpi n'ekimante ky'ekibuga, omukazi mulala yaamulirira ng'akoba ati: “Isebantu kyabazinga, nhamba.”

²⁷ Kyabazinga yaamwiramu ati: “Musengwa Katonda mwene bw'ataakuyambe, nze nnaatoola gha eby'okukuyamba, ate nga zeena mu kifo aghakubirwa engaano nzirayo ka kulya, waire mu kikunhiro eky'omwenge gw'emizabbibu okubaayo n'ak'okunhwa?”

²⁸ Kyabazinga yaamubuuza ati: “Kizibu ki ky'oli nakyo?” Omukazi yairamu ati: “Omukazi ono yankoba ati, ‘Leeta omwana wo tumulye olwaleero, ate olwaidho twidha kulya owange.’

²⁹ Kale twafumba omwana owange, twamulya. Ku lunaku olwairirira naamukoba nti leeta omwana owuwo tumulye, aye mwene yaagisa owuwe!”

³⁰ Kyabazinga bwe yawulira omukazi oyo bye yayogera, yaakanulamu ebivaalo bye olw'okunakughala. Abantu abaali agho gha kimante ky'ekibuga ghe yali ali kubita, baabona ng'avaire ekutiya ku mubiri gwe olw'okwebonereza.

³¹ Kyabazinga oyo yaakoba ati: “Katonda agwananga yambonereza n'obukambwe, Elisha mutabane wa Safati bwe bataamutemeku mutwe olwaleero.”

³² Agho yaatuma omukwenda okweta Elisha. Mu kiseera ekyo Elisha yali ng'atyaime mu ndhu ye eka ghalala n'abakulembeze b'abantu abaidha okumubona. Omukwenda wa kyabazinga bweyali ng'akaali kutuuka, Elisha yaakoba abakulembeze abo ati: “Muli kubona omutemo oyo bw'atumye bantemeku omutwe? Kale mubone eno, omukwenda bw'anaatuuka, mwidha kwigalagho olwigi mulukalangule, alobe kwingira. Ni kyabazinga mwene aidha kuba ng'ali kumuvaaku einhuma.”

³³ Yali akaayogera nabo, kyabazinga yaatuuka gh'ali, yaamukoba ati: “Musengwa Katonda n'atutuusiisaaku akabi kano. Kale lwaki nhongera okuteega okubona Musengwa Katonda ky'anaakola?”