2 Bakyabazinga 5 - Baibuli Ekibono kya Katonda 2014

Naamani awonezebwa

¹ Agho olwatuuka ghaabaagho omusaadha nga ni Naamani, eyali omuduumizi w'eigye lya kyabazinga wa Siria. Naamani oyo yali muntu wa kitiibwa era ng'asiimibwa inho musengwa we, kuba olwa Naamani oyo, Musengwa Katonda yagha Siria obughanguzi. Naamani yali musaadha wa maani aziramu ntete naire, aye yali n'endwaire ey'ebigenge.

² Abasiria mu lulumba lwaibwe olundi ku edho dhe baalumbangamu Isiraeli, baali nga baanhaga omughala Omuisiraeli omutomuto, yaafuuka mugheereza wa muka Naamani.

³ Lwali lulala, omughala oyo yaakoba muka Naamani ati: “Ngoli musengwa wange ajaaku y'omulanzi ali e Samaria, omulanzi oyo yandimuwoniiza endwaire ye ey'ebigenge.”

⁴ Kale Naamani yaaja yaakobera musengwa we ati: “Omughala ye baatoola mu Isiraeli akobye ati n'ati.”

⁵ Kyabazinga wa Siria yaakoba ati: “Kale ja. Ndidha kughandiikira kyabazinga wa Isiraeli embaluwa ogimutwalire.” Agho Naamani yaaja ng'atwaire n'ebitundu bya feeza enkumi isatu (3,000), n'ebya zaabu kakaaga (6,000), era n'ebivaalo ikumi ebirungi.

⁶ Embaluwa ye yatwalira kyabazinga wa Isiraeli ng'ekoba eti: “Embaluwa eno bw'ekutuukaku, manha nga ninze ntumye Naamani omugheereza wange aidhe y'oli, osobole okumuwonia endwaire ye ey'ebigenge.”

⁷ Kyabazinga wa Isiraeli bwe yasoma embaluwa eyo, yaakanulamu ebivaalo bye olw'okusoberwa. Yaakoba ati: “Obwo nze ndi Katonda, ali n'obuyinza okwita n'okugha obulamu? Omusaadha ono aghanga atya okunsindikira omuntu mmuwonie endwaire ye ey'ebigenge? Bwenebwene ali bwa kuneesonsaaku bwesonse afune bw'anaatoolereza okusoola ninze!”

⁸ Elisha omuntu wa Katonda bwe yawulira nga kyabazinga wa Isiraeli akanwiremu ebivaalo bye olw'okusoberwa, yaamusindikira obukwenda ng'akoba ati: “Lwaki okanwiremu ebivaalo byo n'osoberwa otyo? Iwe muleke aidhe ye ndi aghange okumanha nga mu Isiraeli mulimu omulanzi.”

⁹ Kale Naamani yaaja n'embalaasi dhe, n'ebigaali bye eby'omu lutalo, yaasibira ku mulyango gw'endhu ya Elisha.

¹⁰ Elisha yaamutumira omukwenda okumukoba ati: “Ja onaabe emikuzi musanvu mu mwiga Yorudani, oidha kuwona obe mulongoofu.”

¹¹ Aye Naamani yaasungughala inho, yaaja ng'akoba ati: “Bona, mbaire ndhuuba nti anaavaayo yaidha yaayemerera ghe ndi, yeeghemba Musengwa Katonda we era yaagheegheeta n'engalo dhe aghali obulwaire, yamponia endwaire ey'ebigenge.

¹² Ate n'ekindi, emiiga Abana ni Farupari egy'e Damasiko giziramu maadhi agasinga amaadhi ag'omu Isiraeli goonagoona obulungi? Tisobola kunaaba omwo ni mba mulongoofu?” Kale yaakyuka yaagolola, nga musungughavu inho.

¹³ Aye abagheereza be baaseeta gh'ali, baamukoba bati: “Isebo, ngoli omulanzi akukobye okukola ekintu ekikalangafu, tiwandikikoze? Kale tikikwanguyira inho, bw'akukoba ati, ‘Naaba obe mulongoofu.’ ”

¹⁴ Agho Naamani yaaserengeta, yaaja yeinhika mu mwiga Yorudani emikuzi musanvu, ng'Elisha omuntu wa Katonda bwe yamukoba. Era omubiri gwe gwaira buto ng'oti gwa mwana muto, yaaba mulongoofu.

¹⁵ Yairayo y'omuntu wa Katonda ghalala ni be yali nabo boonaboona, yaayemerera mu maiso ge, yaakoba ati: “Bona, mpegaano ntegeereire irala nga mu nsi muzira katonda wundi okutoolaku Katonda wa Isiraeli. Kale ganha nze omugheereza wo nkughe ekirabo kye nkuleeteire.”

¹⁶ Elisha yaakoba ati: “Ndayira mu Musengwa Katonda omulamu ye mpeereza nti tiidha kubaaku kintu kye ntwala waire ekirala.” Naamani yaamwegayirira inho akitwale, aye yaaloba.

¹⁷ Agho Naamani yaakoba ati: “Oba olobye okutwala ekirabo, nkweghemba ompe eitaka erighanga okwetwikibwa enhumbu eibiri, nditwale ewaife, kuba okuva ni mpegaano, nze omugheereza wo tiidha kughangayo bigheebwayo byokebwa oba misengo eri musambwa waire omulala, okutoolaku eri Musengwa Katonda.

¹⁸ Aye nsaba Musengwa Katonda ansonighenga nze omugheereza wo, bwe naagherekerangaku musengwa wange kyabazinga wa Siria, okuja okusinziza mu isabo lya Rimmoni omusambwa gwa Siria. Bwe nnaakubanga amakiryaivu mu isabo lya Rimmoni, Musengwa Katonda ansonighenga mu ekyo.”

¹⁹ Elisha yaamukoba ati: “Ja miraala.” Agho Naamani yaaja. Aye yali yaakatambulaku katono,

²⁰ Gehazi omugheereza wa Elisha omuntu wa Katonda, yaakoba mule ati: “Bona, musengwa wange alese Naamani Omusiria yaaja, nga tamutoireeku ebyo bye yaleeta! Ndayira mu Musengwa Katonda omulamu nti ndidha kumulumuukirira mbeeku ni kye mmutoolaku.”

²¹ Kale Gehazi oyo yaalumuukirira Naamani. Naamani bwe yabona omuntu ali kumulumuukirira ng'amuvaaku einhuma, yaava mu kigaali eky'omu lutalo okumubona. Yaamubuuza ati: “Eriyo ekizibu?”

²² Gehazi yairamu ati: “Busa, ezirayo kizibu. Aye musengwa wange antumye nkukobe nti, ‘Mu kaseera kano abaisuka babiri ku b'omu kikunsu ky'abalanzi, bava kwidha ye ndi nga baviira mu kiketezo kya Efuraimu eky'ensozi. Nkweghemba obampeere ebitundu bya feeza enkumi isatu (3,000), n'ebivaalo ebirungi bibiri.’”

²³ Naamani yaakoba ati: “Ganha otwale ebitundu bya feeza kakaaga (6,000).” Yaamwegayirira inho, era yaasiba ebitundu bya feeza ebyo mu nsawo ibiri ghalala n'ebivaalo bibiri ebirungi, byonabyona yaabitwika abagheereza be, baabitwala nga bakulembeiremu Gehazi.

²⁴ Bwe baatuuka ku lusozi Elisha kwe yali, Gehazi yaabibatwikula, yaabitereka mu ndhu. Yaakoba abagheereza ba Naamani bairayo.

²⁵ Yaingira mu ndhu, yaayemerera mu maiso ga Elisha musengwa we. Elisha yaamubuuza ati: “Ova gha, Gehazi?” Gehazi yairamu ati: “Nze omugheereza wo nkaali kujaaku ghantu woonawoona.”

²⁶ Aye Elisha yaamukoba ati: “Tibaire n'iwe mu mwoyo, omusaadha bw'aviire mu kigaali kye eky'omu lutalo okukubona? Kino n'ekiseera okwefunira empiiya n'ebivaalo, amasamba g'emiti emyoliva n'ag'emizabbibu, entaama n'ente, oba abairu abasaadha n'abairu abakazi?

²⁷ Kale ni endwaire ey'ebigenge eya Naamani eidha kukugema, era egemenga n'ab'eizaire lyo ebyanda n'ebyanda.” Gehazi yaja okuva aghaali Elisha ng'ali n'endwaire ey'ebigenge, nga mweru ng'oti mugozi.