2 Bakyabazinga 4 - Baibuli Ekibono kya Katonda 2014

Elisha ayamba namwandu omwavu

¹ Agho namwandu ow'owundi ku b'ekikunsu ky'abalanzi, yaalirira Elisha ng'akoba ati: “Omugheereza wo, baze, yafa. Era oidhi omugheereza wo oyo nga bweyali atya Musengwa Katonda. Aye mpegaano omuntu eyali amubandha, aidhie okutwala abaana bange bombi abafuule abairu be.”

² Elisha yaamubuuza ati: “Oyenda nkukolere ki? Nkobera, kiki ky'oli nakyo mu ndhu yo?” Omukazi yairamu ati: “Nze omugheereza wo, nzira kantu naire mu ndhu, okutoolaku akadoome konka akalimu omuzigo ogw'ebibala eby'emiti emyoliva.”

³ Elisha yaamukoba ati: “Ja weeyazike ku baino boonaboona ab'oku muliiraano ebidoome ebikalu ate nga bingi.

⁴ Memale oje oingire mu ndhu yo weigalizeemu ni batabane bo, olwo oitululire omuzigo mu bidoome ebyo byonabyona, nga buli ekiidhula okiiza gha mbali.”

⁵ Kale omukazi yaava ye Elisha, yaaja yaingira mu ndhu ye ni batabane be, beigalizaamu. Yaagema akadoome ak'omuzigo, yaatoolera okwitulula nga batabane be bwe bamuleetera ebidoome eby'okwitululiramu.

⁶ Ebidoome bwe byaidhula, yaakoba owundi ku batabane be ati: “Ndeetera ekidoome ekindi.” Mutabane we yaamukoba ati: “Ghaziragho kidoome kindi.” Agho omuzigo gwalekera agho okwidha.

⁷ Omukazi yaaja yaakobera Elisha omusaadha wa Katonda. Elisha yaamukoba ati: “Ja otunde omuzigo ogwo, osasule eibandha ly'oli nalyo, ate ogunaafikagho mwidha kugukozesa, iwe ni batabane bo.”

Elisha n'omukazi omukombe ow'e Shunemu

⁸ Lwali lulala, Elisha yaaja e Shunemu. Eyo e Shunemu yaliyo omukazi omukombe, yaamwegayirira alye ku mere mu maka ge. Era okuva ku olwo, Elisha buli lwe yabitanga oluuyi olwo, ng'aja yaalya emere mu maka ago.

⁹ Omukazi oyo yaakoba iba ati: “Bona, mpegaano ntegeire ng'omusaadha oyo atera okubitira ewaife, muntu wa Katonda mutukuvu.

¹⁰ Ka tumuzimbire akasenge ku kasolya k'endhu yaife tumuteeremu obuliri, n'emeeza, n'ekityamo, n'entaala, olwo asobole okubanga omwo buli lw'anaatukyaliranga.”

¹¹ Lwali lulala Elisha yaidha e Shunemu, yaingira mu kasenge ako, yaawuumuliraku omwo.

¹² Agho yaakoba Gehazi omugheereza we ati: “Yeta Omushunami oyo.” Gehazi yaayeta omukazi, yaidha yaayemerera agho.

¹³ Elisha yaakoba Gehazi ati: “Mukobe oti, ‘Otawaine inho okutulabirira. Mpegaano kiki ky'oyenda tukukolere? Oyenda tuje tukwogerereyo ye kyabazinga oba y'omuduumizi w'eigye.’ ” Omukazi yairamu ati: “Nze ghano ndi mu bantu bange.”

¹⁴ Elisha yaabuuza Gehazi ati: “Obwo kiki kye mbe mmukolere?” Gehazi yairamu ati: “Omukazi oyo aziraku mwana, ate iba mukaire.”

¹⁵ Elisha yaakoba ati: “Kale mwete aidhe.” Gehazi yaamweta. Omukazi yaidha, yaayemerera mu mulyango.

¹⁶ Elisha yaamukoba ati: “Mu kiseera nga kino omwaka ogwidha, oliba olera omwana owuwo omulenzi.” Omukazi yairamu ati: “Busa, musengwa wange, iwe oli muntu wa Katonda, otanguyaguya nze omugheereza wo.”

¹⁷ Aye omukazi yaatoola enda, era mu kiseera ng'oti n'ekyo mu mwaka ogwairirira, yazaala omwana mulenzi, ng'Elisha bwe yamukoba.

¹⁸ Lwali lulala omwana oyo ng'akuze, yaaja ye ise mu isamba ye yali n'abakunguzi b'emere.

¹⁹ Yaalirira ise ati: “Omutwe guli kundhita, omutwe guli kundhita!” Ise yaakoba omugheereza we ati: “Mubbeede omutwale ye inhina.”

²⁰ Omugheereza yaamubbeeda, yaamutwala ye inhina. Inhina yaamulera. Bwe bwatuuka mu kasana ghagati, omwana yaafa.

²¹ Inhina yaamutwala ghaigulu, yaamulambaaza ku buliri bwa Elisha, omuntu wa Katonda, yaamwigalizaamu, mwene yaafuluma.

²² Yaayeta iba ng'akoba ati: “Nsindikira omugheereza mulala n'endogoyi ndala, nje mangu ew'omuntu wa Katonda era mmale ndhire.”

²³ Iba yaamubuuza ati: “Lwaki oli kuja y'ali olwaleero, ate nga ti lunaku lwa Sabbato waire okuba olw'Ekibinuko eky'Okuboneka kw'Omwezi?” Omukazi yairamu ati: “Iwe otafaayo.”

²⁴ Agho omukazi yaatyama ku ndogoyi, era yaalagira omugheereza we ati: “Vuga endogoyi eyangughe inho, era otakendeeza ku mbiro dhaayo okutoolaku nga nkukobye.”

²⁵ Kale yaaja yaatuuka y'Elisha omuntu wa Katonda, ku lusozi Karumeli. Omuntu wa Katonda bwe yalengera omukazi oyo ng'akaaliku ghala, yaakoba Gehazi omugheereza we ati: “Omukazi Omushunami wuule!

²⁶ Lumuka embiro omwagaane, omubuuze oti, ‘Oli bukalamu? Ni balo mukalamu? N'omwana mukalamu?’ ” Omukazi yairamu ati: “Tuli bukalamu.”

²⁷ Aye bwe yatuuka ku lusozi omuntu wa Katonda ghe yali, yaamugemerera ebigere. Gehazi yaaseeta okumughaluzaagho, aye omuntu wa Katonda yaakoba ati: “Muleke, kuba ali n'enaku nnene ku mwoyo. Ate Musengwa Katonda ekyo akingisiisa yaaloba kunkobera.”

²⁸ Omukazi yaakoba ati: “Isebo, nze nkusabangaku omwana omulenzi? Tyakukoba nti otanguyaguya?”

²⁹ Elisha yaakoba Gehazi ati: “Yangugha mangu ogeme omwigo gwange, oje. Bw'oyagaana omuntu mu ngira, otamulamusa. Era bweghabaagho akulamusa otamwiramu. Bw'onaatuuka oidha kuta omwigo gwange ku mwana.”

³⁰ Inhina w'omwana yaakoba ati: “Ndayira mu Musengwa Katonda omulamu, era nga weena bw'oli omulamu, nti tiidha kukuleka.” Kale, Elisha yaasituka, yaaja naye.

³¹ Gehazi yaaja yaabeesookangayo, yaata omwigo ku mwana, aye omwana yaaloba kwesagasa waire okubaamu akakuba. Gehazi yairayo y'Elisha, yaamukobera ati: “Omwana tazuuse.”

³² Elisha bwe yatuuka yaingira mu kisenge, yaabona ng'omwana afiire era nga bamulambaaziiza ku buliri bwe.

³³ Agho yeigalizaamu yenka n'omwana, yaasaba Musengwa Katonda.

³⁴ Yaaja ku buliri, yeeyala ku mwana, yaata omunwa gwe ku munwa gw'omwana, n'amaiso ge ku maiso g'omwana, n'emikono gye ku mikono gy'omwana. Bwe yeegololera ku mwana atyo, omubiri gw'omwana gwasuugha.

³⁵ Elisha yaasooka yaasitukagho yaatambulatambula mu kisenge omwo, ate kabiri yaamala yairayo yeegololera ku mwana. Omwana yaayasimula emikuzi musanvu, yaazibula amaiso.

³⁶ Elisha yaayeta Gehazi, yaamukoba ati: “Yeta Omushunami oyo.” Gehazi yaamweta. Era omukazi bwe yaidha, Elisha yaamukoba ati: “Omwana wo wuuyo.”

³⁷ Omukazi yaidha yaakuba amakiryaivu gha bigere bya Elisha, yaakutama n'ekyeni kyatuuka ku itaka, yaabbeeda omwana we, yaafuluma.

Elisha akolayo ebyewuunhio ebindi bibiri

³⁸ Agho Elisha yaira e Giligali ng'endhala egwire. Ab'omu kikunsu eky'abalanzi bwe baali batyaime mu maiso ge, yaakoba omugheereza we ati: “Taaku entamu enene ofumbire abalanzi abo eby'okulya.”

³⁹ Omuntu owundi ku abo yaaja mu nsiko okunogayo eiva. Yaayagaana ekiryo eky'omu nsiko, yanogaku ebibala ebiri ng'oti mabuga. Yaatwalaku bingi nga bye yasobola okubbeeda, yaaja yaabisalirasalira mu ntamu erimu eby'okulya, aye nga tabiidhi.

⁴⁰ Agho baasenera abantu eby'okulya balye. Aye olwalyaku bati, baaleekaana bati: “Wo muntu wa Katonda, mu ntamu mulimu obutwa!” Era baaloba kwongera kulya.

⁴¹ Elisha yaakoba ati: “Muleeteyooku ku buwunga.” Yaabumiigha mu ntamu. Yaakoba ati: “Mubasenere balye.” Agho mu ntamu mwaba nga timukaalimu kabi naire.

⁴² Olundi ghaidhagho omusaadha eyava e Baali Shalisha ng'aleeteire mu nsawo ye ebirime ebisooka okukungulwa eri Elisha omuntu wa Katonda. Mwalimu obufaaganda obw'engaano ye baakakungula, n'emigaati amakumi abiri egya sayiri ye baasooka okukungula. Elisha yaakoba omugheereza we ati: “Ebyo bighe abantu balye.”

⁴³ Aye omugheereza we yaamukoba ati: “Nnaasobola ntya okugha obuntu buno bwonka, eri abantu ekikumi.” Elisha yairamu ati: “Iwe gha abantu balye, kuba Musengwa Katonda akoba ati, ‘Baidha kulya balekerere n'okulekerera.’ ”

⁴⁴ Kale omugheereza yaata eby'okulya ebyo mu maiso gaibwe, baalya era baalekerera n'okulekerera, nga Musengwa Katonda bwe yakoba.