2 Bakyabazinga 23 - Baibuli Ekibono kya Katonda 2014

Yosia atoolagho okusinza ebisinzibwa ebitali Katonda

¹ Agho kyabazinga Yosia yaayetesa abakulembeze boonaboona aba Buyudaaya n'aba Yerusalemu, beesololeza gh'ali.

² Yaaja nabo mu isinzizo, aghalala n'abantu boonaboona ab'omu Buyudaaya, n'abo boonaboona ab'omu Yerusalemu, ni bakabona, n'abalanzi, n'abantu abandi boonaboona abakologho n'abatali bakologho. Agho nga bali kuwulira, yaasoma ebyali mu kitabo eky'endagaano ekyazuulibwa mu isinzizo.

³ Kyabazinga Yosia era yaayemerera gha mpango, yaakola endagaano mu maiso ga Musengwa Katonda, nga bw'aidha okugemanga amateeka n'ebiragiro bye n'omutima gwe gwonagwona era n'omwoyo gwe gwonagwona, era atuukirizenga ebiri mu ndagaano eyo, nga bwe byaghandiikibwa mu kitabo ekyo. Abantu boonaboona baakakasa nga bwe baidha okukuumanga endagaano eyo.

⁴ Agho kyabazinga Yosia yaayeta Hilikia Omukulu wa Bakabona, ni bakabona abamwiririra, n'abaigazi b'eisinzizo, yaabalagira okufulumya mu isinzizo ebintu byonabyona ebyakozesebwanga mu kusinza omusambwa Baali n'omusambwa omukazi Ashera, ni mu kusinza ebyakira ku igulu byonabyona. Kyabazinga yaabyokera kuliya wa Yerusalemu mu nsiko, mu kiiko Kiduroni, era eivu lyabyo baalitwala e Betheli.

⁵ Yaatoolagho bakabona abaasinzanga ebisinzibwa ebitali Katonda, bakyabazinga ba Buyudaaya be baataagho okuniokezanga obubbaani mu bifo ebigulumivu eby'okusinzizaamu, ebyali mu bibuga bya Buyudaaya ni mu bifo ebyezungulwire Yerusalemu. Yaatoolagho bakabona abo abaaniokezanga obubbaani eri omusambwa Baali, n'endhuba, n'emuunienie, n'ebindi byonabyona ebiri ku igulu.

⁶ Yaatoola mu isinzizo ekifaananie ky'omusambwa omukazi Ashera, yaakitwala kuliya wa Yerusalemu eri akaiga Kiduroni, yaakyokera eyo, yaakisekulasekula kyafuuka bwa nkungu, yaamansira enkungu eyo mu kifo mwe baaziikanga abantu ababuliidho.

⁷ Yaamenhagho ebisulo ebyali mu isinzizo eby'abasaadha abaakolanga obwamalaaya obw'omu isabo. Mu bisulo ebyo abakazi mwe baalukiranga engoye edhaakozesebwanga mu kusinza omusambwa omukazi Ashera.

⁸ Yaatoolayo bakabona boonaboona eyo ye baali mu bibuga bya Buyudaaya. Yaayonoona ebifo byonabyona ebigulumivu eby'okusinzizaamu mu ighanga lyonalyona, okuva e Geba okutuuka e Beerisheba, bakabona mwe baaniokezanga obubbaani. Era yaazikiriza ebifo ebigulumivu eby'okusinzizaamu ebyali okumpi n'aghaingirirwa mu mulyango ogwetebwa ogwa Yoshua, eyali omukulu w'ekibuga. Omulyango ogwo gwali ku luuyi olw'omukono omugooda, ng'oli kwingira mu kibuga.

⁹ Aye bakabona abo abaali ab'omu bifo ebigulumivu eby'okusinzizaamu, tibaabaikiriza kugheerezanga mu isinzizo lya Yerusalemu, okutoolaku okubaikiriza okulyanga ku migaati egitazimbulukusiibwa egigheereibwa bakabona banaibwe.

¹⁰ Kyabazinga Yosia era yaayonoona ekifo ekyayetebwanga Tofethi, ekyali mu kiiko eky'Abahinnomu. Olwo ghalobenga kubaagho muntu yeenayeena ayokerayo mutabane we oba mughala we, ng'ekigheebwayo ekyokebwa eri omusambwa Moleki.

¹¹ Yaatoolayo embalaasi bakyabazinga ba Buyudaaya dhe baali baghaireyo eri endhuba. Era yaayokya ebigaali eby'omu lutalo ebyali mu luya okumpi n'aghaingirirwa mu isinzizo, okuliiraana n'endhu ya Nathani Meleki, eyali owundi ku bakungu.

¹² Yaamenhamenhagho alutaari, bakyabazinga ba Buyudaaya dhe baali bazimbye ghaigulu ku ngulu kw'endhu ya kyabazinga Ahazi, era n'edho kyabazinga Manasse dhe yali azimbye mu mpya dhombi edh'eisinzizo. Edho dhoonadhoona yaadhisaaniagho, dhaafuuka bwa nkungu, era enkungu eyo yaagiyugha mu kaiga Kiduroni.

¹³ Kyabazinga Yosia yaayonoona ebifo ebigulumivu eby'okusinzizaamu ebyali ku lwetebwa Olusozi olw'Okwonoona oluli ku luuyi olw'e buvandhuba wa Yerusalemu. Ebifo ebyo, kyabazinga Solomoni owa Isiraeli yali abizimbiire ebifaananie eby'emisambwa egyenhinhalwa: ekindi nga kya musambwa omukazi Ashera ogw'Abasidoni, ekindi kyaba kya musambwa Kemoshi ogw'Abamoabu, n'ekindi kyaba kya musambwa Moleki ogw'Abammoni.

¹⁴ Kyabazinga Yosia yaamenhamenha empango, era yaatematema n'ebifaananie eby'omusambwa Ashera. Mu bifo byabyo yaidhuzaamu amagumba g'abafu.

¹⁵ Kyabazinga Yosia yaamenhagho n'ekifo ekigulumivu eky'okusinzizaamu ekyali e Betheli, kyabazinga Yeroboamu mutabane wa Nebati kye yazimba n'aleetera Isiraeli okwonoona. Yosia oyo yaamenhagho alutaari ghalala n'ekifo ekyo ekigulumivu eky'okusinzizaamu, yaamulungula amabaale ge baabizimbisa gaafuuka bwa nkungu, era yaayokya n'ekifaananie ky'omusambwa omukazi Ashera.

¹⁶ Agho Yosia oyo bwe yakyuka ati yaabona amagombe agali agho ku lusozi. Yaalagira bagaziikulemu amagumba, era amagumba ago yaagookera ku alutaari ng'agyonoona nga Musengwa Katonda bwe yakoba ng'abita mu mulanzi we eyalanga ebiribaagho mu kifo ekyo.

¹⁷ Agho kyabazinga yaabuuza ati: “Amagombe ago ge ndi kubona g'ani?” Abantu ab'omu kibuga ekyo Betheli baamukobera bati: “Ago n'amagombe g'omuntu wa Katonda eyava mu Buyudaaya, n'alanga ebintu ebyo by'okoze ku alutaari eno ey'e Betheli.”

¹⁸ Kyabazinga Yosia yaakoba ati: “Oyo mumuleke, ghatabaagho muntu yeenayeena agema ku magumba ge.” Kale ni baaleka amagumba ge, era baaleka n'amagumba g'omulanzi eyava e Samaria.

¹⁹ Yosia yaatoolagho amasabo goonagoona ag'omu bifo ebigulumivu eby'okusinzizaamu agaali mu bibuga eby'e Samaria, bakyabazinga ba Isiraeli ge baali bazimbye, ni baleetera Musengwa Katonda okusungughala. Amasabo ago yaagakolaku ebyo byonabyona nga bye yakola e Betheli.

²⁰ Yaitira bakabona ab'omu bifo ebigulumivu eby'okusinzizaamu ku alutaari dhe baagheerezangaku, era alutaari edho yaadhookeraku amagumba g'abafu. Olwamala okukola atyo, yairayo e Yerusalemu.

Yosia akuza Ekibinuko eky'Okwidhukiriraku Okubitizibwa

²¹ Agho kyabazinga Yosia yaalagira abantu ati: “Mukolere Musengwa Katonda waimwe Ekibinuko eky'Okwidhukiriraku Okubitizibwa, nga bwe kyaghandiikibwa mu kitabo kino eky'endagaano.”

²² Okuviira irala mu biseera abalamuzi bye baafugiramu Isiraeli okutuukira irala mu biseera bakyabazinga bye baafugiramu Isiraeli ni Buyudaaya, ghaali nga tighabangaghooku Kibinuko kya Kubitizibwa ekyaga agho.

²³ Aye mu mwaka ogweikumi n'omunaana (18) nga kyabazinga Yosia n'afuga, Ekibinuko ekyo eky'Okubitizibwa baakikolera Musengwa Katonda mu Yerusalemu.

Ebindi Yosia bye yagoloza

²⁴ Yosia era yaatoolagho mu Yerusalemu ni mu Buyudaaya mwonamwona, abasamize, n'abalogo, n'emisambwa egy'omu maka, n'ebisinzibwa ebitali Katonda, era n'ebintu ebindi byonabyona ebyenhinhalwa. Yaakola ekyo, aghange okuleetera amateeka ago okukakata mu bantu, agaaghandiikibwa mu kitabo Hilikia Omukulu wa Bakabona kye yazuula mu isinzizo.

²⁵ Mu bakyabazinga boonaboona abaasookagho Yosia, tighaalighooku waire omulala eyamutuukaku mu kugheereza Musengwa Katonda n'omutima gwe gwonagwona, n'omwoyo gwe gwonagwona, n'amaani ge goonagoona, ng'ajiira ku mateeka ga Musa goonagoona. Ni mu bakyabazinga abaamwiririra mwona timwalimu yamutuukaku.

²⁶ Aye era Musengwa Katonda yaaloba kulekeza busungu bwe kutumbukira ku Buyudaaya ng'oti muliro, olw'ebyo Manasse bye yakola ebyamusungughaza.

²⁷ Musengwa Katonda yaakoba ati: “Ndidha kubinga Buyudaaya mu maiso gange, ng'oti bwe nabinga Isiraeli. Ndidha kulekulira agho ekibuga kino Yerusalemu kye nalondamu, era ndekulire agho n'eisinzizo lye nakoba nti mwe banansinzizanga.”

Enkomerero y'obufuzi bwa Yosia

²⁸ Ebindi byonabyona kyabazinga Yosia bye yakola, byaghandiikibwa mu Kitabo ky'Ebyomubyanda bya Bakyabazinga ba Buyudaaya.

²⁹ Mu biseera bye ng'akaali kyabazinga, kyabazinga Neko ow'e Misiri yaidha n'eigye okubeeraku kyabazinga w'e Assiria kumpi n'omwiga Eufurate. Agho kyabazinga Yosia yaaja okumulwanisa. Neko bwe yabona Yosia, yaamwitira e Megiddo.

³⁰ Abagheereza be baamutwalira mu kigaali eky'omu lutalo nga mufu, okumutoola e Megiddo okumutwala e Yerusalemu, baamuziika mu magombe ge. Abantu ab'omu Buyudaaya baalonda mutabane we Yehoahazi, baamusiiga omuzigo okumufuula kyabazinga mu kifo kya lata we oyo.

Kyabazinga Yehoahazi owa Buyudaaya

³¹ Yehoahazi yali agheza emyaka amakumi abiri n'esatu egy'obukulu ghe yafuukira kyabazinga wa Buyudaaya. Era yaafuga okumala entangama ya myezi esatu mu Yerusalemu. Inhina nga ni Hamutali, mughala wa Yeremia ow'e Libuna.

³² Yehoahazi yaakolanga ebibi eri Musengwa Katonda ng'oti n'ebyo byonabyona badhaadha be bye baakola.

³³ Agho kyabazinga Neko ow'e Misiri yaasibira Yehoahazi e Ribula mu nsi y'e Hamathi, alobe kufuga mu Yerusalemu. Yaasalira Buyudaaya omusolo gwa kilo enkumi isatu na bina (3,400) edha feeza ni kilo amakumi asatu na ina (34) edha zaabu.

³⁴ Kyabazinga Neko oyo yaataagho Eliakimu mutabane wa Yosia, yaamufuula kyabazinga mu kifo kya lata we Yosia. Era yaakyusa eriina lya Eliakimu, yaamutuuma Yehoiakimu. Aye kyabazinga Neko oyo yaatwala Yehoahazi e Misiri, Yehoahazi yaafiira eyo.

Kyabazinga Yehoiakimu owa Buyudaaya

³⁵ Kyabazinga Yehoiakimu yaasolozanga feeza ni zaabu ku bantu b'omu nsi ye ng'ajiira ku nfuna yaibwe, aghange okugheza omughendo gw'empiiya edh'omusolo kyabazinga w'e Misiri gwe yamulagira okusasulanga.

³⁶ Yehoiakimu yali agheza emyaka amakumi abiri n'etaanu egy'obukulu ghe yafuukira kyabazinga wa Buyudaaya. Era yaafuga okumala entangama ya myaka ikumi na mulala mu Yerusalemu. Inhina nga ni Zebida, mughala wa Pedaia ow'e Ruma.

³⁷ Yehoiakimu yaakolanga ebibi eri Musengwa Katonda ng'oti n'ebyo byonabyona badhaadha be bye baakola.